2 Hari 13:1-25
13 Sang ika-23 nga tuig sang paghari ni Jehoas+ nga anak ni Ahazias+ nga hari sang Juda, si Jehoahaz nga anak ni Jehu+ nangin hari sa Israel, kag naggahom sia sa Samaria sing 17 ka tuig.
2 Ginhimo niya ang malain sa panulok ni Jehova, kag ginhimo man niya ang sala ni Jeroboam nga anak ni Nebat nga ginbangdan sang pagpakasala sang Israel.+ Wala sia mag-untat sa paghimo sini.
3 Gani naakig gid si Jehova+ sa Israel,+ kag gintugyan niya sila kay Hari Hazael+ sang Siria kag kay Ben-hadad+ nga anak ni Hazael sa malawig nga tion.
4 Sang ulihi, nagpakiluoy si Jehoahaz kay* Jehova, kag ginpamatian sia ni Jehova, kay nakita niya ang pagpigos sang hari sang Siria sa Israel.+
5 Gani ginhatagan ni Jehova ang Israel sing manluluwas+ nga magahilway sa ila sa Siria, kag nag-istar liwat ang mga Israelinhon sa ila mga puluy-an pareho sang una.*
6 (Apang ginhimo man nila ang sala sang panimalay ni Jeroboam nga ginbangdan sang pagpakasala sang Israel.+ Wala sila mag-untat sa paghimo sini,* kag ang sagrado nga poste*+ yara gihapon sa Samaria.)
7 Ang nabilin lang kay Jehoahaz amo ang 50 ka manugkabayo, 10 ka kangga, kag 10,000 ka soldado, bangod ginlaglag sila kag gintasak sang hari sang Siria+ nga daw yab-ok sa linasan.+
8 Tuhoy sa iban pa nga natabo sa kabuhi ni Jehoahaz, ang tanan niya nga ginhimo kag ang iya daku nga mga binuhatan, indi bala nga nasulat ini sa libro sang kasaysayan sang mga hari sang Israel?
9 Sang ulihi, napatay si Jehoahaz pareho sang iya mga katigulangan, kag ginlubong nila sia sa Samaria.+ Si Jehoas nga iya anak amo ang nagbulos sa iya bilang hari.
10 Sang ika-37 nga tuig sang paggahom ni Hari Jehoas sang Juda, si Jehoas+ nga anak ni Jehoahaz nangin hari sa Israel, kag naggahom sia sa Samaria sing 16 ka tuig.
11 Ginhimo niya ang malain sa panulok ni Jehova. Ginhimo man niya ang tanan nga sala ni Jeroboam nga anak ni Nebat nga ginbangdan sang pagpakasala sang Israel.+ Wala sia mag-untat sa paghimo sini.
12 Tuhoy sa iban pa nga natabo sa kabuhi ni Jehoas, ang tanan niya nga ginhimo kag ang iya daku nga mga binuhatan kag kon paano sia nagpakig-away kay Hari Amazias sang Juda,+ indi bala nga nasulat ini sa libro sang kasaysayan sang mga hari sang Israel?
13 Sang ulihi, napatay si Jehoas pareho sang iya mga katigulangan, kag si Jeroboam*+ ang nagbulos sa iya sa trono. Si Jehoas ginlubong sa Samaria upod sa mga hari sang Israel.+
14 Sang nagmasakit si Eliseo+ sing grabe nga ginkamatay niya sang ulihi, ginduaw sia ni Jehoas nga hari sang Israel. Naghibi sia kag nagsiling: “Amay ko, amay ko! Ang kangga sang Israel kag ang iya mga manugkabayo!”*+
15 Dayon nagsiling si Eliseo sa iya: “Magkuha ka sing pana kag mga baslay.” Gani nagkuha sia sing pana kag mga baslay.
16 Nagsiling sia sa hari sang Israel: “Uyati ang pana.” Gani gin-uyatan niya ang pana, dayon gintungtong ni Eliseo ang iya mga kamot sa mga kamot sang hari.
17 Dayon nagsiling si Eliseo: “Buksi ang bintana sa sidlangan nayon.” Gani ginbuksan niya ang bintana. Kag nagsiling si Eliseo: “Magpana ka na!” Gani, nagpana sia. Pagkatapos sini, nagsiling si Eliseo: “Ang baslay sang kadalag-an* ni Jehova, ang baslay sang kadalag-an* batok sa Siria! Magapakig-away ka batok sa Siria sa Afek+ tubtob mapierde mo sila sing bug-os.”
18 Dayon nagsiling sia: “Kuhaa ang mga baslay,” kag ginkuha niya ini. Nagsiling sia sa hari sang Israel: “Hampasa ang duta.” Gani ginhampas niya sing tatlo ka beses ang duta, dayon nag-untat na sia.
19 Bangod sini, naakig sa iya ang tawo sang matuod nga Dios kag nagsiling sia: “Dapat ginhampas mo ang duta sing lima ukon anom ka beses! Mapierde mo kuntani ang Siria tubtob malaglag mo sila sing bug-os, apang mapierde mo ang Siria sing tatlo lang ka beses.”+
20 Pagkatapos sini, napatay si Eliseo kag ginlubong nila sia. May mga grupo sang tulisan nga mga Moabnon+ nga nagasalakay sa sini nga duta sa pagsugod sang tuig.*
21 Sang may ilubong sila nga patay nga tawo, nakita nila ang grupo sang mga tulisan. Gani dalidali nga ginhaboy nila ang patay nga tawo sa lulubngan ni Eliseo kag nagpalagyo sila. Pagtupa sang patay nga tawo sa mga tul-an ni Eliseo, nabuhi ang tawo+ kag nagtindog.
22 Ginpigos ni Hari Hazael+ sang Siria ang Israel+ sa bug-os nga tion sang paghari ni Jehoahaz.
23 Apang, ginpakitaan sila ni Jehova sing kaayo kag kaluoy+ kag ginkabalak-an niya sila tungod sang iya katipan kay Abraham,+ kay Isaac,+ kag kay Jacob.+ Wala niya sila ginlaglag, kag wala niya sila ginsikway tubtob sini nga adlaw.
24 Sang napatay si Hari Hazael sang Siria, si Ben-hadad nga iya anak amo ang nagbulos sa iya bilang hari.
25 Ginbawi ni Jehoas nga anak ni Jehoahaz kay Ben-hadad nga anak ni Hazael ang mga siudad nga gin-agaw kay Jehoahaz nga iya amay sa tion sang inaway. Tatlo ka beses nga napierde sia ni Jehoas,+ kag nabawi niya ang mga siudad sang Israel.
Footnote
^ Ukon “ginpahumok ni Jehoahaz ang nawong ni.”
^ Buot silingon, sing malinong kag may kalig-unan.
^ Sa literal, “Naglakat sia sa sini.”
^ Si Jeroboam II.
^ Mahimo nga pagpangayo ini sing bulig sa Dios ukon sa iya mga tiglawas.
^ Ukon “kaluwasan.”
^ Ukon “kaluwasan.”
^ Sa literal, “sa umpisa sang tuig,” mahimo nga sa tigpamulak.
