2 Cronica 19:1-11
19 Nagpauli si Hari Jehosapat sang Juda sa iya balay* sa Jerusalem nga luwas sa katalagman.*+
2 Si Jehu+ nga anak ni Hanani+ nga nagasugid sang mga palanan-awon nagpakigkita kay Hari Jehosapat kag nagsiling sia: “Ang malaut bala ang dapat mo buligan,+ kag ang nagadumot bala kay Jehova ang dapat mo higugmaon?+ Bangod sini, naakig si Jehova sa imo.
3 Apang, may maayo nga nakita ang Dios sa imo,+ bangod ginkuha mo ang sagrado nga mga poste* sa kadutaan kag ginhanda mo ang imo tagipusuon* sa pagpangita sa matuod nga Dios.”+
4 Padayon nga nag-istar si Jehosapat sa Jerusalem, kag nagkadto sia liwat sa katawhan, halin sa Beer-seba tubtob sa kabukiran sang Efraim,+ agod pabalikon sila kay Jehova nga Dios sang ila mga katigulangan.+
5 Nagtangdo man sia sing mga hukom sa tanan nga siudad nga may mabakod nga depensa sa bug-os nga Juda.+
6 Nagsiling sia sa mga hukom: “Talupangda ninyo sing maayo ang inyo ginahimo, kay nagahukom kamo indi para sa mga tawo kundi para kay Jehova, kag kaupod ninyo sia sa inyo paghukom.+
7 Gani magkahadlok kamo kay Jehova.+ Maghalong kamo sa inyo ginahimo, kay wala sing inhustisya kay Jehova nga aton Dios+, wala sia sing ginapasulabi,+ kag wala sia nagabaton sing hamham.”+
8 Nagtangdo man si Jehosapat sa Jerusalem sing pila ka Levinhon kag mga saserdote kag sing pila ka ulo sang mga panimalay ni Israel, agod maghukom para kay Jehova kag agod maghusay sing mga kaso sang mga pumuluyo sang Jerusalem.+
9 Dayon ginsugo niya sila: “Amo ini ang himuon ninyo sing matutom kag sing bug-os* tagipusuon, nga may kahadlok kay Jehova:
10 Kon ang inyo mga utod nga nagaistar sa ila mga siudad magpahusay sing kaso may kaangtanan sa pagpaagay sing dugo+ ukon may kaangtanan sa kasuguan, sa sugo, sa pagsulundan, ukon sa paghukom, paandaman ninyo sila agod indi sila makasala kay Jehova; kay kon indi, maakig sia sa inyo kag sa inyo mga utod. Amo ini ang himuon ninyo, agod indi kamo makahimo sing sala.
11 Si Amarias nga puno nga saserdote amo ang magadumala sa mga butang may kaangtanan sa pag-alagad kay Jehova.+ Si Zebadias nga anak ni Ismael kag lider sang panimalay ni Juda amo ang magadumala sa mga butang may kaangtanan sa hari. Kag ang mga Levinhon amo ang magadumala sa inyo. Magpakaisog kamo sa paghimo sang inyo katungdanan, kag kabay pa nga si Jehova magaupod sa mga nagahimo sang maayo.”*+
Footnote
^ Ukon “palasyo.”
^ Ukon “nga may paghidait.”
^ Ukon “kag determinado ang imo tagipusuon.”
^ Ukon “kag may bug-os debosyon nga.”
^ Ukon “magaupod sa maayo.”
