2 Cronica 28:1-27
28 Nagaedad si Ahaz+ sing 20 ka tuig sang nangin hari sia, kag naggahom sia sa Jerusalem sing 16 ka tuig. Wala niya ginhimo ang matarong sa panulok ni Jehova, indi pareho sa ginhimo ni David nga iya katigulangan.+
2 Sa baylo, ginhimo man niya ang ginhimo sang mga hari sang Israel,+ kag naghimo pa sia sing metal nga mga estatwa*+ sang mga Baal.
3 Nagpaaso man sia sing mga halad sa Nalupyakan sang mga Anak ni Hinom* kag ginsunog niya ang iya mga anak+ bilang halad, pareho sa makangilil-ad nga mga butang nga ginahimo sang mga pungsod+ nga gintabog ni Jehova sa atubangan sang mga Israelinhon.
4 Padayon man sia nga naghalad kag nagpaaso sing mga halad sa sagrado nga mataas nga mga duog,+ sa mga bakulod, kag sa idalom sang tagsa ka madabong nga kahoy.+
5 Gani gintugyan sia ni Jehova nga iya Dios sa kamot sang hari sang Siria.+ Ginpierde nila sia kag madamo ang ila nabihag nga gindala nila sa Damasco.+ Gintugyan man sia sa kamot sang hari sang Israel, kag madamo ang iya ginpatay sa ila.
6 Ginpamatay ni Peka+ nga anak ni Remalias ang 120,000 ka maisog nga lalaki sang Juda sa isa lang ka adlaw, bangod gintalikdan nila si Jehova nga Dios sang ila mga katigulangan.+
7 Ginpatay ni Zikri nga soldado nga Efraimnon, si Maaseias nga anak sang hari kag si Azrikam nga nagadumala sa palasyo,* kag si Elkana nga ikaduha sa hari.
8 Ginbihag man sang mga Israelinhon ang 200,000 sa ila mga utod, mga babayi, kag mga anak nga lalaki kag babayi. Madamo gid nga pagkabutang ang ila man ginpanguha, kag gindala nila ini sa Samaria.+
9 Apang didto sadto ang manalagna ni Jehova nga si Oded. Ginsugata niya ang mga soldado nga nagapakadto sa Samaria kag nagsiling sia sa ila: “Gintugyan sa inyo ni Jehova nga Dios sang inyo mga katigulangan ang Juda bangod naakig sia sa ila.+ Ginpamatay ninyo sila tungod sa daku nga kaakig. Sobra gid ang inyo kapintas amo nga nakita ini sang Dios.
10 Kag karon luyag ninyo nga himuon nga inyo mga alagad nga lalaki kag alagad nga babayi+ ang katawhan sang Juda kag Jerusalem. Apang, indi bala nga may sala man kamo kay Jehova nga inyo Dios?
11 Magpamati kamo sa akon kag ibalik ninyo ang mga ginbihag ninyo sa inyo mga utod, kay naakig gid si Jehova sa inyo.”
12 Bangod sini, ang pila ka pangulo sang mga Efraimnon, si Azarias nga anak ni Jehohanan, si Berequias nga anak ni Mesillemot, si Jehizkias nga anak ni Sallum, kag si Amasa nga anak ni Hadlai, nagpamatok sa mga nag-abot halin sa inaway.
13 Nagsiling sila sa ila: “Indi ninyo pagdalha diri ang mga bihag, kay makasala gid kita kay Jehova. Madugangan pa ang aton sala kon himuon ninyo ina. Madamo na ang aton sala kag naakig gid sia sa Israel.”
14 Gani gintugyan sang mga soldado ang mga bihag kag ang mga inagaw+ sa mga pangulo kag sa bug-os nga katilingban.
15 Dayon ginkuha sang gintangdo nga mga lalaki ang mga bihag kag ginhatagan nila sing mga bayo halin sa inagaw ang tanan nga wala sing bayo. Ginpabayuan nila sila kag ginhatagan sila sing mga sandalyas, pagkaon, ilimnon, kag sing inugbanyos nga lana. Ginpasakay man nila sa mga asno ang mga maluya kag gindala sila sa ila mga utod sa Jerico, ang siudad sang mga kahoy nga palma. Dayon nagbalik sila sa Samaria.
16 Nagpangayo sadto sing bulig si Hari Ahaz sa mga hari sang Asiria.+
17 Kag ginsalakay liwat sang mga Edominhon ang Juda kag ginbihag ang iban sa ila.
18 Ginsalakay man sang mga Filistinhon+ ang mga siudad sang Sepela+ kag ang Negeb nga sakop sang Juda kag nasakop nila ang Bet-semes,+ ang Aijalon,+ ang Gederot, ang Soco kag ang sakop* nga mga banwa sini, ang Timna+ kag ang sakop nga mga banwa sini, kag ang Gimzo kag ang sakop nga mga banwa sini. Dayon nag-istar sila didto.
19 Ginpaubos ni Jehova ang Juda tungod kay Hari Ahaz sang Israel, kay ginpabay-an niya nga magpatuyang ang Juda, gani nangin indi sia matutom kay Jehova.
20 Sang ulihi, ginsalakay sia ni Hari Tilgat-pilneser+ sang Asiria kag ginpabudlayan niya sia,+ sa baylo nga buligan sia.
21 Ginpanguha ni Ahaz ang mga pagkabutang sa balay ni Jehova kag sa balay* sang hari+ kag sa mga balay sang mga pangulo kag ginregalo niya ini sa hari sang Asiria, apang wala ini makabulig sa iya.
22 Sang ginabudlayan si Hari Ahaz, labi pa gid nga nangin indi sia matutom kay Jehova.
23 Naghalad sia sa mga dios sang Damasco+ nga nagsalakay sa iya,+ kag nagsiling sia: “Bangod ang mga hari sang Siria ginabuligan sang ila mga dios, magahalad ako sa ila agod buligan man nila ako.”+ Apang nangin kabangdanan ini sang iya pagkapukan kag sang bug-os nga Israel.
24 Gintipon man ni Ahaz ang mga kagamitan sa balay sang matuod nga Dios; dayon gindugmok niya ang mga kagamitan sa balay sang matuod nga Dios,+ kag ginsira niya ang mga puertahan sang balay ni Jehova,+ kag naghimo sia sing mga halaran para sa iya kaugalingon sa tanan nga pamusod sang dalan sa Jerusalem.
25 Naghimo sia sing sagrado nga mataas nga mga duog sa tanan nga siudad sang Juda agod magpaaso sing mga halad para sa iban nga mga dios.+ Bangod sini, naakig si Jehova nga Dios sang iya mga katigulangan.
26 Tuhoy sa iban pa nga natabo sa iya kabuhi, ang tanan niya nga ginhimo halin sa umpisa tubtob sa katapusan, nasulat ini sa Libro sang mga Hari sang Juda kag sang Israel.+
27 Sang ulihi, napatay si Ahaz pareho sang iya mga katigulangan, kag ginlubong nila sia sa siudad, sa Jerusalem, kay wala nila sia ginlubong sa lulubngan sang mga hari sang Israel.+ Si Ezequias nga iya anak amo ang nagbulos sa iya bilang hari.
Footnote
^ Ukon “hinurma nga mga estatwa.”
^ Sa literal, “balay.”
^ Ukon “sa palibot.”
^ Ukon “palasyo.”
