2 Samuel 21:1-22
21 Sang panahon ni David, may gutom+ sa sulod sang tatlo ka tuig, gani nagpamangkot si David kay Jehova. Nagsiling si Jehova: “Nakasala si Saul kag ang iya panimalay, bangod ginpatay niya ang mga Gibeonhon.”+
2 Gani ginpatawag sang hari ang mga Gibeonhon+ kag nagpakighambal sia sa ila. (Ang mga Gibeonhon indi mga Israelinhon, kundi mga nabilin sa mga Amornon.+ Nagpanumpa sa ila ang mga Israelinhon nga indi sila pagpatyon,+ apang ginpamatay sila ni Saul kay nangimon sia tungod sa katawhan sang Israel kag sang Juda.)
3 Nagpamangkot si David sa mga Gibeonhon: “Ano ang akon himuon kag ano ang akon ibayad sa inyo agod pakamaayuhon ninyo ang palanublion ni Jehova?”
4 Nagsabat ang mga Gibeonhon: “Indi mabayaran sang pilak ukon bulawan+ ang sala ni Saul kag sang iya panimalay. Wala man kami sing kinamatarong sa pagpatay sa isa ka tawo sa Israel.” Bangod sini, nagsiling ang hari: “Himuon ko ang bisan ano nga isiling ninyo.”
5 Nagsiling sila sa hari: “Tuhoy sa tawo nga naglaglag sa amon kag nagplano nga papason kami sa tanan nga teritoryo sang Israel,+
6 ihatag sa amon ang pito niya ka anak nga lalaki. Bitayon namon ang ila mga bangkay*+ sa atubangan ni Jehova sa Gibea+ nga siudad ni Saul, ang isa nga pinili ni Jehova.”+ Nagsiling ang hari: “Itugyan ko sila sa inyo.”
7 Apang, naluoy ang hari kay Mefiboset+ nga anak ni Jonatan nga anak ni Saul tungod sa ginpanumpa ni David kag ni Jonatan nga anak ni Saul sa ngalan ni Jehova.+
8 Gani ginkuha sang hari si Armoni kag si Mefiboset, ang duha ka anak ni Saul kay Rizpa+ nga anak nga babayi ni Aya, kag ang lima ka anak ni Mical*+ kay Adriel+ nga anak ni Barzilai nga Meholatnon. Si Mical anak nga babayi ni Saul.
9 Dayon gintugyan sila sang hari sa mga Gibeonhon kag ginpatay nila sila nga pito kag ginbitay ang ila mga bangkay sa bukid sa atubangan ni Jehova.+ Ginpatay sila sa una nga mga adlaw sang pag-ani, sa pagsugod sang pag-ani sang sebada.
10 Dayon si Rizpa+ nga anak nga babayi ni Aya nagkuha sing tela nga sako kag ginhumlad ini sa ibabaw sang bato halin sang nagsugod ang pag-ani sang sebada tubtob nagtupa ang ulan sa mga bangkay. Wala niya gintugutan nga mapalapitan sila sang mga pispis kon adlaw kag sang ilahas nga mga sapat kon gab-i.
11 Ginbalita kay David ang ginhimo ni Rizpa nga anak nga babayi ni Aya kag babayi ni Saul.
12 Gani naglakat si David kag ginkuha niya sa mga lider* sang Jabes-gilead ang mga tul-an ni Saul kag ni Jonatan nga iya anak,+ bangod ginkawat nila ini sa plasa sang Bet-san, diin ginbitay sang mga Filistinhon ang ila bangkay sang adlaw nga ginpatay sang mga Filistinhon si Saul sa Gilboa.+
13 Halin didto, gindala niya ang mga tul-an ni Saul kag ni Jonatan nga iya anak, kag gintipon man nila ang mga tul-an sang mga lalaki nga ginpatay.*+
14 Dayon ginlubong nila ang mga tul-an ni Saul kag ni Jonatan nga iya anak sa duta sang Benjamin sa Zela+ sa lulubngan ni Kis+ nga iya amay. Pagkatapos nila mahimo ang tanan nga ginsugo sang hari, ginpamatian sang Dios ang ila mga pangabay para sa duta.+
15 Nag-inaway liwat ang mga Filistinhon kag ang mga Israelinhon.+ Gani nagpakig-away si David kag ang iya mga tinawo sa mga Filistinhon, apang kinapoy gid si David.
16 Si Isbi-benob nga kaliwat sang mga Refaim+ may bangkaw nga saway nga nagabug-at sing 300 ka siklo*+ kag bag-o nga espada. Patyon na niya kuntani si David,
17 apang ginbuligan dayon ni Abisai+ nga anak ni Zeruias ang hari+ kag ginpatay niya ang Filistinhon. Sina nga tion, nagpanumpa ang mga tinawo ni David sa iya: “Indi ka na mag-upod sa amon pagpakig-away,+ agod indi mapatay ang suga sang Israel!”+
18 Pagkatapos sini, may inaway liwat batok sa mga Filistinhon+ sa Gob. Sa sina nga tion, ginpatay ni Sibbecai+ nga Husanhon si Saf nga kaliwat sang mga Refaim.+
19 Kag may inaway liwat batok sa mga Filistinhon+ sa Gob. Ginpatay ni Elhanan nga anak ni Jaare-oregim nga taga-Betlehem si Goliat nga Gathanon, nga ang iya bangkaw pareho sa teral sang mga manughabol.+
20 Dayon may inaway liwat sa Gat, diin may isa ka lalaki nga tuman kadaku. May 6 ka tudlo ang iya mga kamot kag may 6 ka tudlo ang iya mga tiil, 24 tanan ang iya tudlo; kag kaliwat man sia sang mga Refaim.+
21 Ginayaguta niya ang Israel.+ Gani ginpatay sia ni Jonatan nga anak ni Simei+ nga utod ni David.
22 Sila nga apat mga kaliwat sang mga Refaim sa Gat. Ginpatay sila ni David kag sang iya mga tinawo.+
Footnote
^ Sa literal, “Ipadayag namon sila,” buot silingon, nga bali ang ila mga butkon kag mga batiis.
^ Ukon mahimo, “Merab.”
^ Ukon mahimo, “tag-iya sang duta.”
^ Sa literal, “ginpadayag.”
^ Mga 3.42 ka kilo (7.5 ka libra). Tan-awa ang Apendise B14.
