2 Hari 11:1-21
11 Sang mahibaluan ni Atalia+ nga iloy ni Ahazias nga napatay ang iya anak,+ ginpamatay niya ang tanan nga kaliwat sang hari.*+
2 Apang ginkawat ni Jehoseba, nga anak nga babayi ni Hari Jehoram kag utod ni Ahazias, si Jehoas+ nga anak ni Ahazias sa mga anak sang hari nga palatyon, kag gintago niya sia upod sa iya yaya sa isa ka kuarto. Wala sia makita ni Atalia, gani wala sia mapatay.
3 Nagpanago si Jehoas upod sa iya yaya sa balay ni Jehova sing anom ka tuig, samtang si Atalia ang nagagahom bilang rayna.
4 Sang ikapito nga tuig, ginpatawag ni Jehoiada ang mga pangulo sang ginatos ka Carianhon nga mga guardia kag sang mga bantay sang palasyo,*+ kag ginpakadto niya sila sa iya sa balay ni Jehova. Naghimo sia sing kasugtanan* sa ila kag ginpasumpa niya sila sa balay ni Jehova, dayon ginpakita niya sa ila ang anak sang hari.+
5 Ginsugo niya sila: “Amo ini ang himuon ninyo: Ang isa sa tatlo ka grupo ninyo amo ang magabantay sa balay* sang hari sa Adlaw nga Inugpahuway,+
6 ang isa pa ka grupo magabantay sa Gawang sang Pundasyon, kag ang isa pa gid magabantay sa gawang sa likod sang mga bantay sang palasyo. Magbulosbulos kamo sa pagbantay sa balay.
7 Ang duha ka grupo nga wala nagabantay kon Adlaw nga Inugpahuway amo ang magabantay sa balay ni Jehova agod amligan ang hari.
8 Palibutan ninyo ang hari kag dapat may armas ang kada isa sa inyo. Patya ninyo ang bisan sin-o nga magpalapit sa inyo. Sundan ninyo ang hari bisan diin sia magkadto.”*
9 Ginhimo sang mga pangulo sang ginatos+ ang ginsugo ni Jehoiada nga saserdote. Gintipon sang kada isa sa ila ang iya mga tinawo nga nagabantay kon Adlaw nga Inugpahuway, pati ang mga wala nagabantay kon Adlaw nga Inugpahuway, kag nagkadto sila kay Jehoiada nga saserdote.+
10 Dayon ginhatagan sang saserdote ang mga pangulo sang ginatos sing mga bangkaw kag sing tipulon nga mga taming nga iya ni Hari David, nga yara sa balay ni Jehova.
11 Nagpuesto ang mga bantay sang palasyo+ nga ang kada isa may mga armas sa palibot sang hari, halin sa tuo nga bahin sang balay tubtob sa wala nga bahin sang balay, malapit sa halaran+ kag sa balay.
12 Dayon ginpagua ni Jehoiada ang anak sang hari+ kag ginbutang sa iya ulo ang korona* kag ang Pamatuod,*+ kag ginhimo nila sia nga hari kag ginhaplasan sia. Nagpinalakpak sila kag nagsinggit: “Mabuhi ang hari!”+
13 Sang mabatian ni Atalia ang ginahod sang mga tawo nga nagadinalagan, nagkadto sia dayon sa katawhan sa balay ni Jehova.+
14 Dayon nakita niya ang hari nga nagatindog malapit sa haligi suno sa kinabatasan.+ Kaupod sang hari ang mga pangulo kag ang mga manugtrumpeta,+ kag ang tanan nga katawhan nagakinasadya kag nagapatunog sing mga trumpeta. Bangod sini, gingisi ni Atalia ang iya mga bayo kag nagsinggit sia: “Mga maluib! Mga maluib!”
15 Apang ginsugo ni Jehoiada nga saserdote ang mga pangulo sang ginatos+ nga nagadumala sa mga soldado: “Kuhaa ninyo sia kag ipalayo ninyo sia diri. Patya ninyo paagi sa espada ang bisan sin-o nga magsunod sa iya!” Kay nagsiling ang saserdote: “Indi ninyo sia pagpatya sa balay ni Jehova.”
16 Gani gindakop nila sia, kag gindala sia sa alagyan sang kabayo sa balay* sang hari,+ kag ginpatay nila sia didto.
17 Dayon nagpakigkatipan si Jehoiada kay Jehova kag sa hari kag sa katawhan,+ nga magapabilin sila nga katawhan ni Jehova. Nagpakigkatipan man sia sa hari kag sa katawhan.+
18 Pagkatapos sini, nagkadto ang tanan nga katawhan sa templo* ni Baal kag ginguba nila ang iya mga halaran,+ kag gindugmok nila ang iya mga imahen.+ Ginpatay man nila si Matan nga saserdote ni Baal+ sa atubangan sang mga halaran.
Dayon nagbutang ang saserdote sing mga manugtatap sa balay ni Jehova.+
19 Gin-upod man niya ang mga pangulo sang ginatos,+ ang Carianhon nga mga guardia, ang mga bantay sang palasyo,+ kag ang tanan nga katawhan, agod updan ang hari halin sa balay ni Jehova, kag nagkadto sila sa balay* sang hari. Nag-agi sila sa gawang sang mga bantay sang palasyo. Dayon nagpungko sia sa trono sang mga hari.+
20 Gani nagkinasadya ang tanan nga katawhan sini nga duta kag nangin malinong ang siudad, kay ginpatay nila si Atalia paagi sa espada sa balay sang hari.
21 Nagaedad si Jehoas+ sing pito ka tuig sang nangin hari sia.+
Footnote
^ Sa literal, “tanan nga binhi sang ginharian.”
^ Sa literal, “sang mga manugdalagan.”
^ Ukon “katipan.”
^ Ukon “palasyo.”
^ Sa literal, “kon maggua sia kag kon magsulod sia.”
^ Mahimo nagapatuhoy sa linukot nga nagaunod sang Kasuguan sang Dios.
^ Ukon “diadema.”
^ Ukon “palasyo.”
^ Sa literal, “balay.”
^ Ukon “palasyo.”
