1 Cronica 21:1-30
21 Dayon naghulag si Satanas* batok sa Israel kag ginsugyot niya si David nga isipon ang Israel.+
2 Gani ginsugo ni David si Joab+ kag ang mga pangulo sang katawhan: “Lakat kamo kag isipa ninyo ang Israel halin sa Beer-seba tubtob sa Dan;+ dayon isugid ninyo sa akon ang ila kadamuon.”
3 Apang nagsiling si Joab: “Kabay pa nga dugangan ni Jehova sing 100 ka pilo ang iya katawhan! O ginuo ko nga hari, indi bala nga mga alagad na sila tanan sang akon ginuo? Ngaa luyag ini himuon sang akon ginuo? Ngaa mangin kabangdanan sia nga makasala ang Israel?”
4 Apang wala sing mahimo si Joab sa ginsiling sang hari. Gani naglakat si Joab kag naglibot sa bug-os nga Israel. Pagkatapos sini, nagkadto sia sa Jerusalem.+
5 Ginsugid ni Joab kay David ang kadamuon sang katawhan nga ila ginrehistro. Ang bug-os nga Israel may 1,100,000 ka lalaki nga may mga espada, kag ang Juda may 470,000 ka lalaki nga may mga espada.+
6 Apang wala ginrehistro ni Joab ang tribo ni Levi kag ni Benjamin,+ bangod naugot sia sa ginsugo sang hari.+
7 Wala gid ini ginkahamut-an sang matuod nga Dios, gani ginsilutan niya ang Israel.
8 Dayon nagsiling si David sa matuod nga Dios: “Nakasala gid ako+ sa akon ginhimo. Palihug, patawara ang imo alagad,+ kay kabuangan gid ang akon ginhimo.”+
9 Nagsiling si Jehova kay Gad+ nga nagasugid sang mga palanan-awon kay David:
10 “Lakat ka kag silinga si David, ‘Amo ini ang ginasiling ni Jehova: “Magpili ka kon diin sa tatlo ka butang ang himuon ko sa imo.” ’ ”
11 Gani nagkadto si Gad kay David kag nagsiling sia: “Amo ini ang ginasiling ni Jehova, ‘Magpili ka,
12 tatlo ka tuig nga gutom,+ ukon tatlo ka bulan nga pierdihon ka sang imo mga kaaway kag malab-ot ka sang espada sang imo mga kaaway,+ ukon tatlo ka adlaw nga pagpanghalit sang espada ni Jehova nga amo ang kalalat-an sa duta,+ kag ang anghel ni Jehova magadala sing kalaglagan+ sa bug-os nga teritoryo sang Israel.’ Binagbinaga sing maayo kon ano ang isabat ko sa Isa nga nagpadala sa akon.”
13 Nagsiling si David kay Gad: “Nabudlayan gid ako. Palihug, indi ako pag-itugyan sa tawo+ kundi kay Jehova na lang kay maluluy-on gid sia.”+
14 Gani nagpadala si Jehova sing kalalat-an+ sa Israel, amo kon ngaa 70,000 ka tawo ang napatay sa Israel.+
15 Nagpadala man ang matuod nga Dios sing anghel sa Jerusalem agod laglagon ini. Apang sang himuon na niya ini, naluoy* si Jehova sa katawhan tungod sa kalalat-an nga iya ginpadala,+ kag nagsiling sia sa anghel nga nagasilot sa katawhan: “Tama na!+ Papanauga ang imo kamot.” Nagatindog sadto ang anghel ni Jehova malapit sa linasan ni Ornan*+ nga Jebusnon.+
16 Sang magtangla si David, nakita niya ang anghel ni Jehova nga nagatindog sa tungatunga sang duta kag langit nga nagauyat sang espada+ kag ginatudlo ini sa Jerusalem. Nagluhod kag nagduko dayon si David+ kag ang mga gulang nga nagasuksok sing sako.+
17 Nagsiling si David sa matuod nga Dios: “Indi bala ako ang nagpaisip sa katawhan? Ako ang nakasala, kag ako ang nakahimo sing sayop;+ apang ano ang nahimo sini nga mga karnero? O Jehova nga akon Dios, palihug ako na lang ang siluti kag ang panimalay sang akon amay. Apang indi paghaliti ang imo katawhan.”+
18 Ginsilingan sang anghel ni Jehova si Gad+ nga isiling kay David nga dapat maglakat sia kag maghimo sing halaran para kay Jehova sa linasan ni Ornan nga Jebusnon.+
19 Gani naglakat si David suno sa ginsiling ni Jehova paagi kay Gad.
20 Sang magbalikid si Ornan, nakita niya ang anghel, kag ang apat niya ka anak nga kaupod niya nagpanago. Nagalinas sadto si Ornan sing trigo.
21 Sang nagapadulong si David, nakita ni Ornan si David, gani naggua sia dayon sa linasan kag nagluhod sia kag nagduko kay David.
22 Nagsiling si David kay Ornan: “Ibaligya* sa akon ang lugar sang linasan, agod makahimo ako sa sini sing halaran para kay Jehova. Bayaran ko kon pila gid ang bili sini, agod mauntat na ang kalalat-an sa katawhan.”+
23 Apang nagsiling si Ornan kay David: “Imo na lang ina ginuo ko nga hari kag himua kon ano ang luyag mo. Ihatag ko man ang mga baka nga ihalad mo bilang mga dulot nga sinunog kag ang tapi nga inuglinas+ bilang inuggatong kag ang trigo bilang dulot nga uyas. Ginahatag ko ini tanan sa imo.”
24 Apang, nagsiling si Hari David kay Ornan: “Indi. Bayaran ko kon pila gid ang bili sini, kay indi ako magkuha sa imo sing ihalad ko kay Jehova ukon maghalad ako sing mga halad nga sinunog nga wala ko gingastuhan.”+
25 Gani ginbayaran ni David si Ornan sing 600 ka siklo* nga bulawan bilang bili sini nga lugar.
26 Dayon naghimo didto si David sing halaran+ para kay Jehova kag naghalad sia sing mga halad nga sinunog kag mga halad sa pag-ambitanay, kag nagpanawag sia kay Jehova, kag ginsabat niya sia paagi sa pagpadala sing kalayo+ halin sa langit sa halaran para sa dulot nga sinunog.
27 Dayon ginsugo ni Jehova ang anghel+ nga ibalik ang iya espada sa tagob sini.
28 Sang makita ni David nga ginsabat sia ni Jehova sa linasan ni Ornan nga Jebusnon, padayon sia nga naghalad didto.
29 Apang, sadto nga tion, yara sa mataas nga duog sa Gibeon+ ang tabernakulo ni Jehova nga ginhimo ni Moises sa kamingawan kag ang halaran para sa dulot nga sinunog.
30 Apang wala makakadto didto si David agod magpamangkot sa Dios, kay nahadlok sia bangod sa espada sang anghel ni Jehova.
Footnote
^ Ukon mahimo, “ang manugpamatok.”
^ Ukon “nasubuan.”
^ Sa literal, “Ihatag.”
^ Ang isa ka siklo katumbas sang 11.4 ka gramo. Tan-awa ang Apendise B14.
