2 Hari 16:1-20
16 Sang ika-17 nga tuig sang paghari ni Peka nga anak ni Remalias, nangin hari si Ahaz+ nga anak ni Hari Jotam sang Juda.
2 Nagaedad si Ahaz sing 20 ka tuig sang nangin hari sia, kag naggahom sia sa Jerusalem sing 16 ka tuig. Wala niya ginhimo ang matarong sa panulok ni Jehova nga iya Dios, indi pareho sa ginhimo ni David nga iya katigulangan.+
3 Sa baylo, ginhimo man niya ang ginhimo sang mga hari sang Israel.+ Ginsunod man niya ang makangilil-ad nga mga butang nga ginahimo sang mga pungsod+ nga gintabog ni Jehova sa atubangan sang mga Israelinhon kay bisan gani ang iya anak ginsunog niya bilang halad.*+
4 Padayon man sia nga naghalad kag nagpaaso sing mga halad sa sagrado nga mataas nga mga duog,+ sa mga bakulod, kag sa idalom sang tagsa ka madabong nga kahoy.+
5 Ginsalakay sadto ni Hari Rezin sang Siria kag ni Peka nga anak ni Remalias nga hari sang Israel ang Jerusalem+ kag ginlikupan nila ang siudad nga nahamtangan ni Ahaz, apang wala nila maagaw ang siudad.
6 Ginbalik sadto ni Hari Rezin sang Siria ang Elat+ sa Edom, dayon gintabog niya ang mga Judiyo* sa Elat. Nagsulod ang mga Edominhon sa Elat, kag nag-istar sila didto tubtob sini nga adlaw.
7 Bangod sini, nagpadala si Ahaz sing mga mensahero kay Hari Tiglat-pileser+ sang Asiria, sa pagsiling: “Alagad mo ako kag anak. Luwasa ako sa hari sang Siria kag sa hari sang Israel, nga nagasalakay sa akon.”
8 Dayon ginkuha ni Ahaz ang pilak kag ang bulawan sa balay ni Jehova kag sa mga bahandian sa balay* sang hari kag ginpadala ini bilang regalo sa hari sang Asiria.+
9 Nagsugot ang hari sang Asiria sa iya ginapangabay kag ginsalakay niya ang Damasco kag naagaw niya ini. Gintapok niya ang katawhan sini sa Kir,+ kag ginpatay niya si Rezin.+
10 Dayon nagkadto si Hari Ahaz sa Damasco agod makigkita kay Hari Tiglat-pileser sang Asiria. Sang makita ni Hari Ahaz ang halaran sa Damasco, ginpadalhan niya si Urija nga saserdote sing desinyo sang halaran nga nagapakita kon paano ini himuon.+
11 Ginhimo ni Urija+ nga saserdote ang halaran+ suno sa tanan nga detalye sang desinyo nga ginpadala ni Hari Ahaz halin sa Damasco. Nahuman ini ni Urija nga saserdote antes pa nakabalik si Hari Ahaz halin sa Damasco.
12 Pag-abot sang hari halin sa Damasco kag nakita niya ang halaran, nagpalapit sia sa halaran kag naghalad sia sa sini.+
13 Ginpaaso niya sa sini nga halaran ang iya mga dulot nga sinunog kag ang iya mga dulot nga uyas; ginbubo man niya sa sini ang iya mga dulot nga ilimnon kag ginwisik ang dugo sang iya mga halad sa pag-ambitanay.*
14 Dayon ginkuha niya ang saway nga halaran+ sa atubangan ni Jehova nga yara sa atubang sang balay, sa ulot sang iya kaugalingon nga halaran kag sang balay ni Jehova, kag ginbutang niya ini sa naaminhan nga bahin sang iya kaugalingon nga halaran.
15 Ginsugo ni Hari Ahaz si Urija+ nga saserdote: “Paasuha sa daku nga halaran ang mga dulot nga sinunog kada aga,+ ang dulot nga uyas kada gab-i,+ ang dulot nga sinunog sang hari, kag ang iya dulot nga uyas, subong man ang mga dulot nga sinunog, ang mga dulot nga uyas, kag ang mga dulot nga ilimnon sang tanan nga katawhan. Iwisik mo man sa halaran ang tanan nga dugo sang mga dulot nga sinunog kag ang tanan nga dugo sang iban pa nga mga halad. Tuhoy sa saway nga halaran, binagbinagon ko pa kon ano ang himuon sa sini.”
16 Kag ginhimo ni Urija nga saserdote ang tanan nga ginsugo ni Hari Ahaz.+
17 Ginhukas ni Hari Ahaz ang mga dingding sang mga karo+ kag ginkuha niya ang mga labador sa ibabaw sini.+ Ginkuha man niya ang suludlan sang tubig* nga nagatungtong sa saway nga mga baka+ kag ginbutang niya ini sa salog nga bato.+
18 Ang naatupan nga tinukod nga ginagamit kon Adlaw nga Inugpahuway nga ginpatindog sa balay kag ang alagyan sang hari pasulod ginsaylo niya palayo sa balay ni Jehova; ginhimo niya ini bangod nahadlok sia sa hari sang Asiria.
19 Tuhoy sa iban pa nga natabo sa kabuhi ni Ahaz, ang iya ginhimo, indi bala nga nasulat ini sa libro sang kasaysayan sang mga hari sang Juda?+
20 Sang ulihi, napatay si Ahaz pareho sang iya mga katigulangan, kag ginlubong upod sa iya mga katigulangan sa Siudad ni David. Si Ezequias*+ nga iya anak amo ang nagbulos sa iya bilang hari.
Footnote
^ Sa literal, “ginpaagi niya sa kalayo.”
^ Ukon “lalaki sang Juda.”
^ Ukon “palasyo.”
^ Ukon “mga dulot para sa paghidait,” mga dulot nga nagapakita nga ang nagadulot may paghidait sa Dios.
^ Sa literal, “hinurma nga Dagat.”
^ Buot silingon, “Si Jehova Nagapabakod.”
