2 Hari 12:1-21
12 Nangin hari si Jehoas+ sang ikapito nga tuig sang paghari ni Jehu,+ kag naggahom sia sa Jerusalem sing 40 ka tuig. Ang iya iloy amo si Zibia nga taga-Beer-seba.+
2 Ginhimo ni Jehoas ang matarong sa panulok ni Jehova sa tanan nga tion nga ginatudluan sia ni Jehoiada nga saserdote.
3 Apang wala ginkuha ang sagrado nga mataas nga mga duog,+ kag ang katawhan nagahalad gihapon kag nagapaaso sing mga halad sa mataas nga mga duog.
4 Nagsiling si Jehoas sa mga saserdote: “Kuhaa ninyo ang tanan nga kuarta nga ginadala sa balay ni Jehova para sa balaan nga mga dulot,+ ang buhis nga dapat bayaran sang isa ka tawo,+ ang kuarta nga mabaton halin sa tawo* nga nagapanaad, kag ang tanan nga kuarta nga ginaamot sing kinabubut-on sa balay ni Jehova.+
5 Kuhaon ini sang mga saserdote sa ila mga kilala* kag gamiton nila ini sa pagpakay-o sang balay, sa bisan diin nga bahin nga may guba.”+
6 Sang ika-23 nga tuig sang paggahom ni Hari Jehoas, wala gihapon mapakay-o sang mga saserdote ang guba sa balay.+
7 Gani ginpatawag ni Hari Jehoas si Jehoiada+ nga saserdote kag ang iban pa nga saserdote kag nagsiling sia sa ila: “Ngaa wala pa ninyo mapakay-o ang guba sa balay? Indi na kamo magbaton sing kuarta halin sa inyo mga kilala, kundi ihatag ninyo ini sa mga magakay-o sang balay.”+
8 Nagsugot ang mga saserdote nga indi na sila ang magabaton sang kuarta halin sa mga tawo kag indi na sila ang magpakay-o sang balay.
9 Dayon nagkuha si Jehoiada nga saserdote sing kahon+ kag ginbuhuan niya ini sa takop. Ginbutang niya ini sa tupad sang halaran sa tuo nayon kon ang tawo nagapasulod sa balay ni Jehova. Ginahulog diri sang mga saserdote nga mga manugbantay sang puertahan ang tanan nga kuarta nga ginadala sa balay ni Jehova.+
10 Kon makita nila nga madamo na ang kuarta sa kahon, ginakadtuan ini sang sekretaryo sang hari kag sang mataas nga saserdote kag ginakolekta* nila kag ginaisip ang kuarta nga gindala sa balay ni Jehova.+
11 Ginahatag nila ang naisip nga kuarta sa mga nagadumala sa pagpakay-o sang balay ni Jehova. Amo ini ang ila ginasuhol sa mga panday sa kahoy kag sa mga nagaobra sa balay ni Jehova,+
12 kag sa mga mason kag sa mga manugbasbas sang bato. Nagbakal man sila sing mga kahoy kag sing mga bato nga nabasbasan na nga kinahanglan sa pagkay-o sang balay ni Jehova. Gingamit man nila ang kuarta sa iban pa nga galastuhon sa pagpakay-o sang balay.
13 Ang kuarta nga gindala sa balay ni Jehova wala gingamit sa pagpahimo sing pilak nga mga labador, mga inugpalong, mga yahong, mga trumpeta,+ ukon bisan ano nga gamit nga bulawan ukon pilak para sa balay ni Jehova.+
14 Ginahatag lang nila ini sa mga nagaobra, kag ginagamit nila ini sa pagkay-o sang balay ni Jehova.
15 Wala nila ginausisa ang mga gintugyanan nila sang kuarta nga ihatag sa mga nagaobra, bangod masaligan sila.+
16 Apang ang kuarta para sa mga halad tungod sa kasal-anan+ kag sa mga halad tungod sa sala wala ginagamit sa pagpakay-o sang balay ni Jehova; iya ini sang mga saserdote.+
17 Sadto nga tion, ginsalakay ni Hazael+ nga hari sang Siria ang Gat,+ kag naagaw niya ini. Pagkatapos sini, nagdesisyon sia nga salakayon ang* Jerusalem.+
18 Gani ginkuha ni Hari Jehoas sang Juda ang tanan nga balaan nga dulot nga ginpakabalaan sang iya mga katigulangan nga mga hari sang Juda, nga si Jehosapat, si Jehoram, kag si Ahazias, pati ang iya balaan nga mga dulot kag ang tanan nga bulawan sa mga bahandian sang balay ni Jehova kag sang balay* sang hari, kag ginpadala niya ini tanan kay Hazael nga hari sang Siria.+ Gani wala na niya ginsalakay ang Jerusalem.
19 Tuhoy sa iban pa nga natabo sa kabuhi ni Jehoas, ang tanan niya nga ginhimo, indi bala nga nasulat ini sa libro sang kasaysayan sang mga hari sang Juda?
20 Apang naghimbon ang iya mga alagad+ batok kay Jehoas kag ginpatay nila sia sa balay sang Bungyod,*+ sa dalan pakadto sa Silla.
21 Ginpatay sia ni Jozacar nga anak ni Simeat kag ni Jehozabad nga anak ni Somer nga iya mga alagad.+ Ginlubong nila sia upod sa iya mga katigulangan sa Siudad ni David. Si Amazias nga iya anak amo ang nagbulos sa iya bilang hari.+
Footnote
^ Ukon “kalag.”
^ Ukon “sa nagdonar.”
^ Ukon “ginasulod sa suludlan.” Sa literal, “ginahigtan.”
^ Sa literal, “ginpahamtang ni Hazael ang iya nawong nga magtaklad batok sa.”
^ Ukon “palasyo.”
^ Ukon “sa Bet-millo.”
