2 Cronica 12:1-16
12 Sang naglig-on na ang paghari ni Rehoboam+ kag nangin gamhanan na sia, ginsikway niya kag sang bug-os nga Israel ang Kasuguan ni Jehova.+
2 Sang ikalima nga tuig sang paggahom ni Hari Rehoboam, ginsalakay ni Hari Sisak+ sang Egipto ang Jerusalem, kay indi sila matutom kay Jehova.
3 May 1,200 sia ka kangga kag 60,000 ka manugkabayo, kag indi maisip nga mga soldado nga Libyanhon, Sukiim, kag Etiopianhon nga nag-upod sa iya halin sa Egipto.+
4 Naagaw niya ang mga siudad nga may mabakod nga depensa sang Juda kag sang ulihi nakalab-ot sia sa Jerusalem.
5 Nagkadto si Semaias+ nga manalagna kay Rehoboam kag sa mga pangulo sang Juda nga nagtipon sa Jerusalem tungod sa kahadlok kay Sisak. Nagsiling sia sa ila: “Amo ini ang ginsiling ni Jehova, ‘Ginbayaan ninyo ako, gani pabay-an ko man kamo+ sa kamot ni Sisak.’ ”
6 Bangod sini, nagpaubos ang mga pangulo sang Israel kag ang hari,+ kag nagsiling sila: “Matarong si Jehova.”
7 Sang makita ni Jehova nga nagpaubos sila, nagsiling si Jehova kay Semaias: “Nagpaubos sila. Indi ko sila paglaglagon,+ kag sa indi madugay luwason ko sila. Indi mag-abot ang akon kaakig sa Jerusalem paagi kay Sisak.
8 Apang mangin alagad niya sila, agod mahibaluan nila ang kinatuhayan sang pag-alagad sa akon kag sang pag-alagad sa mga hari* sang iban nga kadutaan.”
9 Gani ginsalakay ni Hari Sisak sang Egipto ang Jerusalem. Ginkuha niya ang mga bahandi sa balay ni Jehova+ kag ang mga bahandi sa balay* sang hari. Ginkuha niya ang tanan, pati ang mga taming nga bulawan nga ginpahimo ni Solomon.+
10 Gani naghimo si Hari Rehoboam sing mga taming nga saway nga ibulos sa sini, kag gintugyan niya ini sa mga pangulo sang mga bantay* sa puertahan sang balay sang hari.
11 Kon magkadto ang hari sa balay ni Jehova, nagakadto man ang mga bantay kag ginadala nila ini, dayon ginabalik man nila ini sa kuarto sang mga bantay.
12 Bangod nagpaubos ang hari, nadula ang kaakig ni Jehova sa iya,+ kag wala niya sila ginlaglag sing bug-os.+ Kag may maayo man nga mga butang nga nasapwan sa Juda.+
13 Ginpalig-on ni Hari Rehoboam ang iya paggahom sa Jerusalem kag padayon sia nga naghari. Si Rehoboam nagaedad sing 41 ka tuig sang nangin hari sia, kag naggahom sia sing 17 ka tuig sa siudad sang Jerusalem nga ginpili ni Jehova sa tanan nga tribo sang Israel nga butangan sang iya ngalan. Ang iloy sang hari amo si Naama nga Ammonhon.+
14 Apang ginhimo niya ang malain, kay wala sia magpamat-od sa iya tagipusuon nga pangitaon si Jehova.+
15 Tuhoy sa mga natabo sa kabuhi ni Rehoboam, halin sa umpisa tubtob sa katapusan, indi bala nga nasulat ini sa mga sinulatan ni Semaias+ nga manalagna kag ni Iddo+ nga nagasugid sang mga palanan-awon, suno sa listahan sang kaliwatan? Pirme sadto may inaway sa tunga ni Rehoboam kag ni Jeroboam.+
16 Sang ulihi, napatay si Rehoboam pareho sang iya mga katigulangan kag ginlubong sia sa Siudad ni David.+ Si Abias+ nga iya anak amo ang nagbulos sa iya bilang hari.
