2 Cronica 29:1-36
29 Nangin hari si Ezequias+ sa edad nga 25 ka tuig, kag naggahom sia sa Jerusalem sing 29 ka tuig. Ang iya iloy amo si Abias nga anak ni Zacarias.+
2 Ginhimo niya ang matarong sa panulok ni Jehova,+ pareho sa ginhimo ni David nga iya katigulangan.+
3 Sa nahauna nga bulan sang nahauna nga tuig sang iya paggahom, ginbuksan niya ang mga puertahan sang balay ni Jehova kag ginkay-o ini.+
4 Dayon gintipon niya ang mga saserdote kag ang mga Levinhon sa plasa sa sidlangan.
5 Nagsiling sia sa ila: “Pamatii ninyo ako, kamo nga mga Levinhon. Pakabalaana ninyo ang inyo kaugalingon+ kag ang balay ni Jehova nga Dios sang inyo mga katigulangan, kag kuhaa ninyo ang indi matinlo nga mga diosdios sa balaan nga duog.+
6 Kay nangin indi matutom ang aton mga amay kag ginhimo nila ang malain sa panulok ni Jehova nga aton Dios.+ Ginbayaan nila sia kag wala nila gintahod ang tabernakulo ni Jehova kag gintalikdan nila sia.+
7 Ginsira man nila ang mga puertahan sang portiko+ kag wala nila ginpasiga ang mga suga.+ Wala na sila magsunog sing incienso+ kag wala na sila maghalad sing mga dulot nga sinunog+ para sa Dios sang Israel sa balaan nga duog.
8 Bangod sini, naakig si Jehova sa Juda kag Jerusalem,+ gani ginpahanabo niya nga mahadlok kag matingala kag managutsot* ang iban tungod sang natabo sa ila, subong sang inyo makita.+
9 Ginpatay ang aton mga katigulangan paagi sa espada,+ kag ginbihag ang aton mga anak nga lalaki kag babayi kag ang aton mga asawa.+
10 Gani, handum gid subong sang akon tagipusuon nga maghimo sing katipan kay Jehova nga Dios sang Israel,+ agod madula ang iya nagahingalayo nga kaakig sa aton.
11 Mga anak ko, indi ini ang tion nga magpatumbaya* kamo, kay ginpili kamo ni Jehova nga mag-alagad sa iya atubangan+ kag magpaaso sing mga halad.”+
12 Gani nagsugod dayon sa pagpanghikot ang mga Levinhon: sa mga Kohatnon,+ si Mahat nga anak ni Amasai kag si Joel nga anak ni Azarias; sa mga Merarinhon,+ si Kis nga anak ni Abdi kag si Azarias nga anak ni Jehalelel; sa mga Gersonhon,+ si Joa nga anak ni Zimma kag si Eden nga anak ni Joa;
13 sa mga anak ni Elizafan, si Simri kag si Jeuel; sa mga anak ni Asaf,+ si Zacarias kag si Matanias;
14 sa mga anak ni Heman,+ si Jehiel kag si Simei; kag sa mga anak ni Jedutun,+ si Semaias kag si Uzziel.
15 Dayon gintipon nila ang ila mga utod kag ginpakabalaan ang ila kaugalingon, kag nagkadto sila sa balay ni Jehova agod tinluan ini, suno sa ginsugo sang hari nga amo ang ginsiling ni Jehova.+
16 Nagsulod ang mga saserdote sa balay ni Jehova agod tinluan ini kag ginkuha nila ang tanan nga butang nga ginagamit sa pagsimba sa mga diosdios nga nakita nila sa templo ni Jehova kag gindala nila ini sa luwang+ sang balay ni Jehova. Dayon ginkuha ini sang mga Levinhon kag gindala nila ini sa gua sa Nalupyakan sang Kidron.+
17 Ginsugdan nila ang pagpakabalaan sa nahauna nga adlaw sang nahauna nga bulan, kag sa ikawalo nga adlaw sang bulan nakalab-ot sila sa portiko sang balay ni Jehova.+ Ginpakabalaan nila ang balay ni Jehova sa sulod sang walo pa ka adlaw, kag natapos nila ini sa ika-16 nga adlaw sang nahauna nga bulan.
18 Pagkatapos sini, nagkadto sila kay Hari Ezequias kag nagsiling sila: “Natinluan na namon ang bug-os nga balay ni Jehova, ang halaran sang halad nga sinunog+ kag ang tanan nga kagamitan sini,+ kag ang lamesa para sa nagatangkas nga tinapay*+ kag ang tanan nga kagamitan sini.
19 Ginhanda na namon kag ginpakabalaan+ ang tanan nga kagamitan nga ginpagua anay ni Hari Ahaz sa templo sang nagagahom sia kag nangin indi sia matutom,+ kag yara ini sa atubangan sang halaran ni Jehova.”
20 Aga pa nagbangon si Hari Ezequias kag gintipon niya ang mga pangulo sang siudad, kag nagkadto sila sa balay ni Jehova.
21 Nagdala sila sing pito ka toro nga baka, pito ka karnero nga lalaki, pito ka kordero nga lalaki, kag pito ka kanding nga lalaki bilang dulot tungod sa sala para sa ginharian, para sa santuaryo, kag para sa Juda.+ Ginsugo niya ang mga saserdote nga mga kaliwat ni Aaron nga ihalad ini sa halaran ni Jehova.
22 Dayon gin-ihaw nila ang baka,+ kag ginkuha sang mga saserdote ang dugo kag ginwisik nila ini sa halaran.+ Masunod nga gin-ihaw nila ang mga karnero nga lalaki kag ginwisik man nila ang dugo sa halaran, kag gin-ihaw man nila ang mga kordero nga lalaki kag ginwisik nila ang dugo sa halaran.
23 Dayon gindala nila ang mga kanding nga lalaki bilang dulot tungod sa sala sa atubangan sang hari kag sang katilingban kag gintungtong nila sa sini ang ila mga kamot.
24 Gin-ihaw ini sang mga saserdote kag ginhalad nila sa halaran ang dugo sini bilang dulot tungod sa sala sa pagtumbas para sa sala sang bug-os nga Israel, bangod nagsiling ang hari nga ang dulot nga sinunog kag ang dulot tungod sa sala para sa bug-os nga Israel.
25 Sa amo man nga tion, ginpatindog niya ang mga Levinhon sa balay ni Jehova nga may mga simbal, de-kuerdas nga mga instrumento, kag mga arpa,+ suno sa ginsugo ni David+ kag ni Gad+ nga nagasugid sang mga palanan-awon sang hari kag ni Natan+ nga manalagna, kay ini nga sugo ginhatag ni Jehova paagi sa iya mga manalagna.
26 Gani nagatindog ang mga Levinhon nga may mga instrumento ni David, kag ang mga saserdote nga may mga trumpeta.+
27 Dayon ginsugo ni Ezequias nga ihalad ang halad nga sinunog sa halaran.+ Sang ginsugdan ang paghalad sa dulot nga sinunog, nagsugod man ang pag-amba kay Jehova kag ang pagpatunog sing mga trumpeta, nga ginabagay sa pagtokar sa mga instrumento ni Hari David sang Israel.
28 Nagaduko ang bug-os nga katilingban samtang ginaamba ang ambahanon kag nagatunog ang mga trumpeta, tubtob natapos ang paghalad sa dulot nga sinunog.
29 Sang matapos na nila ang paghalad, nagduko kag nagyaub ang hari kag ang tanan nga upod niya.
30 Dayon ginsugo ni Hari Ezequias kag sang mga pangulo ang mga Levinhon nga dayawon nila si Jehova paagi sa mga ambahanon ni David+ kag ni Asaf+ nga nagasugid sing mga palanan-awon. Gani naghalad sila sing pagdayaw nga may daku nga kinasadya, kag nagduko sila kag nagyaub.
31 Dayon nagsiling si Ezequias: “Karon nga gintangdo na kamo bilang mga saserdote sa pag-alagad* kay Jehova, magdala kamo sing mga halad kag mga halad sa pagpasalamat sa balay ni Jehova.” Gani nagdala ang katilingban sing mga halad kag mga halad sa pagpasalamat, kag ang iban kinabubut-on nga nagdala man sing mga dulot nga sinunog.+
32 Ang kadamuon sang mga dulot nga sinunog nga gindala sang katilingban 70 ka baka, 100 ka karnero nga lalaki, kag 200 ka kordero nga lalaki. Tanan ini dulot nga sinunog para kay Jehova.+
33 Nagdala man sila sing iban pa nga balaan nga dulot nga 600 ka baka kag 3,000 ka karnero.
34 Apang diutay lamang ang mga saserdote, kag indi nila masarangan nga panitan ang tanan nga sapat para sa dulot nga sinunog. Gani ginbuligan sila sang ila mga utod nga mga Levinhon+ tubtob natapos ang hilikuton kag napakabalaan sang mga saserdote ang ila kaugalingon,+ kay mas nabalaka ang* mga Levinhon sa pagpakabalaan sang ila kaugalingon sangsa mga saserdote.
35 Madamo man ang dulot nga sinunog+ kag ang tambok sang mga halad sa pag-ambitanay,+ pati ang mga dulot nga ilimnon nga ginahalad upod sa mga dulot nga sinunog.+ Gani napasag-uli* ang pag-alagad sa balay ni Jehova.
36 Nagkasadya si Ezequias kag ang tanan nga katawhan tungod sang ginhimo sang matuod nga Dios para sa katawhan,+ kay madasig ini nga nahimo.
Footnote
^ Ukon “mangyaguta.”
^ Ukon “magpahuway.”
^ Dulot nga tinapay.
^ Sa literal, “Karon nga ginpuno na ninyo ang inyo kamot para.”
^ Sa literal, “mas matarong ang tagipusuon sang.”
^ Ukon “nahanda.”
