1 Cronica 12:1-40
-
Mga sumalakdag ni David (1-40)
12 Amo ini ang mga nagkadto kay David sa Ziklag+ sang malagyo sia tungod kay Saul+ nga anak ni Kis, kag lakip sila sa isganan nga mga soldado nga nagbulig sa iya sa pagpakig-away.+
2 May mga pana sila kag maayo sila maglabyog sing bato+ ukon magpana nga ginagamit ang tuo ukon wala nga kamot.+ Mga utod sila ni Saul sa tribo ni Benjamin.+
3 Ang pangulo amo si Ahiezer, upod si Joas nga mga anak ni Semaa nga taga-Gibea;+ si Jeziel kag si Pelet nga mga anak ni Azmavet,+ si Beraca, si Jehu nga taga-Anatot,
4 si Ismaias nga Gibeonhon,+ isa ka isganan nga soldado kag isa sa treinta+ kag sia ang pangulo sang treinta; kag si Jeremias, si Jahaziel, si Johanan, si Jozabad nga taga-Gedera,
5 si Eluzai, si Jerimot, si Bealias, si Semarias, si Sepatias nga taga-Harif,
6 si Elkana, si Isias, si Azarel, si Joezer, si Jasobeam, nga mga Koranhon;+
7 si Joela kag si Zebadias nga mga anak ni Jeroham nga taga-Gedor.
8 Ang pila sa mga Gadhanon nag-upod kay David sa kuta sa kamingawan.+ Isganan sila nga mga soldado kag hanas sa inaway. Handa sila pirme nga may daku nga taming kag bangkaw. Ang ila mga nawong pareho sa nawong sang mga leon, kag pareho sila kadasig sa mga gasela sa kabukiran.
9 Ang pangulo amo si Ezer, ang ikaduha amo si Obadias, ang ikatlo amo si Eliab,
10 ang ikap-at amo si Mismana, ang ikalima amo si Jeremias,
11 ang ikan-om amo si Atai, ang ikapito amo si Eliel,
12 ang ikawalo amo si Johanan, ang ikasiam amo si Elzabad,
13 ang ikanapulo amo si Jeremias, ang ika-11 amo si Macbanai.
14 Sila ang mga Gadhanon+ nga mga pangulo sang mga soldado. Ang pinakakubos sa ila katumbas sang 100 ka soldado, kag ang nagapanguna sa ila katumbas sang 1,000.+
15 Sila ang nagtabok sa Jordan sang una nga bulan sang nagaawas ang pangpang sini. Gintabog nila pakadto sa sidlangan kag sa katundan ang tanan nga nagaistar sa manubo nga patag.
16 Ang pila sa tribo ni Benjamin kag ni Juda nagkadto man kay David sa iya kuta.+
17 Ginsugata sila ni David kag nagsiling sia sa ila: “Kon maayo ang inyo tuyo kag nagkadto kamo sa pagbulig sa akon, magaupod kamo sa akon bilang akon mga abyan. Apang kon nagkadto kamo agod itugyan ako sa akon mga kaaway bisan pa wala ako sing nahimo nga sala, kabay pa nga makita ini sang Dios sang aton mga katigulangan kag hukman niya kamo.”+
18 Dayon napuno sing espiritu sang Dios si Amasai+ nga pangulo sang treinta, kag nagsiling sia:
“Imo kami, O David, kag kaupod mo kami, O anak ni Jesse.+
Kabay pa nga may paghidait ka, kag kabay pa nga may paghidait ang nagabulig sa imo,Kay ang imo Dios nagabulig sa imo.”+
Gani ginbaton sila ni David kag ginhimo niya sila nga pangulo sang mga soldado.
19 Ang pila sa tribo ni Manases nagdampig man kay David sang nag-upod sia sa mga Filistinhon agod magpakig-away kay Saul. Apang wala sia magbulig sa mga Filistinhon, kay pagkatapos maghambalanay ang mga ginuo sang mga Filistinhon,+ ginpalakat nila sia kag nagsiling sila: “Magadampig sia sa iya ginuo nga si Saul kag mabutang sa katalagman ang aton kabuhi.”+
20 Sang nagkadto sia sa Ziklag,+ nagdampig sa iya halin sa tribo ni Manases si Adnah, si Jozabad, si Jediael, si Miguel, si Jozabad, si Elihu, kag si Zilletai, nga mga pangulo sang linibo sa tribo ni Manases.+
21 Ginbuligan nila si David batok sa mga tulisan, kay isganan sila kag maisog nga mga lalaki.+ Kag nangin mga pangulo sila sang mga soldado.
22 Kada adlaw, may mga tawo nga nagakadto kay David+ agod buligan sia. Gani nagdamo ang iya mga soldado, pareho sa kasuldadusan sang Dios.+
23 Amo ini ang kadamuon sang mga pangulo sang mga lalaki nga armado para sa inaway nga nagkadto kay David sa Hebron+ agod ibulos sia kay Saul bilang hari, suno sa sugo ni Jehova.+
24 Ang halin sa tribo ni Juda nga nagadala sing daku nga taming kag bangkaw kag armado para sa inaway may kadamuon nga 6,800.
25 Halin sa mga Simeonhon nga isganan kag maisog nga mga soldado, 7,100.
26 Halin sa mga Levinhon, 4,600.
27 Si Jehoiada+ amo ang lider sa mga anak ni Aaron,+ kag kaupod niya ang 3,700,
28 kag si Zadok+ nga isganan kag maisog nga pamatan-on, upod ang 22 ka pangulo halin sa iya panimalay.
29 Halin sa mga Benjaminhon nga mga utod ni Saul,+ 3,000. Ang kalabanan sa ila nagabantay sadto sa panimalay ni Saul.
30 Halin sa mga Efraimnon, 20,800 ka isganan, maisog, kag bantog nga mga lalaki sa ila mga panimalay.
31 Halin sa katunga sang tribo ni Manases nga ginpili kag ginhingadlan nga magkadto kay David agod himuon sia nga hari, 18,000.
32 Halin sa tribo ni Isacar, 200 ka pangulo nila nga nakahangop sang mga tion kag nakahibalo kon ano ang dapat himuon sang Israel sa isa ka sitwasyon. Sila ang nagadumala sa ila mga utod.
33 Halin sa tribo ni Zebulon, 50,000 ka soldado nga handa sa pagpakig-away kag kompleto sa hinganiban. Tanan sila nag-upod kay David kag nag-unong sa iya sing bug-os.*
34 Halin sa tribo ni Neptali, 1,000 ka pangulo, kag kaupod nila ang 37,000 nga nagadala sing daku nga taming kag bangkaw.
35 Halin sa tribo ni Dan, 28,600 nga handa sa pagpakig-away.
36 Halin sa tribo ni Aser, 40,000 ka soldado nga handa sa pagpakig-away.
37 Halin sa mga Rubenhon, sa mga Gadhanon, kag sa katunga sang tribo ni Manases sa tabok sang Jordan,+ 120,000 ka soldado nga may tanan nga sahi sang hinganiban.
38 Tanan sila mga lalaki nga nakapuesto kag handa sa pagpakig-away. Nagkadto sila sa Hebron kag determinado gid sila nga himuon si David nga hari sa bug-os nga Israel. Nahiusa man ang* nabilin sa Israel nga himuon si David nga hari.+
39 Nagpabilin sila didto sing tatlo ka adlaw, nga nagakaon kag nagainom upod kay David, kay ginhandaan sila sang ila mga utod.
40 Kag ang mga tribo nga malapit sa ila, bisan ang mga halin sa duta sang Isacar, sang Zebulon, kag sang Neptali nagdala sing kalan-on nga ginakarga sa mga asno, sa mga kamelyo, sa mga mula,* kag sa mga baka. Nagdala sila sing madamo nga kalan-unon nga himo sa harina, sing madamo nga pinipi nga igos* kag mga pasas, mga alak, lana, mga baka, kag mga karnero, kay may kinasadya sa Israel.
Footnote
^ Ukon “Tanan nga nag-upod kay David indi doble sing tagipusuon.”
^ Sa literal, “Nag-isa ang tagipusuon sang.”
^ Ang Hebreo nga tinaga nagapatuhoy sa tinday sang asno nga lalaki kag sang kabayo nga babayi.
^ Bunga sang kahoy nga higuera.
