1 Timoteo 4:1-16
4 Apang, ang balaan nga espiritu nagasiling nga sa ulihi nga mga tion ang iban magabiya sa pagtuo. Magapamati sila sa mga mensahe nga kuno naghalin sa Dios,+ subong man sa panudlo sang mga demonyo.
2 Bangod ini sa kabutigan nga ginatudlo sang mga salimpapaw,+ nga ang konsiensia nakibulan kaangay sang panit nga ginpaso sang nagabaga nga salsalon.
3 Ginadumili nila ang pagpangasawa+ kag ginasugo ang mga tawo nga likawan ang mga kalan-on+ nga gintuga sang Dios nga kaunon+ nga may pagpasalamat sang mga may pagtuo+ kag sibu nga ihibalo sa kamatuoran.
4 Bangod ang tagsa ka tinuga sang Dios maayo,+ kag wala sing dapat isikway+ kon ginabaton ini nga may pagpasalamat,
5 kay ginapakabalaan ini paagi sa pulong sang Dios kag pangamuyo para sa sini.
6 Paagi sa paghatag mo sini nga laygay sa mga kauturan mangin maayo ka nga ministro ni Cristo Jesus, isa nga gintudluan paagi sa mga pulong sang pagtuo kag sang maayong panudlo nga ginasunod mo sing maayo.+
7 Indi pagpamatii ang butig nga mga sugilanon nga nagapakahuya sa Dios,+ subong sang ginasugid sang tigulang nga mga babayi. Sa baylo, hanasa ang imo kaugalingon nga ang imo tulumuron amo ang diosnon nga debosyon.
8 Kay ang paghanas sa pisikal* may diutay nga kapuslanan, apang ang diosnon nga debosyon mapuslanon sa tanan nga butang, kay nagasaad ini sang kabuhi karon kag sang kabuhi sa palaabuton.+
9 Ini nga pinamulong masaligan kag takus nga patihan sing bug-os.
10 Ini ang rason nga nagapangabudlay kita sing lakas kag nagapanikasog,+ bangod ginpahamtang naton ang aton paglaum sa buhi nga Dios, nga amo ang Manluluwas+ sang tanan nga sahi sang tawo,+ ilabi na sang mga matutom.
11 Padayon nga isugo kag ipanudlo ini.
12 Indi pagtuguti nga may magpakanubo sang imo pagkapamatan-on. Sa baylo, mangin halimbawa ka sa mga matutom sa imo paghambal, paggawi, gugma, pagtuo, kag katinlo.*
13 Mag-ukod ka sa pagbasa sing dayag,+ sa paglaygay,* kag sa pagpanudlo tubtob nga mag-abot ako.
14 Indi pagpatumbayai ang imo dulot nga ginhatag sa imo paagi sa tagna sang gintungtong sang hubon sang mga gulang ang ila kamot sa imo.+
15 Hunahunaa sing maayo* ini nga mga butang; mag-ukod sa sini, agod ang imo pag-uswag makita sang tanan nga tawo.
16 Hatagi sang dalayon nga igtalupangod ang imo kaugalingon kag ang imo panudlo.+ Himua sing padayon ini nga mga butang, kay sa paghimo sini maluwas mo ang imo kaugalingon kag ang mga nagapamati sa imo.+
