2 Cronica 4:1-22
4 Dayon ginhimo niya ang saway nga halaran,+ nga 20 ka maniko ang kalabaon, 20 ka maniko ang kasangkaron, kag 10 ka maniko ang kataason.
2 Dayon naghimo sia sing metal nga suludlan sang tubig.*+ Tipulon ini, kag ang diametro sang baba sini 10 ka maniko, ang kataason sini 5 ka maniko, kag ang takus sini palibot 30 ka maniko.+
3 Sa ubos sang bibig sang suludlan sang tubig may nagapalibot nga duha ka kubay sang metal nga korte-sandiya nga mga dekorasyon,+ napulo sa kada isa ka maniko, kag ginhurma na ini sa suludlan sang tubig sang ginhimo ini.
4 Nagatungtong ini sa 12 ka toro nga baka,+ ang 3 nagaatubang sa aminhan, ang 3 sa katundan, ang 3 sa bagatnan, kag ang 3 sa sidlangan. Nagatungtong sa sini ang suludlan sang tubig, kag nagatalikdanay ini tanan.
5 Ang kadamulon sini isa ka dapal;* kag ang bibig sini pareho sang bibig sang kopa, pareho sang nagabuskad nga bulak nga liryo. Masudlan ini sing 3,000 ka bat* nga tubig.
6 Naghimo man sia sing napulo ka labador nga hulugasan. Ginbutang niya ang lima sa tuo kag ang lima sa wala.+ Ginahugasan nila sa sini ang mga butang nga gingamit sa dulot nga sinunog.+ Apang ang suludlan sang tubig amo ang hilinawan sang mga saserdote.+
7 Dayon naghimo sia sing napulo ka kandelero nga bulawan,+ suno sa ginhatag nga instruksion,+ kag ginbutang niya ini sa templo, ang lima sa tuo kag ang lima sa wala.+
8 Naghimo man sia sing napulo ka lamesa kag ginbutang niya ini sa templo, ang lima sa tuo kag ang lima sa wala.+ Naghimo man sia sing 100 ka yahong nga bulawan.
9 Dayon ginhimo niya ang luwang+ sang mga saserdote+ kag ang daku nga luwang+ kag ang mga puertahan sang luwang, kag ginkulapan niya sing saway ang mga puertahan sini.
10 Ginbutang niya ang suludlan sang tubig sa tuo nga bahin, sa tungatunga sang bagatnan kag sidlangan.+
11 Naghimo man si Hiram sing mga suludlan sang abo, sing mga pala, kag sing mga yahong.+
Natapos ni Hiram ang tanan nga ginpahimo sa iya ni Hari Solomon para sa balay sang matuod nga Dios:+
12 ang duha ka haligi+ kag ang daw yahong nga mga uloulo sa ibabaw sang duha ka haligi; ang duha ka sinalapid nga kulukadena nga dekorasyon+ nga nagatabon sa duha ka daw yahong nga uloulo sa ibabaw sang mga haligi;
13 ang 400 ka prutas nga granada+ para sa duha ka sinalapid nga kulukadena nga dekorasyon nga ang tagsa sini may tigduha ka kubay sang prutas nga granada agod tabunan ang daw yahong nga mga uloulo sa ibabaw sang duha ka haligi;+
14 ang napulo ka karo* kag ang napulo ka labador sa mga karo;+
15 ang suludlan sang tubig kag ang 12 ka toro nga baka nga ginatungtungan sini;+
16 ang mga suludlan sang abo, ang mga pala, kag ang mga tinidor,+ kag ang tanan nga kagamitan nga ginpahimo ni Hari Solomon kay Hiram-abiv+ para sa balay ni Jehova. Ginpahining nga saway ang gingamit niya sa paghimo sini.
17 Ginpahurma ini sang hari sa daga nga hurmahan didto sa distrito sang Jordan, sa tunga sang Sucot+ kag sang Sereda.
18 Madamo gid nga kagamitan ang ginpahimo ni Solomon. Wala mahibaluan ang kabug-aton sang saway nga gingamit.+
19 Ginpahimo ni Solomon ang tanan nga kagamitan+ para sa balay sang matuod nga Dios: ang bulawan nga halaran,+ ang mga lamesa+ para sa dulot nga tinapay;+
20 ang mga kandelero kag ang mga suga sini nga puro nga bulawan,+ nga pasigahon sa atubangan sang Labing Balaan nga hulot* suno sa pagsulundan;
21 kag ang puro gid nga bulawan nga mga bulak, mga suga, kag mga kimpit;
22 ang puro nga bulawan nga mga inugpalong, mga yahong, mga kopa, kag mga incensario; kag ang bulawan nga mga puertahan sang balay, ang mga puertahan pasulod sa Labing Balaan,+ kag ang mga puertahan sang Balaan nga hulot.*+
Footnote
^ Sa literal, “hinurma nga Dagat.”
^ Mga 7.4 ka sentimetro (2.9 ka pulgada). Tan-awa ang Apendise B14.
^ Ang isa ka bat katumbas sang 22 ka litro (5.81 ka galon). Tan-awa ang Apendise B14.
^ Ukon “karo para sa tubig.”
^ Sa literal, “pinakasulod nga hulot.”
^ Sa literal, “balay sang templo,” nga maathag nga nagapatuhoy sa Balaan nga hulot.
