2 Hari 20:1-21
20 Sadto nga tion, nagmasakit si Ezequias kag daw mapatay na sia.+ Gani nagkadto sa iya si manalagna Isaias nga anak ni Amoz kag nagsiling, “Amo ini ang ginasiling ni Jehova: ‘Mamilinbilin ka sa imo panimalay, kay indi ka na mag-ayo kundi mapatay ka.’ ”+
2 Pagkabati niya sini, nag-atubang sia sa dingding kag nagpangamuyo kay Jehova:
3 “O Jehova, nagapakiluoy ako sa imo. Dumduma, palihug, nga nangin matutom ako sa imo kag bug-os ang akon tagipusuon sa imo, kag ginhimo ko kon ano ang maayo sa panulok mo.”+ Kag naghilibion gid si Ezequias.
4 Wala pa makalab-ot si Isaias sa tungatunga sang luwang, nagsiling si Jehova sa iya:+
5 “Magbalik ka, kag silinga si Ezequias nga lider sang akon katawhan, ‘Amo ini ang ginasiling ni Jehova nga Dios ni David nga imo katigulangan: “Nabatian ko ang imo pangamuyo. Nakita ko ang imo mga luha.+ Gani ayuhon ko ikaw.+ Sa ikatlo nga adlaw magakadto ka sa balay ni Jehova.+
6 Dugangan ko sing 15 pa ka tuig ang imo kabuhi.* Luwason ko ikaw kag ining siudad sa kamot sang hari sang Asiria,+ kag pangapinan ko ini nga siudad tungod sa akon ngalan kag tungod kay David nga akon alagad.” ’ ”+
7 Dayon nagsiling si Isaias: “Magkuha kamo sing binulad kag pinipi nga mga igos.”* Gani nagkuha sila sini kag ginhampol sa hubag ni Ezequias kag nag-ayo sia.+
8 Ginpamangkot ni Ezequias si Isaias: “Ano ang tanda+ nga ayuhon ako ni Jehova kag sa ikatlo nga adlaw magakadto ako sa balay ni Jehova?”
9 Nagsabat si Isaias: “Amo ini ang tanda halin kay Jehova nga ginsiling ni Jehova nga himuon niya para sa imo: Ano ang gusto mo? Mag-abante ukon mag-isol ang landong sing napulo ka halintang sa hagdanan?”*+
10 Nagsabat si Ezequias: “Mas mahapos nga mag-abante ang landong sing napulo ka halintang sangsa mag-isol ini sing napulo ka halintang.”
11 Gani nagpangamuyo si Isaias nga manalagna kay Jehova, kag ginpaisol niya ang landong sa hagdanan ni Ahaz sing napulo ka halintang.+
12 Sang mabatian sadto sang hari sang Babilonia nga si Berodac-baladan nga anak ni Baladan nga nagamasakit si Ezequias, nagpadala sia sing mga sulat kag regalo para kay Ezequias.+
13 Gin-abiabi* ni Ezequias ang mga mensahero kag ginpakita niya sa ila ang tanan nga yara sa iya bahandian,+ ang mga pilak, ang mga bulawan, ang lana sang balsamo kag ang iban pa nga malahalon nga lana, ang iya mga hinganiban kag ang tanan nga makita sa iya mga bahandian. Wala sing bisan ano sa iya balay* kag sa iya ginharian nga wala ginpakita sa ila ni Ezequias.
14 Pagkatapos sini, nagkadto si Isaias nga manalagna kay Hari Ezequias kag nagpamangkot: “Ano ang ginsiling sini nga mga tawo, kag diin sila halin?” Nagsabat si Ezequias: “Halin sila sa malayo nga lugar, sa Babilonia.”+
15 Nagpamangkot pa si Isaias: “Ano ang nakita nila sa imo balay?”* Nagsabat si Ezequias: “Nakita nila ang tanan nga yara sa akon balay.* Wala sing bisan ano sa akon mga bahandian nga wala ko ginpakita sa ila.”
16 Gani nagsiling si Isaias kay Ezequias: “Pamatii ang ginsiling ni Jehova,+
17 ‘Magaabot gid ang tion nga ang tanan nga yara sa imo balay* kag ang tanan nga gintipon sang imo mga katigulangan nga yara pa tubtob sini nga adlaw, dalhon sa Babilonia.+ Wala gid sing mabilin,’ siling ni Jehova.
18 ‘Kag ang pila sang imo mga anak bihagon+ kag himuon nga mga opisyal sa palasyo sang hari sang Babilonia.’ ”+
19 Bangod sini nagsiling si Ezequias kay Isaias: “Maayo ang ginhambal mo sa akon halin kay Jehova.”+ Nagsiling pa sia: “Maayo ina kon may kalinong kag kalig-unan* sa akon bug-os nga kabuhi.”*+
20 Tuhoy sa iban pa nga natabo sa kabuhi ni Ezequias, ang tanan niya nga daku nga binuhatan kag ang iya pagpahimo sing punong+ kag sing ililigan sini pakadto sa siudad,+ indi bala nga nasulat ini sa libro sang kasaysayan sang mga hari sang Juda?
21 Sang ulihi, napatay si Ezequias kag ginlubong upod sa iya mga katigulangan.+ Si Manases+ nga iya anak amo ang nagbulos sa iya bilang hari.+
Footnote
^ Sa literal, “mga adlaw.”
^ Bunga sang kahoy nga higuera.
^ Mahimo nga ini nga hagdanan ginagamit sa paghibalo sang oras.
^ Ukon “palasyo.”
^ Ukon “Ginpamatian.”
^ Ukon “palasyo.”
^ Ukon “palasyo.”
^ Ukon “palasyo.”
^ Sa literal, “mga adlaw.”
^ Ukon “kamatuoran.”
