1 Cronica 20:1-8
20 Sa pagsugod sang tuig,* sa tion nga nagapakig-away ang mga hari, ginpangunahan ni Joab+ ang mga soldado kag ginlaglag ang duta sang mga Ammonhon. Ginlikupan niya ang Raba,+ samtang si David nagpabilin sa Jerusalem.+ Ginsalakay ni Joab ang Raba kag ginlaglag ini.+
2 Dayon ginkuha ni David ang korona sa ulo ni Malcam. Nagabug-at ini sing isa ka talanton* nga bulawan, kag may malahalon ini nga mga bato; kag ginbutang ini sa ulo ni David. Madamo man ang iya naagaw sa siudad.+
3 Ginbihag niya ang mga tawo sang siudad kag ginpaobra niya sila+ nga ang ila ginagamit mga lagari para sa bato kag matalom nga mga salsalon kag mga wasay. Amo ini ang ginhimo ni David sa tanan nga siudad sang mga Ammonhon. Sang ulihi, nagbalik si David kag ang tanan nga soldado sa Jerusalem.
4 Pagkatapos sini, may inaway batok sa mga Filistinhon sa Gezer. Sa sina nga tion, ginpatay ni Sibbecai+ nga Husanhon si Sipai* nga kaliwat sang mga Refaim,+ kag napierde ang mga Filistinhon.
5 Kag may inaway liwat batok sa mga Filistinhon. Ginpatay ni Elhanan nga anak ni Jair si Lami nga utod ni Goliat+ nga Gathanon, nga ang iya bangkaw pareho sa teral sang mga manughabol.+
6 Dayon may inaway liwat sa Gat,+ diin may isa ka lalaki nga tuman kadaku.+ May 6 ka tudlo ang iya mga kamot kag may 6 ka tudlo ang iya mga tiil, 24 tanan ang iya tudlo; kag kaliwat man sia sang mga Refaim.+
7 Ginayaguta+ niya ang Israel. Gani ginpatay sia ni Jonatan nga anak ni Simea+ nga utod ni David.
8 Mga kaliwat sila sang mga Refaim+ sa Gat.+ Ginpatay sila ni David kag sang iya mga tinawo.
