1 Cronica 15:1-29
15 Nagpatindog sia sing mga balay para sa iya kaugalingon sa Siudad ni David. Naghanda man sia sing isa ka lugar para sa Kaban sang matuod nga Dios kag nagpatindog sia sing tolda para sa sini.+
2 Dayon nagsiling si David: “Wala sing bisan sin-o nga magdala sang Kaban sang matuod nga Dios kundi ang mga Levinhon lamang, kay sila ang ginpili ni Jehova nga magdala sang Kaban ni Jehova kag mag-alagad pirme sa iya.”+
3 Dayon gintipon ni David ang bug-os nga Israel sa Jerusalem agod dalhon ang Kaban ni Jehova sa lugar nga ginhanda niya para sa sini.+
4 Gintipon ni David ang mga kaliwat ni Aaron+ kag ang mga Levinhon:+
5 halin sa mga Kohatnon, si Uriel nga pangulo kag ang 120 niya ka utod;
6 halin sa mga Merarinhon, si Asaias+ nga pangulo kag ang 220 niya ka utod;
7 halin sa mga Gersomhon, si Joel+ nga pangulo kag ang 130 niya ka utod;
8 halin sa mga kaliwat ni Elizafan,+ si Semaias nga pangulo kag ang 200 niya ka utod;
9 halin sa mga kaliwat ni Hebron, si Eliel nga pangulo kag ang 80 niya ka utod;
10 halin sa mga kaliwat ni Uzziel,+ si Aminadab nga pangulo kag ang 112 niya ka utod.
11 Ginpatawag man ni David si Zadok+ kag si Abiatar+ nga mga saserdote kag ang mga Levinhon nga si Uriel, si Asaias, si Joel, si Semaias, si Eliel, kag si Aminadab,
12 kag nagsiling sia sa ila: “Kamo ang mga pangulo sang mga panimalay sang mga Levinhon. Pakabalaana ang inyo kaugalingon, kamo kag ang inyo mga utod, kag dalha ninyo ang Kaban ni Jehova nga Dios sang Israel sa lugar nga ginhanda ko para sa sini.
13 Bangod indi kamo ang nagdala sini sang una,+ naakig gid sa aton si Jehova nga aton Dios,+ kay wala naton ginsunod ang husto nga paagi.”+
14 Gani ginpakabalaan sang mga saserdote kag sang mga Levinhon ang ila kaugalingon agod madala nila ang Kaban ni Jehova nga Dios sang Israel.
15 Dayon gindala sang mga Levinhon ang Kaban sang matuod nga Dios paagi sa pagpas-an sang mga tuwangtuwangan sini sa ila abaga,+ suno sa ginsugo ni Jehova paagi kay Moises.
16 Dayon ginsilingan ni David ang mga pangulo sang mga Levinhon nga itangdo ang ila mga utod nga mga manug-amba sa pag-amba nga may kasadya, upod ang mga instrumento sa musika: de-kuerdas nga mga instrumento, mga arpa,+ kag mga simbal.+
17 Gani gintangdo sang mga Levinhon si Heman+ nga anak ni Joel, kag halin sa iya mga utod, si Asaf+ nga anak ni Berequias, kag halin sa mga Merarinhon nga ila mga utod, si Etan+ nga anak ni Kusaias.
18 Kaupod nila ang ila mga utod sa ikaduha nga grupo,+ si Zacarias, si Ben, si Jaaziel, si Semiramot, si Jehiel, si Unni, si Eliab, si Benaias, si Maaseias, si Matitias, si Elifelehu, kag si Mikneias kag si Obed-edom kag si Jeiel nga mga manugbantay sang gawang.
19 Ang mga manug-amba nga si Heman,+ si Asaf,+ kag si Etan, amo ang magapatunog sing mga simbal nga saway;+
20 si Zacarias, si Aziel, si Semiramot, si Jehiel, si Unni, si Eliab, si Maaseias, kag si Benaias, amo ang nagatokar sing de-kuerdas nga mga instrumento sa mataas nga tono;*+
21 kag si Matitias,+ si Elifelehu, si Mikneias, si Obed-edom, si Jeiel, kag si Azazias, amo ang nagatokar sing arpa sa manubo nga tono,*+ kag sila ang manugdumala.
22 Si Kenanias+ nga pangulo sang mga Levinhon amo ang nagadumala sa pagdala sing Kaban, kay sampaton sia sa sini,
23 kag si Berequias, kag si Elkana amo ang mga manugbantay sang gawang para sa Kaban.
24 Si Sebanias, si Josapat, si Netanel, si Amasai, si Zacarias, si Benaias, kag si Eliezer nga mga saserdote amo ang nagapatunog sing mabaskog sang mga trumpeta sa atubangan sang Kaban sang matuod nga Dios,+ kag si Obed-edom kag si Jehias nagaalagad man bilang mga manugbantay sang gawang para sa Kaban.
25 Dayon si David kag ang mga gulang sang Israel kag ang mga pangulo sang mga linibo naglakat nga may kinasadya sa pagkuha sang kaban sang katipan ni Jehova sa balay ni Obed-edom.+
26 Sang ginbuligan sang matuod nga Dios ang mga Levinhon nga nagadala sing kaban sang katipan ni Jehova, naghalad sila sing pito ka torite nga baka kag pito ka karnero nga lalaki.+
27 Nagasuksok si David sing wala-pako kag maayo sing klase nga bayo, pati ang tanan nga Levinhon nga nagadala sing Kaban, ang mga manug-amba, kag si Kenanias nga pangulo sang mga nagadala sing Kaban kag sang mga manug-amba; nagasuksok man si David sing efod nga linen.+
28 Nagahinugyaw nga gindala sang tanan nga Israelinhon ang kaban sang katipan ni Jehova,+ kag nagapatunog sila sing budyong, sing mga trumpeta,+ kag sing mga simbal, kag nagatokar sila sing mabaskog sang de-kuerdas nga mga instrumento kag mga arpa.+
29 Sang makalab-ot ang kaban sang katipan ni Jehova sa Siudad ni David,+ nagtamwa sa bintana si Mical+ nga anak ni Saul. Sang makita niya si Hari David nga nagatumbotumbo kag nagakasadya, gintamay niya sia sa iya tagipusuon.+
