2 Cronica 7:1-22
7 Pagkatapos makapangamuyo si Solomon,+ nagtupa ang kalayo halin sa langit+ kag ginsunog sini ang dulot nga sinunog kag ang mga halad, kag napuno sang himaya ni Jehova ang balay.+
2 Indi makasulod ang mga saserdote sa balay ni Jehova bangod napuno sang himaya ni Jehova ang balay ni Jehova.+
3 Nakita sang tanan nga katawhan sang Israel ang kalayo nga nagtupa kag ang himaya ni Jehova sa ibabaw sang balay, kag nagluhod sila sa salog kag nagduko kag nagyaub sila kag nagpasalamat kay Jehova, “kay maayo sia; ang iya mainunungon nga gugma wala sing katapusan.”
4 Ang hari kag ang tanan nga katawhan naghalad sa atubangan ni Jehova.+
5 Naghalad si Hari Solomon sing 22,000 ka baka kag 120,000 ka karnero. Paagi sa sini, gin-inagurahan sang hari kag sang tanan nga katawhan ang balay sang matuod nga Dios.+
6 Ang mga saserdote nagatindog sa ila mga puesto. Nagatindog man ang mga Levinhon nga may mga instrumento sa musika nga ginagamit sa pag-amba kay Jehova.+ (Ginhimo ni Hari David ini nga mga instrumento sa pagpasalamat kay Jehova, “kay ang iya mainunungon nga gugma wala sing katapusan,” kag ginaamba nila ini kon nagadayaw si David sa Dios upod sa ila.*) Ang mga saserdote nagapatunog sing mabaskog sang mga trumpeta+ sa atubangan sang mga Levinhon, samtang nagatindog ang tanan nga Israelinhon.
7 Dayon ginpakabalaan ni Solomon ang tunga nayon sang luwang nga yara sa atubangan sang balay ni Jehova, kay dapat sia maghalad didto sing mga dulot nga sinunog+ kag sing mga tambok sang mga halad sa pag-ambitanay,* bangod indi makaigo sa saway nga halaran+ nga ginhimo ni Solomon ang mga halad nga sinunog, ang mga dulot nga uyas,+ kag ang mga tambok.+
8 Sina nga tion, ginsaulog ni Solomon kag sang bug-os nga Israel ang kapiestahan sing pito ka adlaw.+ Nagtipon ang daku nga katilingban sang mga tawo halin sa Lebo-hamat* tubtob sa Nalupyakan* sang Egipto.+
9 Ginsaulog nila ang inagurasyon sang halaran sing pito ka adlaw kag ang kapiestahan sing pito ka adlaw. Apang sang ikawalo nga adlaw,* ginhiwat nila ang sagrado nga pagtilipon.+
10 Dayon sang ika-23 nga adlaw sang ikapito nga bulan, ginpapauli sang hari ang katawhan nga masinadyahon+ kag malipayon ang tagipusuon tungod sa kaayo nga ginpakita ni Jehova kay David kag kay Solomon kag sa Israel nga iya katawhan.+
11 Natapos ni Solomon ang balay ni Jehova kag ang balay* sang hari;+ kag nangin madinalag-on ang tanan nga handum sang tagipusuon ni Solomon may kaangtanan sa balay ni Jehova kag sa iya balay.+
12 Sang gab-i, nagpakita si Jehova kay Solomon+ kag nagsiling sa iya: “Nabatian ko ang imo pangamuyo, kag ginpili ko ini nga lugar para sa akon bilang isa ka balay para sa mga halad.+
13 Kon indi ako magpaulan halin sa langit kag kon suguon ko ang mga apan nga kaunon ang katamnan sang duta kag kon magpadala ako sing peste sa akon katawhan,
14 kag ang akon katawhan nga ginatawag sa akon ngalan+ magpaubos+ kag magpangamuyo kag magdangop sa akon kag magbiya sa ila malain nga dalanon,+ pamatian ko sila halin sa langit kag patawaron ko ang ila sala kag ayuhon ko ang ila duta.+
15 Talupangdon ko kag pamatian ang pangamuyo sa sini nga duog.+
16 Ginpili ko kag ginpakabalaan ini nga balay agod magpabilin diri ang akon ngalan tubtob san-o,+ kag bantayan ko ini kag atipanon sa tanan nga tion.+
17 “Kon magsunod ka sa akon, pareho sang imo amay nga si David, kag sundon mo ang tanan nga ginsugo ko, kag tumanon mo ang akon mga pagsulundan kag mga desisyon,+
18 palig-unon ko ang trono sang imo ginharian,+ subong sang ginsiling ko sang nagpakigkatipan ako kay David nga imo amay,+ ‘May kaliwat ka pirme nga magahari sa Israel.’+
19 Apang kon magtalikod kamo sa akon kag indi ninyo pagtumanon ang akon mga pagsulundan kag mga sugo kag mag-alagad kamo sa iban nga mga dios kag magyaub sa ila,+
20 gabuton ko ang Israel sa duta nga ginhatag ko sa ila,+ kag sikwayon ko ini nga balay nga ginpakabalaan ko para sa akon ngalan, kag himuon ko ini nga mangin talamayon* kag yagutaon ini sang tanan nga katawhan.+
21 Ini nga balay mangin tinumpok nga kagulub-an. Ang tanan nga magalabay sa sini matingala+ kag magasiling, ‘Ngaa ginhimo ina ni Jehova sa sini nga duta kag sa sini nga balay?’+
22 Dayon magasiling sila, ‘Bangod ginbayaan nila si Jehova+ nga Dios sang ila mga katigulangan nga nagpagua sa ila sa duta sang Egipto,+ kag nagdangop sila sa iban nga mga dios kag nagyaub kag nag-alagad sa ila.+ Gani gintugutan niya nga matabo sa ila ini tanan nga kahalitan.’ ”+
Footnote
^ Mahimo nagapatuhoy sa mga Levinhon.
^ Ukon “mga dulot para sa paghidait,” mga dulot nga nagapakita nga ang nagadulot may paghidait sa Dios.
^ Ukon “dulunan sang Hamat.”
^ Ang adlaw pagkatapos sang kapiestahan, ukon ang ika-15 nga adlaw.
^ Ukon “palasyo.”
^ Sa literal, “mangin hulubaton.”
