1 Corinto 3:1-23
3 Gani, mga kauturan, wala ako nagahambal sa inyo kaangay sang paghambal ko sa espirituwal nga mga tawo,+ kundi kaangay sa undanon nga mga tawo, kag kaangay sa mga lapsag+ may kaangtanan sa Cristo.
2 Ginpainom ko kamo sing gatas, wala ko kamo ginpakaon sing matig-a nga pagkaon, kay indi pa ninyo ini matunaw. Bisan karon indi pa ninyo ini matunaw,+
3 kay undanon pa kamo.+ Bangod nagahinisaay kamo kag nagaginamo, indi bala undanon kamo+ kag nagagawi subong sang paggawi sang mga tawo sa kalibutan?
4 Kay kon ang isa nagasiling, “Ako kay Pablo,” apang ang isa naman nagasiling, “Ako kay Apolos,”+ indi bala pareho lang kamo sa mga tawo sa kalibutan?
5 Sin-o gid bala si Apolos? Sin-o bala si Pablo? Mga ministro+ nga nagahimo sang hilikuton nga ginhatag sa amon sang Ginuo kag paagi sa ila nangin mga tumuluo kamo.
6 Ako ang nagtanom,+ si Apolos ang nagbunyag,+ apang ang Dios amo ang nagapatubo sini.
7 Gani indi ang nagatanom ukon ang nagabunyag ang padunggan, kundi ang Dios nga nagapatubo sini.+
8 Ang nagatanom kag ang nagabunyag isa,* apang ang kada tawo magabaton sing padya suno sa iya binuhatan.+
9 Kay kami mga masigkamanugpangabudlay sang Dios. Kamo ang duta nga ginauma sang Dios, ang tinukod sang Dios.+
10 Suno sa wala tupong nga kaayo sang Dios nga ginhatag sa akon, subong sang sampaton nga pangulo nga manunukod* ginpasad ko ang sadsaran,+ apang iban nga tawo ang nagatukod sa sini. Ang kada isa padayon nga magbantay kon paano sia nagatukod sa sini.
11 Kay wala sing tawo nga makapasad sang iban pa nga sadsaran luwas sa napasad na, nga amo si Jesucristo.+
12 Kon may magtukod sa sadsaran nga nagagamit sang bulawan, pilak, malahalon nga mga bato, kahoy, hilamon, ukon dagami,
13 ang binuhatan sang kada isa mapadayag, kay ipakita ini sa adlaw sang pagtilaw, bangod ipahayag ini paagi sa kalayo,+ kag ang kalayo mismo magapamatuod kon ano nga sahi ang gintukod sang kada isa.
14 Kon indi masunog ang gintukod sang isa ka tawo sa sadsaran, magabaton sia sang padya;
15 kon masunog ang iya gintukod, magaantos sia bangod sa kadulaan, apang sia mismo maluwas. Mangin kaangay sia sang tawo nga nakapalagyo sa kalayo.
16 Wala bala kamo makahibalo nga kamo templo sang Dios,+ kag ang espiritu sang Dios nagapuyo sa inyo?+
17 Kon may maglaglag sang templo sang Dios, laglagon sia sang Dios; kay ang templo sang Dios balaan, kag kamo ina nga templo.+
18 Wala sing magdaya sa iya kaugalingon: Kon ang bisan sin-o sa inyo nagahunahuna nga maalam sia sa sini nga sistema sang mga butang,* mangin buangbuang sia, agod mangin maalam sia.
19 Kay ang kaalam sini nga kalibutan kabuangan sa Dios, kay nasulat na: “Ginadakop niya ang mga maalam sa ila pagkamalalangon.”+
20 Kag nasulat man: “Nahibaluan ni Jehova* nga wala sing pulos ang mga pangatarungan sang maalam nga mga tawo.”+
21 Gani wala sing magpabugal sa mahimo sang mga tawo; kay ang tanan inyo,
22 bisan si Pablo ukon si Apolos ukon si Cefas*+ ukon ang kalibutan ukon ang kabuhi ukon ang kamatayon ukon ang mga hitabo karon ukon ang mga hitabo sa palaabuton, ang tanan inyo;
23 kag kamo naman iya sang Cristo;+ ang Cristo naman iya sang Dios.
Footnote
^ Ukon “may isa ka katuyuan.”
^ Ukon “sang maalam nga direktor sang hilikuton.”
^ Tan-awa ang Apendise A5.
^ Ginatawag man nga Pedro.
