1 Hari 9:1-28
9 Sang natapos mapatindog ni Solomon ang balay ni Jehova, ang balay* sang hari,+ kag ang tanan nga luyag himuon ni Solomon,+
2 nagpakita si Jehova kay Solomon sa ikaduha nga tion, subong sang pagpakita niya sa iya sa Gibeon.+
3 Nagsiling si Jehova sa iya: “Nabatian ko ang imo pangamuyo kag pangabay. Ginpakabalaan ko ini nga balay nga ginpatindog mo paagi sa pagbutang sang akon ngalan sa sini+ tubtob san-o, kag bantayan ko ini kag atipanon sa tanan nga tion.+
4 Kon magsunod ka sa akon, pareho sang imo amay nga si David,+ nga may bug-os nga tagipusuon+ kag matarong,+ kag sundon mo ang tanan nga ginsugo ko,+ kag tumanon mo ang akon mga pagsulundan kag mga desisyon,+
5 palig-unon ko ang trono sang imo ginharian sa Israel sing dayon, subong sang ginsaad ko kay David nga imo amay, ‘May kaliwat ka pirme nga magapungko sa trono sang Israel.’+
6 Apang kon ikaw kag ang imo mga anak magtalikod sa akon kag indi ninyo pagtumanon ang akon mga sugo kag mga pagsulundan, kag mag-alagad kamo sa iban nga mga dios kag magyaub sa ila,+
7 laglagon ko ang Israel sa duta nga ginhatag ko sa ila,+ kag sikwayon ko ang balay nga ginpakabalaan ko para sa akon ngalan,+ kag ang Israel tamayon* kag yagutaon sang tanan nga katawhan.+
8 Ini nga balay mangin tinumpok nga kagulub-an.+ Ang tanan nga magalabay sa sini matingala kag managutsot kag magasiling, ‘Ngaa ginhimo ina ni Jehova sa sini nga duta kag sa sini nga balay?’+
9 Dayon magasiling sila, ‘Bangod ginbayaan nila si Jehova nga ila Dios nga nagpagua sang ila mga katigulangan sa duta sang Egipto, kag nagdangop sila sa iban nga mga dios kag nagyaub kag nag-alagad sa ila. Gani gintugutan ni Jehova nga matabo sa ila ini tanan nga kahalitan.’ ”+
10 Pagligad sang 20 ka tuig, pagkatapos mapatindog ni Solomon ang duha ka balay, ang balay ni Jehova kag ang balay* sang hari,+
11 ginhatag ni Hari Solomon kay Hiram ang 20 ka siudad sa duta sang Galilea, kay si Hiram+ nga hari sang Tiro amo ang naghatag kay Solomon sing mga kahoy nga sedro kag junipero kag sing bulawan nga kinahanglanon niya.+
12 Gani halin sa Tiro, naglakat si Hiram agod tan-awon ang mga siudad nga ginhatag sa iya ni Solomon, apang wala niya ini maluyagi.*
13 Nagsiling sia: “Ano ining mga siudad nga ginhatag mo sa akon, utod ko?” Gani gintawag ini nga Duta sang Cabul* tubtob sini nga adlaw.
14 Kag nagpadala si Hiram sa hari sing 120 ka talanton* nga bulawan.+
15 Amo ini ang kasaysayan tuhoy sa mga tawo nga ginpatawag ni Hari Solomon agod magpangabudlay+ sa pagpatindog sang balay ni Jehova,+ sang iya balay,* sang Bungyod,*+ sang pader sang Jerusalem, sang Hazor,+ sang Megiddo,+ kag sang Gezer.+
16 (Ginsalakay kag ginsakop sang Paraon nga hari sang Egipto ang Gezer kag ginsunog niya ini. Ginpamatay man niya ang mga Canaanhon+ nga nagaistar sa sini nga siudad. Gani ginhatag niya ini bilang regalo sa paglakat* sang iya anak nga babayi+ nga asawa ni Solomon.)
17 Gintukod* liwat ni Solomon ang Gezer, ang Naubos nga Bet-horon,+
18 ang Baalat,+ kag ang Tamar sa kamingawan, nga sakop sang iya duta,
19 kag ang tanan nga bodega nga siudad nga ginapanag-iyahan ni Solomon, ang mga siudad nga ginapunduhan sang mga kangga,+ ang mga siudad para sa mga manugkabayo, kag ang tanan nga luyag patindugon ni Solomon sa Jerusalem, sa Lebanon, kag sa tanan nga duta nga sakop niya.
20 Tuhoy sa tanan nga katawhan nga nabilin sa mga Amornon, mga Hethanon, mga Pereznon, mga Hevhanon, kag mga Jebusnon,+ nga indi bahin sang katawhan sang Israel,+
21 ginpatawag ni Solomon sa pagpangabudlay bilang ulipon tubtob sini nga adlaw ang ila mga kaliwat+ nga nabilin sa duta nga wala ginlaglag sang mga Israelinhon.
22 Apang wala ginhimo ni Solomon nga ulipon ang bisan sin-o sa mga Israelinhon,+ kay sila ang iya mga hangaway, mga alagad, mga manugdumala, mga kabulig nga opisyal, kag mga pangulo sang mga nagasakay sa kangga kag sang mga manugkabayo.
23 May 550 ka pangulo sang mga administrador nga nagadumala sa ginapaobra ni Solomon, ang mga porman nga nagadumala sa mga trabahador.+
24 Apang ang anak nga babayi sang Paraon+ naghalin sa Siudad ni David+ kag nagsaylo sa balay nga ginpatindog ni Solomon para sa iya. Dayon ginpahimo ni Solomon ang Bungyod.*+
25 Tatlo ka beses kada tuig+ nga nagahalad si Solomon sing mga halad nga sinunog kag mga halad sa pag-ambitanay sa halaran nga ginhimo niya para kay Jehova,+ kag nagapaaso man sia sing mga halad sa halaran sa atubangan ni Jehova. Gani natapos ni Solomon ang pagpatindog sing balay.+
26 Nagpahimo man si Hari Solomon sing mga barko sa Ezion-geber,+ nga malapit sa Elot, sa baybayon sang Pula nga Dagat sa duta sang Edom.+
27 Ginpaupod ni Hiram sa mga barko ang iya mga alagad nga marinero+ nga hanas sa pagpanakayon sa dagat, upod sa mga alagad ni Solomon.
28 Nagakadto sila sa Ofir+ kag nagakuha sila didto sing 420 ka talanton nga bulawan kag ginadala nila ini kay Hari Solomon.
Footnote
^ Ukon “palasyo.”
^ Sa literal, “mangin hulubaton.”
^ Ukon “palasyo.”
^ Sa literal, “indi ini maayo sa iya panulok.”
^ Ukon mahimo, “Duta nga Wala sing Pulos.”
^ Ang isa ka talanton katumbas sang 34.2 ka kilo. Tan-awa ang Apendise B14.
^ Ukon “Millo.” Isa ka Hebreo nga termino nga nagakahulugan “tinampok.”
^ Ukon “palasyo.”
^ Ukon “regalo sa kasal; dote.”
^ Ukon “Ginpabakod.”
^ Ukon “Millo.” Isa ka Hebreo nga termino nga nagakahulugan “tinampok.”
