1 Juan 5:1-21
5 Ang tagsatagsa nga nagapati nga si Jesus amo ang Cristo anak sang Dios,+ kag ang tagsatagsa nga nagahigugma sa amay, ang Dios, nagahigugma sa mga anak sang Dios.
2 Ginahigugma naton ang mga anak sang Dios,+ kon ginahigugma naton ang Dios kag ginatuman ang iya mga sugo.
3 Kay amo ini ang kahulugan sang gugma sa Dios, nga tumanon naton ang iya mga sugo;+ apang ang iya mga sugo indi mabug-at,+
4 bangod ginadaug sang tagsa ka anak sang Dios ang kalibutan.+ Paagi sa aton pagtuo+ nadaug naton ang kalibutan.
5 Sin-o ang makadaug sang kalibutan?+ Indi bala ang isa nga nagatuo nga si Jesus ang Anak sang Dios?+
6 May tubig kag dugo sang nagkari si Jesucristo, indi lamang tubig,+ kundi tubig kag dugo.+ Kag ang espiritu nagasaksi sa sini,+ bangod ang espiritu kamatuoran.
7 Kay may tatlo ka saksi:
8 ang espiritu+ kag ang tubig+ kag ang dugo;+ kag ining tatlo nagahilisugot.
9 Kon ginabaton naton ang panaksi sang mga tawo, ang panaksi nga ginahatag sang Dios mas daku pa. Bangod amo ini ang panaksi nga ginahatag sang Dios, nga nagpanaksi sia nahanungod sa iya Anak.
10 Yara sa tagipusuon sang tawo nga nagatuo sa Anak sang Dios ang ginsiling sang Dios sa iya. Ang tawo nga wala nagatuo sa Dios nagahimo sa Dios nga butigon,+ bangod wala sia magtuo sa panaksi nga ginhatag sang Dios nahanungod sa iya Anak.
11 Kag amo ini ang panaksi nga ginhatag sang Dios, nga ginhatagan niya kita sang kabuhi nga wala sing katapusan,+ kag ini nga kabuhi yara sa iya Anak.+
12 Ang isa nga nagabaton sa Anak may yara sini nga kabuhi; ang isa nga wala nagabaton sa Anak sang Dios wala sini nga kabuhi.+
13 Ginasulat ko sa inyo ining mga butang agod mahibaluan ninyo nga kamo may kabuhi nga wala sing katapusan,+ kamo nga nagtuo sa ngalan sang Anak sang Dios.+
14 Kag may pagsalig* kita sa iya,+ nga bisan ano ang ipangamuyo naton suno sa iya kabubut-on, magapamati sia sa aton.+
15 Kag kon nahibaluan naton nga nagapamati sia sa aton nahanungod sa bisan ano nga ginapangamuyo naton, nahibaluan man naton nga matigayon naton ang mga butang nga aton ginpangamuyo, sanglit ginpangamuyo naton ini sa iya.+
16 Kon makita sang isa ang iya utod nga nagahimo sang sala nga wala nagadul-ong sa kamatayon, dapat ipangamuyo niya sia, kag hatagan sia sang Dios sang kabuhi,+ huo, sa mga wala nagapakasala nga nagadul-ong sa kamatayon. May sala nga nagadul-ong sa kamatayon.+ Wala ako nagasiling nga mangamuyo sia agod buligan ang tawo nga nakahimo sini nga sahi sang sala.
17 Ang tanan nga pagkadimatarong sala,+ apang may sala nga wala nagadul-ong sa kamatayon.
18 Nahibaluan naton nga ang tagsa ka tawo nga anak sang Dios wala nagapadayon sa pagpakasala, kay ang isa nga anak sang Dios* nagabantay sa iya, kag ang isa nga malauton indi makahalit sa iya.+
19 Nahibaluan naton nga naghalin kita sa Dios, apang ang bug-os nga kalibutan yara sa gahom sang isa nga malauton.+
20 Apang nahibaluan naton nga ang Anak sang Dios nagkari,+ kag ginhatagan niya kita sang paghangop* agod may ihibalo kita tuhoy sa matuod nga Dios. Kag nahiusa kita sa iya+ paagi sa iya Anak nga si Jesucristo. Huo, amo ini ang matuod nga Dios kag ang kabuhi nga wala sing katapusan.+
21 Mga anak, magbantay kamo batok sa mga diosdios.+
Footnote
^ Ukon “kahilwayan sa paghambal.”
^ Si Jesucristo, ang Anak sang Dios.
^ Sa literal, “paghantop; ikasarang sa panghunahuna.”
