1 Cronica 17:1-27
17 Sang nagaistar na si David sa iya balay,* nagsiling sia kay Natan+ nga manalagna: “Nagaistar ako sa balay nga human sa kahoy nga sedro+ samtang ang kaban sang katipan ni Jehova yara sa tolda.”+
2 Nagsabat si Natan kay David: “Himua kon ano ang luyag mo himuon, kay kaupod mo ang matuod nga Dios.”
3 Sina mismo nga gab-i, nagsiling ang Dios kay Natan:
4 “Lakat ka, kag hambala ang akon alagad nga si David, ‘Amo ini ang ginasiling ni Jehova: “Indi ikaw ang magapatindog sing balay nga puy-an ko.+
5 Wala pa ako makapuyo sa isa ka balay halin sang ginpagua ko ang Israel sa Egipto tubtob sini nga adlaw, kundi nagasaylosaylo ako sa mga tolda kag sa mga tabernakulo.*+
6 Sa tanan nga tion nga nagsaylosaylo ako upod sa bug-os nga Israel, nagsiling bala ako sa isa sang mga hukom sang Israel nga gintangdo ko nga magbantay sa akon katawhan, ‘Ngaa wala ninyo ako ginpatindugan sing balay nga human sa kahoy nga sedro?’ ” ’
7 “Isiling mo ini kay David nga akon alagad, ‘Amo ini ang ginasiling ni Jehova sang mga kasuldadusan: “Ginkuha ko ikaw sa mga halalban, nga nagaatipan sa panong, agod mangin lider sang akon katawhan nga Israel.+
8 Kaupod mo ako bisan diin ka makadto,+ kag pamatyon ko ang tanan mo nga kaaway;+ kag pabantugon ko ang imo ngalan pareho sa ngalan sang bantog nga mga tawo sa duta.+
9 Hatagan ko sing lugar ang akon katawhan nga Israel kag magaistar sila didto nga may kalig-unan, kag indi na sila pagtublagon. Indi na sila pagpiguson* sang malaut nga mga tawo pareho sang una,+
10 halin sang adlaw nga nagtangdo ako sing mga hukom sa akon katawhan nga Israel.+ Kag pierdihon ko ang tanan mo nga kaaway.+ Dugang pa, nagasiling ako sa imo, ‘Magahimo si Jehova sing isa ka balay* para sa imo.’
11 “ ‘ “Kon mapatay ka na kag ilubong upod sa imo mga katigulangan, ibulos ko sa imo ang imo kaliwat,* ang isa sa imo mga anak,+ kag palig-unon ko ang iya paghari.+
12 Sia ang mapatindog sing balay para sa akon,+ kag lig-unon ko ang iya trono sing dayon.+
13 Mangin amay niya ako, kag mangin anak ko sia.+ Padayon ako nga magpakita sa iya sing mainunungon nga gugma,+ indi pareho sang ginhimo ko sa isa nga nauna sa imo.+
14 Itangdo ko sia sa akon panimalay kag sa akon ginharian sing dayon,+ kag ang iya trono magapadayon tubtob san-o.” ’ ”+
15 Ginsugid ni Natan kay David ini tanan nga palanan-awon kag ang tanan nga ginsiling sa iya.
16 Bangod sini, nagsulod si Hari David kag nagpungko sa atubangan ni Jehova kag nagsiling: “Sin-o gid bala ako, O Jehova nga Dios? Kag sin-o gid bala ang akon panimalay nga ginhimo mo ini tanan para sa akon?+
17 O Dios ko, subong bala nga daw kulang pa ang ginhimo mo para sa akon, nagsiling ka pa nga ang panimalay sang imo alagad magapabilin tubtob sa palaabuton,+ kag gintamod mo ako subong isa ka tawo nga hatagan sing dugang pa nga kadungganan,* O Jehova nga Dios.
18 Kag ano pa ang mahambal sang imo alagad nga si David sa imo tuhoy sa pagpadungog sa akon kay kilala mo gid ang imo alagad?+
19 O Jehova, tungod sang imo alagad kag suno sa imo kabubut-on,* ginhimo mo ining tanan dalagku nga butang kag ginpakita mo ang imo pagkagamhanan.+
20 O Jehova, wala gid sing pareho sa imo,+ kag wala na sing Dios kundi ikaw lamang;+ ginapamatud-an ini sang tanan nga nabatian namon.
21 Kag ano pa nga pungsod sa duta ang pareho sa imo katawhan nga Israel?+ O matuod nga Dios, gintubos mo sila agod mangin imo katawhan.+ Ginpadunggan mo ang imo ngalan paagi sa imo daku kag makahalawhaw nga mga binuhatan.+ Gintabog mo ang mga pungsod palayo sa imo katawhan+ nga gintubos mo sa Egipto.
22 Ginhimo mo ang imo katawhan nga Israel nga imo katawhan tubtob san-o;+ kag ikaw, O Jehova, ang nangin Dios nila.+
23 O Jehova, kabay pa nga matuman sing dayon ang imo ginsaad tuhoy sa imo alagad kag sa iya panimalay, kag kabay pa nga himuon mo ang imo ginsaad.+
24 Kabay pa nga ang imo ngalan magapabilin nga masaligan* kag mangin halangdon+ sing dayon, agod magsiling ang katawhan, ‘Si Jehova sang mga kasuldadusan, ang Dios sang Israel, amo ang Dios para sa Israel,’ kag kabay pa nga magpabilin nga malig-on ang panimalay sang imo alagad nga si David sa imo atubangan.+
25 Kay ikaw nga akon Dios nagpahayag sa imo alagad sang imo katuyuan nga patindugan sia sing balay.* Amo kon ngaa may pagsalig ang imo alagad nga magpangamuyo sa imo.
26 O Jehova, ikaw ang matuod nga Dios, kag ginsaad mo ining maayo nga mga butang sa imo alagad.
27 Gani kabay pa nga pakamaayuhon mo ang panimalay sang imo alagad, kag kabay pa nga magpabilin ini sing dayon sa imo atubangan; kay ikaw, O Jehova, ang nagpakamaayo sini, kag pakamaayuhon ini sing dayon.”
Footnote
^ Ukon “palasyo.”
^ Mahimo nagakahulugan, “halin sa isa ka tolda pakadto sa isa pa kag halin sa isa ka puluy-an pakadto sa isa pa.”
^ Sa literal, “pagpaluyahon.”
^ Ukon “dinastiya.”
^ Sa literal, “binhi.”
^ Ukon “isa ka tawo nga mataas ang posisyon.”
^ Ukon “tagipusuon.”
^ Ukon “magapadayon.”
^ Ukon “dinastiya.”
