1 Samuel 21:1-15
21 Sang ulihi, nagkadto si David kay Ahimelec nga saserdote sa Nob.+ Nagkurog sa kahadlok si Ahimelec sang makita niya si David, kag namangkot sia: “Ngaa isa ka lang kag ngaa wala ka sing upod?”+
2 Nagsabat si David kay Ahimelec nga saserdote: “May ginsugo sa akon ang hari, apang nagsiling sia, ‘Wala sing dapat makahibalo kon ngaa ginpadala ko ikaw sa sini nga misyon kag kon ano ang ginsugo ko sa imo.’ May kasugtanan kami sang akon mga tinawo nga makit-anay sa isa ka lugar.
3 Kon may lima ka dira ka tinapay ukon bisan ano nga makaon, ihatag ina sa akon.”
4 Apang nagsabat ang saserdote kay David: “Wala ako diri sing ordinaryo nga tinapay, kundi balaan nga tinapay+ lamang. Ihatag ko ini kon ang imo mga tinawo wala maghulid sa mga babayi.”*+
5 Nagsiling si David sa saserdote: “Wala kami nagahulid sa mga babayi kon nagalakat kami agod magpakig-away.+ Bisan kinaandan lang ang amon misyon, nagapabilin nga balaan ang akon mga tinawo. Daw ano pa gid ayhan subong nga pinasahi ang amon misyon!”
6 Gani ginhatag sang saserdote sa iya ang balaan nga tinapay,+ kay wala na sing iban nga tinapay kundi ang dulot nga tinapay lamang nga ginkuha sa atubangan ni Jehova agod islan sing bag-o nga tinapay sang adlaw nga ginkuha ini.
7 Sadto nga tion, ang isa sa mga alagad ni Saul nagpabilin sa atubangan ni Jehova. Sia si Doeg+ nga Edominhon,+ nga nagadumala sa mga manugbantay sang karnero ni Saul.
8 Dayon nagsiling si David kay Ahimelec: “May bangkaw ukon espada ka bala diri? Wala ko madala ang akon espada ukon mga hinganiban, bangod hilingagawon gid ang misyon nga ginsugo sang hari.”
9 Nagsabat ang saserdote: “Yari diri ang espada ni Goliat+ nga Filistinhon nga imo ginpatay sa Nalupyakan* sang Elah.+ Naputos ini sa tela sa likod sang efod.+ Kon luyag mo ini, kuhaa ini, kay wala na sing iban pa diri.” Nagsiling si David: “Wala sing pareho sina. Ihatag ina sa akon.”
10 Sina nga adlaw nagpadayon si David sa pagpalagyo+ kay Saul, kag sang ulihi, nakalab-ot sia kay Hari Akis sang Gat.+
11 Ang mga alagad ni Akis nagsiling sa iya: “Indi bala si David ini nga hari sa Israel? Indi bala nga tungod sa iya nagsinaot sila kag nag-amba sing,
‘Linibo ang napatay ni Saul,Apang ang kay David tignapulo ka libo’?”+
12 Ginhunahuna ni David ang ila ginhambal, kag hinadlukan gid sia+ kay Hari Akis sang Gat.
13 Gani nagpakunokuno sia nga buang+ sa atubangan nila.* Ginakuriskurisan niya ang mga puertahan sang siudad kag ginapatulo niya ang iya laway sa iya bungot.
14 Sang ulihi, nagsiling si Akis sa iya mga alagad: “Nakita na gid ninyo nga buang ini nga tawo! Ngaa gindala pa ninyo sia sa akon?
15 Kulang pa bala ang buang diri, amo nga magdala pa kamo sing isa sa atubangan ko? Dapat bala pasudlon ini nga tawo sa akon balay?”
Footnote
^ Ukon “tinawo nagpalayo sa mga babayi.”
^ Ukon “Manubo nga Patag.”
^ Sa literal, “sa ila kamot.”
