1 Cronica 10:1-14
-
Si Saul kag iya mga anak napatay (1-14)
10 Nagpakig-away ang mga Filistinhon sa Israel, kag nagpinalagyo ang mga soldado sang Israel sa mga Filistinhon, kag madamo ang napatay sa ila sa Bukid Gilboa.+
2 Ginlagas sang mga Filistinhon si Saul kag ang iya mga anak, kag ginpatay sang mga Filistinhon ang mga anak ni Saul nga si Jonatan, si Abinadab, kag si Malqui-sua.+
3 Masandukot gid ang inaway batok kay Saul, kag nakita sia sang mga manugpana, kag napilasan nila sia.+
4 Dayon nagsiling si Saul sa iya manugdala sing hinganiban: “Gabuta ang imo espada kag bun-a ako, agod indi ako maabtan sining wala matuli nga mga tawo kag patyon nila ako nga wala sing kaluoy.”+ Apang nahadlok gid ang iya manugdala sing hinganiban sa paghimo sini. Gani ginkuha ni Saul ang espada kag ginhap-an ini.+
5 Sang makita sang iya manugdala sing hinganiban nga patay na si Saul, ginhap-an man niya ang iya espada kag napatay sia.
6 Gani napatay sa sina nga adlaw si Saul kag ang iya tatlo ka anak, kag ang tanan sa iya panimalay.+
7 Sang makita sang tanan nga katawhan sang Israel sa nalupyakan* nga nagpinalagyo ang mga soldado sang Israel kag napatay si Saul kag ang iya mga anak, naghalin sila sa ila mga siudad kag nagpalagyo. Dayon nag-abot ang mga Filistinhon kag sila ang nag-istar sa sini.
8 Pagkadason nga adlaw, sang ginkadtuan sang mga Filistinhon ang mga napatay agod panguhaon ang ila mga pagkabutang, nakita nila si Saul kag ang iya mga anak nga patay na sa Bukid Gilboa.+
9 Gani ginkuha nila ang iya ginasuksok nga mga hinganib kag gin-utod nila ang iya ulo, kag nagpadala sila sing mensahe sa bug-os nga duta sang mga Filistinhon agod ibalita ini sa ila mga diosdios+ kag sa mga tawo.
10 Dayon ginbutang nila ang iya mga hinganib sa balay* sang ila dios kag ginlansang nila ang iya ulo sa balay ni Dagon.+
11 Sang mabalitaan sang tanan nga taga-Jabes+ sa Gilead ang tanan nga ginhimo sang mga Filistinhon kay Saul,+
12 naglakat ang tanan nga soldado kag ginkuha nila ang bangkay ni Saul kag ang bangkay sang iya mga anak. Gindala nila ini sa Jabes kag ginlubong ang ila mga tul-an sa idalom sang daku nga kahoy sa Jabes,+ kag nagpuasa sila sing pito ka adlaw.
13 Gani napatay si Saul kay indi sia matutom kay Jehova, bangod wala niya gintuman ang ginsiling ni Jehova,+ kag nagpamangkot pa sia sa isa ka espiritista+
14 sa baylo nga mamangkot kay Jehova. Gani ginpatay Niya sia kag ginbulos sa iya si David nga anak ni Jesse+ bilang hari.
