1 Samuel 5:1-12
5 Sang naagaw sang mga Filistinhon ang Kaban+ sang matuod nga Dios, gindala nila ini halin sa Ebenezer pakadto sa Asdod.
2 Dayon gindala sang mga Filistinhon ang Kaban sang matuod nga Dios sa templo* ni Dagon kag ginbutang ini sa tupad ni Dagon.+
3 Sang masunod nga adlaw, temprano pa nga nagbangon ang mga Asdodnon kag nakita nila nga natumba ang estatwa ni Dagon nga nagahapaon sa atubangan sang Kaban ni Jehova.+ Gani ginkuha nila si Dagon kag ginbalik sa iya nahamtangan.+
4 Pagkadason nga adlaw, sang nagbangon sila sing temprano pa, nakita nila liwat nga natumba ang estatwa ni Dagon nga nagahapaon sa atubangan sang Kaban ni Jehova. Nautod ang ulo ni Dagon kag ang iya duha ka kamot, kag yara na ini sa atangan sang templo. Ang daw isda nga bahin lamang sang iya lawas* ang nabilin.
5 Amo kon ngaa ang mga saserdote ni Dagon kag ang tanan nga nagasulod sa iya templo wala nagatapak sa atangan sang templo ni Dagon sa Asdod tubtob sini nga adlaw.
6 Ginsilutan ni Jehova ang mga Asdodnon, kag ginhalitan niya sila kag gintubuan sing almoranas ang mga nagaistar sa Asdod kag sa mga teritoryo sini.+
7 Sang makita sang mga lalaki sang Asdod ang nagakatabo, nagsiling sila: “Indi dapat magpabilin sa aton ang Kaban sang Dios sang Israel, kay ginsilutan niya kita kag si Dagon nga aton dios.”
8 Gani ginpatawag nila kag gintipon ang tanan nga ginuo sang mga Filistinhon kag ginpamangkot sila: “Ano ang himuon naton sa Kaban sang Dios sang Israel?” Nagsabat sila: “Dalha ang Kaban sang Dios sang Israel sa Gat.”+ Gani gindala nila didto ang Kaban sang Dios sang Israel.
9 Sang gindala nila ini didto, ginsilutan ni Jehova ang siudad kag nagsalasala ang mga tawo didto. Ginsilutan niya ang tanan nga tawo sa siudad kag gintubuan sila sing almoranas.+
10 Gani gindala nila sa Ekron+ ang Kaban sang matuod nga Dios. Apang sang nag-abot sa Ekron ang Kaban sang matuod nga Dios, nagsinggit ang mga Ekronhon: “Gindala nila sa aton ang Kaban sang Dios sang Israel agod patyon kita kag ang aton katawhan!”+
11 Dayon ginpatawag nila kag gintipon ang tanan nga ginuo sang mga Filistinhon kag nagsiling sila: “Ipalayo ninyo diri ang Kaban sang Dios sang Israel. Ibalik ini sa nahamtangan sini agod indi kami mapatay kag ang amon katawhan.” Kay nahadlok gid ang tanan nga pumuluyo sang siudad nga mapatay sila; ginsilutan sila sang matuod nga Dios didto,+
12 kag ang mga tawo nga wala mapatay gintubuan sing almoranas. Kag ang pagpangayo sing bulig sang mga pumuluyo sang siudad nakalab-ot sa langit.
