2 Cronica 2:1-18
-
Templo, ginhanda nga patindugon (1-18)
2 Dayon nagsugo si Solomon nga patindugon na ang balay para sa kadungganan sang ngalan ni Jehova+ kag ang balay* para sa iya ginharian.+
2 Nagpili si Solomon sing 70,000 ka trabahador,* 80,000 ka manugbasbas sing bato sa bukid,+ kag 3,600 ka porman nga magadumala sa ila.+
3 Nagpadala sing mensahe si Solomon kay Hiram+ nga hari sang Tiro: “Himua man sa akon ang ginhimo mo kay David nga akon amay sang nagpadala ka sa iya sing kahoy nga sedro sa pagpatindog sang balay* nga ilistaran.+
4 Mapatindog ako sing balay para sa kadungganan sang ngalan ni Jehova nga akon Dios, agod pakabalaanon ini para sa iya, agod magsunog sing mahamot nga incienso+ sa atubangan niya, agod magbutang sing nagatangkas nga tinapay,*+ kag agod maghalad sing mga dulot nga sinunog sa aga kag sa gab-i,+ sa mga Adlaw nga Inugpahuway,+ kag sa tion sang lati+ kag sang mga kapiestahan+ ni Jehova nga amon Dios. Obligasyon ini sang Israel tubtob san-o.
5 Daku gid ang balay nga patindugon ko, kay ang amon Dios mas gamhanan sangsa iban nga mga dios.
6 Sin-o ang may ikasarang sa pagpatindog sing balay para sa iya? Kay sa langit mismo, bisan sa pinakamataas nga langit indi sia makaigo,+ gani sin-o gid bala ako nga magpatindog sing balay para sa iya? Ang mapatindog ko lang amo ang balay para sa pagpaaso sing mga halad sa iya atubangan.
7 Gani padalhi ako sing isa ka tawo nga sampaton mag-obra sa bulawan, pilak, saway,+ salsalon, purpura* nga de-lana, kag pula kag asul nga hilo, kag makahibalo magtigib sing mga dekorasyon. Magaobra sia sa Juda kag sa Jerusalem upod sa akon sampaton nga mga manug-obra, nga ginpili ni David nga akon amay.+
8 Padalhi man ako sing mga kahoy nga sedro, junipero,+ kag algum+ halin sa Lebanon, kay nahibaluan ko nga ang imo mga alagad sampaton sa pagpang-utod sing mga kahoy sa Lebanon.+ Magaobra ang akon mga alagad upod sa imo mga alagad+
9 sa paghanda sing madamo gid nga kahoy para sa akon, kay daku gid ang balay nga patindugon ko.
10 Hatagan ko ang imo mga alagad+ nga nagapang-utod sing mga kahoy sing 20,000 ka cor* nga trigo, 20,000 ka cor nga sebada, 20,000 ka bat* nga alak, kag 20,000 ka bat nga lana.”
11 Amo ini ang nasulat nga mensahe nga ginpadala ni Hiram nga hari sang Tiro kay Solomon: “Bangod ginahigugma ni Jehova ang iya katawhan, ikaw ang ginhimo niya nga hari nila.”
12 Dayon nagsiling si Hiram: “Kabay pa nga dayawon si Jehova nga Dios sang Israel, nga naghimo sang langit kag duta, bangod ginhatagan niya si Hari David sing maalam nga anak+ nga may ihibalo kag paghangop,+ kag amo ang magapatindog sing balay para kay Jehova kag sing balay para sa iya ginharian.
13 Ipadala ko sa imo si Hiram-abi, nga isa ka sampaton kag eksperto nga manug-obra.+
14 Ang iya iloy halin sa kaliwat ni Dan apang ang iya amay taga-Tiro. Sampaton sia mag-obra sa bulawan, pilak, saway, salsalon, bato, kahoy, purpura nga de-lana, asul nga hilo, pula nga tela, kag maayo nga klase sang tela.+ Sampaton man sia sa pagtigib sang tanan nga sahi sang dekorasyon kag sa paghimo sang bisan ano nga desinyo nga ipahimo sa iya.+ Magaobra sia upod sa imo sampaton nga mga manug-obra kag upod sa sampaton nga mga manug-obra sang akon ginuo nga si David nga imo amay.
15 Gani ipadala ang trigo, sebada, lana, kag alak nga ginpangako niya sa iya mga alagad.+
16 Utdon namon ang bisan ano kadamo nga kahoy sa Lebanon+ nga kinahanglan mo, kag pangtabiron namon ini nga daw mga balsa kag palutawon sa dagat pakadto sa Joppe.+ Dayon dalhon mo ini sa Jerusalem.”+
17 Dayon gin-isip ni Solomon ang tanan nga lalaki nga dumuluong nga pumuluyo sa duta sang Israel,+ subong sang ginhimo ni David nga iya amay,+ kag 153,600 sila tanan.
18 Gani ginhimo niya ang 70,000 sa ila nga mga trabahador,* ang 80,000 nga mga manugbasbas sing bato+ sa bukid, kag ang 3,600 nga porman nga magdumala sa pag-obra sang mga tawo.+
Footnote
^ Ukon “palasyo.”
^ Ukon “manugpas-an sing lulan.”
^ Ukon “palasyo.”
^ Dulot nga tinapay.
^ Ang kolor nga purpura kombinasyon sang pula kag asul.
^ Ang isa ka cor katumbas sang 220 ka litro. Tan-awa ang Apendise B14.
^ Ang isa ka bat katumbas sang 22 ka litro (5.81 ka galon). Tan-awa ang Apendise B14.
^ Ukon “manugpas-an sing lulan.”
