1 Cronica 13:1-14
13 Nakighambal si David sa mga pangulo sang mga linibo kag sang mga ginatos kag sa tanan nga lider.+
2 Dayon nagsiling si David sa bug-os nga katilingban sang Israel: “Kon maayo sa inyo kag kalahamut-an kay Jehova nga aton Dios, magpadala kita sing mensahe sa aton mga utod nga nabilin sa tanan nga rehiyon sang Israel, kag sa mga saserdote man kag sa mga Levinhon sa ila mga siudad+ nga may mga halalban, nga magkadto sila kag mag-upod sa aton.
3 Kag ibalik naton diri ang Kaban+ sang aton Dios.” Ginsiling niya ini bangod ginpabay-an nila ini sang panahon ni Saul.+
4 Nagsugot ang bug-os nga katilingban nga himuon ini, kay daw maayo ini para sa tanan nga katawhan.
5 Gani gintipon ni David ang bug-os nga Israel halin sa suba* sang Egipto tubtob sa Lebo-hamat*+ agod kuhaon ang Kaban sang matuod nga Dios sa Kiryat-jearim.+
6 Nagkadto si David kag ang bug-os nga Israel sa Baala,+ sa Kiryat-jearim nga sakop sang Juda, agod kuhaon didto ang Kaban sang matuod nga Dios, si Jehova, nga nagapungko sa trono sa ibabaw* sang mga kerubin,+ ang kaban diin nagapanawag ang mga tawo sa iya ngalan.
7 Apang halin sa balay ni Abinadab, ginkarga nila ang Kaban sang matuod nga Dios sa isa ka bag-o nga karo.+ Si Uzah kag si Ahio ang nagagiya sa karo.+
8 Nagsaulog si David kag ang bug-os nga Israel sa atubangan sang matuod nga Dios sa bug-os nila nga kusog, nga nagaamba kag nagapatokar sing mga arpa, iban pa nga de-kuerdas nga mga instrumento, mga tamburin,+ mga simbal,+ kag mga trumpeta.+
9 Apang sang makalab-ot sila sa linasan ni Kidon, gin-uyatan ni Uzah ang Kaban kay diutayan lang magbaliskad ang karo bangod sang mga baka nga nagadala sini.
10 Bangod sini, nagdabdab ang kaakig ni Jehova kay Uzah, kag ginpatay Niya sia bangod gin-uyatan niya ang Kaban.+ Napatay sia didto sa atubangan sang Dios.+
11 Apang naakig si David bangod ginhukman dayon ni Jehova si Uzah. Amo kon ngaa gintawag yadto nga duog nga Perez-uzah* tubtob sini nga adlaw.
12 Gani hinadlukan si David sa matuod nga Dios sina nga adlaw kag nagsiling sia: “Paano ko madala sa akon ang Kaban sang matuod nga Dios?”+
13 Wala gindala ni David ang Kaban sa iya lugar sa Siudad ni David, kundi ginpadala niya ini sa balay ni Obed-edom nga Gathanon.
14 Nagpabilin ang Kaban sang matuod nga Dios sa balay ni Obed-edom sing tatlo ka bulan, kag ginpakamaayo ni Jehova ang panimalay ni Obed-edom kag ang tanan nga iya.+
Footnote
^ Ukon “halin sa Sihor.”
^ Ukon “dulunan sang Hamat.”
^ Ukon mahimo, “sa tunga.”
^ Buot silingon, “Hinali nga Paghukom kay Uzah.”
