1 Pedro 2:1-25
2 Gani isikway ninyo ang tanan nga kalainan,+ pagpangdaya, pagkasalimpapaw, kahisa, kag ang tanan nga pagpanglibak.
2 Subong sang bag-o lang nabun-ag nga mga lapsag,+ palambua ninyo ang paghandum sa wala simbog* nga gatas sang pulong, agod paagi sini magtubo kamo sa kaluwasan,+
3 kay natilawan* na ninyo nga ang Ginuo maayo gid.
4 Samtang nagapalapit kamo sa iya, nga isa ka buhi nga bato nga ginsikway sang mga tawo+ apang pinili kag hamili sa Dios,+
5 kamo subong buhi nga mga bato ginatukod nga mangin isa ka espirituwal nga balay+ sang balaan nga mga saserdote, agod magdulot sang espirituwal nga mga halad+ nga kalahamut-an sa Dios paagi kay Jesucristo.+
6 Kay ang Kasulatan nagasiling: “Nagabutang ako sa Sion sing isa ka pinili nga bato, pinakahamili nga sadsaran nga pamusod nga bato, kag wala sing nagatuo sa sini ang mapaslawan.”*+
7 Gani, hamili sia sa inyo, bangod nagatuo kamo; apang sa mga wala nagatuo, “ang bato nga ginsikway sang mga manunukod+ nangin ang pinakaimportante nga pamusod nga bato”*+
8 kag “bato nga kasandaran kag igang nga makapatumba.”+ Nagakasandad sila bangod indi sila matinumanon sa pulong. Amo sini ang madangatan sang mga tawo nga kaangay sa ila.
9 Apang kamo “pinili nga rasa, harianon nga mga saserdote, balaan nga pungsod,+ katawhan nga ginkuha para panag-iyahan sang Dios,+ agod mapahayag ninyo sing lapnag ang pagkahalangdon”*+ sang Isa nga nagtawag sa inyo halin sa kadudulman pakadto sa iya makatilingala nga kapawa.+
10 Kay sadto indi kamo katawhan sang Dios, apang karon katawhan na niya kamo;+ wala kamo sadto ginpakitaan sing kaluoy, apang karon ginkaluy-an na kamo.+
11 Mga hinigugma, ginalaygayan ko kamo subong mga dumuluong kag umalagi nga mga pumuluyo+ nga padayon kamo nga maglikaw sa undanon nga mga kailigbon,+ nga nagapakig-away sa inyo.*+
12 Hupti nga maayo ang inyo paggawi sa tunga sang mga pungsod,+ agod bisan patupatuan nila kamo nga malinapason, masaksihan nila ang inyo maayong mga buhat,+ kag subong resulta, himayaon nila ang Dios sa adlaw sang iya pag-usisa.
13 Tungod sa Ginuo magpasakop kamo sa tanan nga awtoridad nga ginhimo sang tawo,+ sa hari man+ subong pinakamataas nga awtoridad
14 ukon sa mga gobernador nga ginpadala niya sa pagsilot sa mga nagahimo sang malaut apang sa pagdayaw sa mga nagahimo sang maayo.+
15 Kay kabubut-on sang Dios nga paagi sa paghimo sing maayo, mapahipos* ninyo ang indi makatarunganon nga mga tawo nga nagahambal sang mga butang nga wala nila mahibalui.+
16 Hilway kamo nga mga tawo,+ apang gamita ninyo ang inyo kahilwayan, indi subong tabon* sa paghimo sing malain,+ kundi subong mga ulipon sang Dios.+
17 Padunggi ninyo ang tanan nga sahi sang tawo,+ higugmaa ang tanan nga kauturan,*+ kahadluki ang Dios,+ padunggi ang hari.+
18 Ang mga alagad dapat magpasakop sa ila mga agalon upod ang nagakaigo nga kahadlok,+ indi lamang sa mga maayo kag makatarunganon, kundi sa mga mabudlay man pahamut-an.
19 Kay kalahamut-an ang isa kon nagabatas sia sang kabudlayan* kag nagaantos sing indi makatarunganon bangod sang iya pagtuman* sa Dios.+
20 Kay ano ang dalayawon kon ginsakit kamo bangod sang inyo sala kag ginabatas ninyo ini?+ Apang kon nagabatas kamo sang pag-antos bangod sa paghimo sing maayo, kalahamut-an ini sa Dios.+
21 Sa katunayan, gintawag kamo sa sini nga dalanon, bangod ang Cristo mismo nag-antos tungod sa inyo,+ nga nagabilin sang huwaran agod sundon ninyo sing maayo ang iya mga tikang.+
22 Wala sia sing nahimo nga sala,+ kag wala man sia nagpanglimbong.+
23 Sang ginainsulto* sia,+ wala sia magbalos.+ Sang nagaantos sia,+ wala sia magpamahog, kundi ginsalig niya ang iya kaugalingon sa Isa nga nagahukom+ sing matarong.
24 Gindala niya sa usok*+ ang aton mga sala+ paagi sa iya kaugalingon nga lawas, agod madula na ang aton mga sala kag magkabuhi kita sa pagkamatarong. Kag “nag-ayo kamo paagi sa iya mga pilas.”+
25 Kay kaangay kamo sadto sa mga karnero nga nagtalang,+ apang karon nagbalik na kamo sa manugbantay+ kag manugtatap sang inyo kalag.*
Footnote
^ Ukon “puro.”
^ Ukon “naeksperiensiahan.”
^ Sa literal, “mahuy-an.”
^ Sa literal, “ang ulo sang pamusod.”
^ Sa literal, “pagkaayo,” ang iya dalayawon nga mga kinaiya kag binuhatan.
^ Ukon “kalag.”
^ Sa literal, “mabusalan.”
^ Ukon “balibad.”
^ Sa literal, “ang paghiliutod.”
^ Ukon “kasubo; kasakit.”
^ Sa literal, “konsiensia.”
^ Ukon “ginayaguta.”
^ Ukon “kahoy.”
^ Ukon “kabuhi.”
