2 Cronica 23:1-21
23 Sang ikapito nga tuig, nagpakaisog si Jehoiada kag naghimo sia sing kasugtanan* sa mga pangulo sang ginatos,+ nga amo si Azarias nga anak ni Jeroham, si Ismael nga anak ni Jehohanan, si Azarias nga anak ni Obed, si Maaseias nga anak ni Adaya, kag si Elisafat nga anak ni Zikri.
2 Dayon naglibot sila sa bug-os nga Juda kag gintipon nila ang mga Levinhon+ sa tanan nga siudad sang Juda kag ang mga pangulo sang mga panimalay ni Israel. Pag-abot nila sa Jerusalem,
3 nagpakigkatipan+ ang bug-os nga katilingban sa hari sa balay sang matuod nga Dios, kag nagsiling si Jehoiada sa ila:
“Ang anak sang hari ang magahari, suno sa ginsaad ni Jehova tuhoy sa mga anak ni David.+
4 Amo ini ang himuon ninyo: Bahinon ninyo sa tatlo ka grupo ang mga saserdote kag ang mga Levinhon nga magabantay+ sa Adlaw nga Inugpahuway. Ang isa ka grupo magabantay sa mga puertahan.+
5 Ang isa pa ka grupo magabantay sa balay* sang hari,+ kag ang isa pa gid ka grupo magabantay sa Gawang sang Pundasyon, samtang ang iban pa nga katawhan yara sa mga luwang sang balay ni Jehova.+
6 Indi ninyo pagpasudlon ang bisan sin-o sa balay ni Jehova luwas lang sa mga saserdote kag mga Levinhon nga nagaalagad+ didto. Makasulod sila bangod balaan sila nga grupo, kag dapat tumanon sang iban pa nga katawhan ang ila katungdanan kay Jehova.
7 Palibutan sang mga Levinhon ang hari kag dapat may armas ang kada isa sa ila. Patyon ang bisan sin-o nga magsulod sa balay. Sundan ninyo ang hari bisan diin sia magkadto.”*
8 Ginhimo sang mga Levinhon kag sang bug-os nga Juda ang ginsugo ni Jehoiada nga saserdote. Gintipon sang kada isa sa ila ang iya mga tinawo nga nagabantay kon Adlaw nga Inugpahuway, pati ang mga wala nagabantay kon Adlaw nga Inugpahuway,+ kay ginpabantay ni Jehoiada nga saserdote ang mga grupo+ bisan indi na nila turno.
9 Dayon ginhatagan ni Jehoiada nga saserdote ang mga pangulo sang ginatos+ sing mga bangkaw kag sing gamay nga mga taming* kag sing tipulon nga mga taming nga iya ni Hari David,+ nga yara sa balay sang matuod nga Dios.+
10 Dayon ginpapuesto niya sa palibot sang hari ang tanan nga katawhan nga ang kada isa may armas, halin sa tuo nga bahin sang balay tubtob sa wala nga bahin sang balay, malapit sa halaran kag sa balay.
11 Dayon ginpagua nila ang anak sang hari+ kag ginbutang sa iya ulo ang korona* kag ang Pamatuod*+ kag ginhimo sia nga hari, kag ginhaplasan sia ni Jehoiada kag sang iya mga anak. Dayon nagsinggit sila: “Mabuhi ang hari!”+
12 Sang mabatian ni Atalia ang ginahod sang mga tawo nga nagadinalagan kag nagadayaw sa hari, nagkadto sia dayon sa katawhan sa balay ni Jehova.+
13 Dayon nakita niya ang hari nga nagatindog malapit sa haligi sa gawang. Kaupod sang hari ang mga pangulo+ kag ang mga manugtrumpeta, kag ang tanan nga katawhan nagakinasadya+ kag nagapatunog sing mga trumpeta, kag ang mga manug-amba nga nagatokar sing mga instrumento sa musika amo ang nagadumala* sa pagdayaw. Bangod sini, gingisi ni Atalia ang iya mga bayo kag nagsiling sia: “Mga maluib! Mga maluib!”
14 Apang ginpagua ni Jehoiada nga saserdote ang mga pangulo sang ginatos nga nagadumala sa mga soldado, kag ginsugo niya sila: “Kuhaa ninyo sia kag ipalayo ninyo sia diri. Patya ninyo paagi sa espada ang bisan sin-o nga magsunod sa iya!” Kay nagsiling ang saserdote: “Indi ninyo sia pagpatya sa balay ni Jehova.”
15 Gani gindakop nila sia, kag gindala sia sa Gawang sang Kabayo sa balay* sang hari, kag ginpatay nila sia dayon didto.
16 Dayon nagpakigkatipan si Jehoiada sa tanan nga katawhan kag sa hari, nga magapabilin sila nga katawhan ni Jehova.+
17 Pagkatapos sini, nagkadto ang tanan nga katawhan sa templo* ni Baal kag ginguba nila ini,+ kag gindugmok nila ang iya mga halaran kag mga imahen.+ Ginpatay man nila si Matan nga saserdote ni Baal+ sa atubangan sang mga halaran.
18 Dayon ginpadumala ni Jehoiada sa balay ni Jehova ang mga saserdote kag ang mga Levinhon, nga gingrupo ni David sa balay ni Jehova agod maghalad sing mga halad nga sinunog para kay Jehova+ suno sa nasulat sa Kasuguan ni Moises,+ nga may pagsinadya kag ambahanon, suno sa ginsugo ni* David.
19 Ginpapuesto man niya ang mga manugbantay sa mga gawang+ sang balay ni Jehova agod wala sing makasulod nga indi matinlo sa bisan ano nga paagi.
20 Dayon gin-upod niya ang mga pangulo sang ginatos,+ ang mga dungganon, ang mga pangulo sang katawhan, kag ang tanan nga katawhan sini nga duta, kag gin-updan nila ang hari halin sa balay ni Jehova. Nag-agi sila sa naibabaw nga gawang sang balay* sang hari kag ginpapungko ang hari sa trono+ sang ginharian.+
21 Gani nagkinasadya ang tanan nga katawhan sini nga duta kag nangin malinong ang siudad, kay ginpatay nila si Atalia paagi sa espada.
Footnote
^ Ukon “katipan.”
^ Ukon “palasyo.”
^ Sa literal, “kon maggua sia kag kon magsulod sia.”
^ Masami nga ginagamit sang mga manugpana.
^ Mahimo nagapatuhoy sa linukot nga nagaunod sang Kasuguan sang Dios.
^ Ukon “diadema.”
^ Ukon “nagahatag sing sinyales.”
^ Ukon “palasyo.”
^ Sa literal, “balay.”
^ Sa literal, “paagi sa mga kamot ni.”
^ Ukon “palasyo.”
