2 Cronica 31:1-21
31 Sang matapos nila ini tanan, ang tanan nga Israelinhon nga yadto didto nagkadto sa mga siudad sang Juda. Gindugmok nila ang sagrado nga mga haligi,+ gin-utod ang sagrado nga mga poste,*+ kag ginguba nila ang sagrado nga mataas nga mga duog+ kag ang mga halaran+ sa bug-os nga Juda kag Benjamin, pati sa Efraim kag sa Manases,+ tubtob nalaglag nila ini tanan. Dayon nagbalik ang tanan nga Israelinhon, ang kada isa sa iya ginapanag-iyahan sa ila mga siudad.
2 Dayon gintangdo ni Ezequias ang mga saserdote kag ang mga Levinhon sa ila mga grupo,+ ang kada isa suno sa ila katungdanan bilang mga saserdote kag mga Levinhon.+ Magahalad sila sing dulot nga sinunog kag mga halad sa pag-ambitanay, kag magaalagad sila, magapasalamat kag magadayaw sa Dios sa mga gawang sang mga luwang* ni Jehova.+
3 Ang isa ka bahin sang pagkabutang sang hari ginhatag para sa mga dulot nga sinunog,+ lakip ang mga ginahalad sa aga kag sa gab-i,+ kag ang mga dulot nga sinunog sa Adlaw nga Inugpahuway,+ sa tion sang lati,+ kag sa mga kapiestahan,+ suno sa nasulat sa Kasuguan ni Jehova.
4 Ginsugo man niya ang katawhan nga nagaistar sa Jerusalem nga ihatag ang parte sang mga saserdote kag sang mga Levinhon,+ agod matuman gid nila ang* kasuguan ni Jehova.
5 Sang mapahibalo na ang sugo, naghatag ang mga Israelinhon sing madamo gid nga una nga patubas sang uyas, sing bag-o nga alak, sing lana,+ kag dugos, kag sing tanan nga patubas sang uma.+ Madamo gid ang ila gindala nga ikanapulo sang tanan nga butang.+
6 Ang katawhan sang Israel kag sang Juda nga nagaistar sa mga siudad sang Juda nagdala man sing ikanapulo sang mga baka kag mga karnero, kag sing ikanapulo sang balaan nga mga butang+ nga ginpakabalaan kay Jehova nga ila Dios. Gindala nila ini kag madamo gid sila sing natipon.
7 Ginsugdan nila ang pagtipon sa mga amot sang ikatlo nga bulan;+ kag natapos nila ini sang ikapito nga bulan.+
8 Sang makita ni Ezequias kag sang mga pangulo ang gintipon nga mga amot, gindayaw nila si Jehova kag ginpakamaayo ang iya katawhan nga Israel.
9 Ginpamangkot ni Ezequias ang mga saserdote kag ang mga Levinhon tuhoy sa mga amot,
10 kag si Azarias nga puno nga saserdote sa panimalay ni Zadok nagsabat sa iya: “Sugod sang magdala ang katawhan sing mga amot sa balay ni Jehova,+ nabusog gid sila sa ila ginakaon kag madamo gihapon ang sobra, kay ginpakamaayo ni Jehova ang iya katawhan, gani madamo pa ang nabilin nga pagkaon.”+
11 Gani ginsugo sila ni Ezequias nga maghimo sing mga bodega*+ sa balay ni Jehova, kag ginhimo nila ini.
12 Matutom nga gindala nila didto ang mga amot, ang ikanapulo nga mga bahin,*+ kag ang balaan nga mga butang. Si Conanias nga Levinhon amo ang ginpadumala sa sini, kag ang iya utod nga si Simei amo ang ikaduha sa iya.
13 Si Jehiel, si Azazias, si Nahat, si Asahel, si Jerimot, si Jozabad, si Eliel, si Ismaquias, si Mahat, kag si Benaias amo ang mga kabulig ni Conanias kag ni Simei nga iya utod, suno sa sugo ni Hari Ezequias. Si Azarias amo ang nagadumala sa balay sang matuod nga Dios.
14 Si Kore nga anak ni Imnah nga Levinhon amo ang manugbantay sang gawang sa sidlangan.+ Sia man ang nagadumala sa kinabubut-on nga mga dulot+ sa matuod nga Dios, kag sia ang nagapanagtag sing mga amot nga ginahatag para kay Jehova+ kag sing balaan gid nga mga butang.+
15 Ginadumalahan niya si Eden, si Miniamin, si Jesua, si Semaias, si Amarias, kag si Secanias sa mga siudad sang mga saserdote.+ Sila ang gintugyanan nga managtag sa ila mga utod, suno sa ila mga grupo.+ Pareho kadamo ang ila ihatag sa lamharon kag tigulang.
16 Dugang pa ini sa ginapanagtag sa mga lalaki nga nagaedad sing tatlo ka tuig pataas nga nalista sa listahan sang ila kaliwatan kag nagakadto sa balay ni Jehova adlaw-adlaw agod mag-alagad kag himuon ang katungdanan sang ila mga grupo.
17 Ang listahan sang kaliwatan sang mga saserdote ginlista suno sa ila panimalay,+ pareho sa ginhimo sa mga Levinhon nga nagaedad sing 20 ka tuig pataas+ nga ginlista suno sa mga katungdanan sang ila mga grupo.+
18 Nalakip sa listahan sang kaliwatan ang tanan nila nga magagmay nga kabataan, ang ila mga asawa, ang ila mga anak nga lalaki, kag ang ila mga anak nga babayi, ang bug-os nga katilingban. Kag bangod sang gintugyan sa ila, ginpakabalaan nila ang ila kaugalingon para sa balaan nga pag-alagad.
19 Nalakip man ang mga kaliwat ni Aaron, ang mga saserdote nga nagaistar sa gua* sang ila mga siudad.+ Sa tanan nga siudad, may mga lalaki nga gintangdo nga magpanagtag sing pagkaon sa tanan nga lalaki sa pamilya sang mga saserdote kag sa tanan nga nalista sa listahan sang kaliwatan sang mga Levinhon.
20 Ginhimo ini ni Ezequias sa bug-os nga Juda. Ginhimo niya ang maayo kag matarong, kag nangin matutom sia sa atubangan ni Jehova nga iya Dios.
21 Sa pagpangita sa iya Dios, ginhimo niya sing bug-os tagipusuon ang tanan nga hilikuton may kaangtanan sa pag-alagad sa balay sang matuod nga Dios+ kag sa pagtuman sang Kasuguan kag sang sugo, kag nagmadinalag-on sia.
Footnote
^ Sa literal, “kampo.”
^ Ukon “agod mahugod nila ang ila kaugalingon sing bug-os sa.”
^ Ukon “hulot nga kalan-an.”
^ Ukon “ang diesmos.”
^ Sa literal, “sa latagon nga halalban.”
