1 Cronica 5:1-26
5 Ang panganay nga anak ni Israel amo si Ruben.+ Sia ang panganay, apang bangod gindagtaan niya ang hiligdaan sang iya amay,+ ginhatag ang iya kinamatarong bilang panganay sa mga anak ni Jose+ nga anak ni Israel, gani wala sia sa listahan sang kaliwatan sang may kinamatarong sa pagkapanganay.
2 Bisan pa mas gamhanan si Juda+ sangsa iya mga utod kag halin sa iya ang isa nga mangin lider,+ kay Jose ginhatag ang kinamatarong bilang panganay.
3 Ang mga anak ni Ruben nga panganay ni Israel amo si Hanoc, si Pallu, si Hezron, kag si Carmi.+
4 Ang mga anak ni Joel amo si Semaias, ang iya anak amo si Gog, ang iya anak amo si Simei,
5 ang iya anak amo si Miqueas, ang iya anak amo si Reaya, ang iya anak amo si Baal,
6 kag ang iya anak amo si Beerah nga ginbihag ni Hari Tilgat-pilneser+ sang Asiria. Si Beerah amo ang pangulo sang mga Rubenhon.
7 Ang iya mga utod suno sa ila mga pamilya sa listahan sang ila kaliwatan amo si Jeiel nga pangulo, si Zacarias,
8 kag si Bela nga anak ni Azaz nga anak ni Sema nga anak ni Joel. Ang duta nga ila ginaistaran halin sa Aroer+ tubtob sa Nebo kag sa Baal-meon.+
9 Ang ila duta sa sidlangan naglab-ot tubtob sa dulunan sang kamingawan sa Suba Eufrates,+ kay nagdamo ang ila kasapatan sa Gilead.+
10 Sang panahon ni Saul, nagpakig-away sila sa mga Hagarnon, nga napierde nila, gani nag-istar sila sa ila mga tolda sa bug-os nga kadutaan sa sidlangan sang Gilead.
11 Ang mga kaliwat ni Gad nag-istar sa duta sang Basan tubtob sa Saleca+ sa tupad sang mga kaliwat ni Ruben.
12 Si Joel amo ang pangulo, ang ikaduha si Sapam, kag si Janai kag si Safat mga lider man sa Basan.
13 Ang pito nila ka paryente sa amay amo si Miguel, si Mesulam, si Sheba, si Jorai, si Jacan, si Zia, kag si Eber.
14 Sila ang mga anak ni Abihail nga anak ni Huri nga anak ni Jaroa nga anak ni Gilead nga anak ni Miguel nga anak ni Jesisai nga anak ni Jado nga anak ni Buz.
15 Si Ahi nga anak ni Abdiel nga anak ni Guni amo ang pangulo sang panimalay sang ila amay.
16 Nag-istar sila sa Gilead,+ sa Basan+ kag sa sakop* nga mga banwa sini, kag sa tanan nga halalban sang Saron tubtob sa mga dulunan sini.
17 Nalista sila tanan sa listahan sang kaliwatan sang panahon ni Hari Jotam+ sang Juda kag sang panahon ni Hari Jeroboam*+ sang Israel.
18 Ang mga Rubenhon, mga Gadhanon, kag ang katunga sang tribo ni Manases may 44,760 ka isganan nga soldado nga may mga taming, mga espada, kag mga pana,* kag hanas sila sa pagpakig-away.
19 Nagpakig-away sila batok sa mga Hagarnon,+ kay Jetur, kay Nafis,+ kag kay Nodab.
20 Ginbuligan sila sa ila pagpakig-away, gani napierde nila ang mga Hagarnon kag ang tanan nga kaupod nila, kay nangayo sila sing bulig sa Dios kag ginpamatian niya sila bangod nagsalig sila sa iya.+
21 Ginpanguha nila ang ila mga kasapatan: 50,000 ka kamelyo, 250,000 ka karnero, kag 2,000 ka asno. Ginbihag man nila ang 100,000 ka tawo.*
22 Madamo gid ang napatay bangod ang matuod nga Dios ang nagpakig-away para sa ila.+ Kag sila ang nagbulos sa lugar nga ila ginaistaran tubtob sang ginbihag sila.+
23 Madamo gid ang mga kaliwat sang katunga sang tribo ni Manases.+ Nag-istar sila sa Basan tubtob sa Baal-hermon kag sa Senir kag sa Bukid Hermon.+
24 Amo ini ang mga pangulo sang mga panimalay sang ila amay: si Efer, si Isi, si Eliel, si Azriel, si Jeremias, si Hodabias, kag si Jadiel. Mga soldado sila nga isganan, bantog, kag mga pangulo sila sang mga panimalay sang ila amay.
25 Apang wala sila magpabilin nga matutom sa Dios sang ila mga katigulangan kag nagsimba* sila sa mga dios sang mga katawhan sang duta+ nga ginlaglag sang Dios sa ila atubangan.
26 Gani ginsugyot sang Dios sang Israel ang espiritu ni Hari Pul sang Asiria+ (nga amo si Hari Tilgat-pilneser+ sang Asiria) kag ginbihag niya ang mga Rubenhon, ang mga Gadhanon, kag ang katunga sang tribo ni Manases kag gindala niya sila sa Hala, sa Habor, sa Hara, kag sa suba sang Gosan,+ kag nagaistar sila didto tubtob sini nga adlaw.
Footnote
^ Ukon “sa palibot.”
^ Si Jeroboam II.
^ Sa literal, “kag nagatapak sa pana.”
^ Ukon “tawhanon nga kalag.”
^ Sa literal, “nagpakighilawas.”
