Ambahanon ni Solomon 7:1-13
7 “O dungganon nga anak nga babayi,Tuman katahom sang imo mga tiil sa imo mga sandalyas!
Ang korte sang imo paa daw kaangay sang mga alahasNga ginhimo sang sampaton nga platero.
2 Ang imo pusod daw kaangay sang yahong.
Kabay nga indi ini mawad-an sing nasimbugan nga alak.
Ang imo tiyan daw kaangay sang tinumpok nga trigo,Nga napalibutan sing mga liryo.
3 Ang imo mga suso daw kaangay sang duha ka tinday,Kapid sang gasela.+
4 Ang imo liog+ daw kaangay sang tiposo* nga torre.+
Ang imo mata+ daw kaangay sang tubig sa Hesbon,+Malapit sa gawang sang Bat-rabim.
Ang imo ilong daw kaangay sang torre sang Lebanon,Nga nagaatubang sa Damasco.
5 Ang imo korona daw kaangay sang Carmel,+Kag ang imo buhok* + daw kaangay sang purpura* nga de-lana.+
Ang imo nagabunghay nga buhok nagbihag* sa hari.
6 O hinigugma ko, katahom gid sa imo,Makawiwili ka sangsa tanan nga butang nga nagahatag sing kalipay!
7 Ang imo tindog daw kaangay sang palma,*Kag ang imo mga suso daw kaangay sang pinungpong nga mga bunga sini.+
8 Nagsiling ako, ‘Masaka ako sa palmaAgod kuhaon ko ang pinungpong nga mga bunga sini.’
Kabay nga ang imo mga suso mangin kaangay sang mga pinungpong sang ubas,Kag ang kahamot sang imo ginhawa mangin kaangay sang mansanas,
9 Kag ang imo baba* mangin kaangay sang pinakamaayo nga alak.”
Kag ang babayi nagsiling, “Alak nga nagailig sing suabe,Nga daw nagahalok sa bibig sang akon hinigugma.
10 Ako iya lang sang akon hinigugma,+Kag ako lang ang iya ginahandum.
11 Dali ka, hinigugma ko,Makadto kita sa uma;Mapahuway kita sa tunga sang mga tanom nga henna.+
12 Mabugtaw kita sing aga pa kag makadto kita sa mga ulubasanSa pagtan-aw kon bala nagapanalingsing* na ang ubas,Kon bala nagapamukadkad na ang mga bulak,+Kag kon bala nagapamulak na ang mga kahoy nga granada.+
Didto ipahayag ko sa imo ang akon pagpalangga.+
13 Ang mga mandragora* + nagapaninghamot na;Kag sa aton alagyan yara ang tanan nga sahi sang pinakamanamit nga mga bunga.+
Ang bag-o kag ang madugay na napupo,Nga gintigana ko para sa imo, O hinigugma ko.
Footnote
^ Sa Ingles ivory. Malahalon ini nga materyal nga naghalin sa bangkil sang elepante kag iban pa nga sapat.
^ Ukon “naggapos.”
^ Ang kolor nga purpura kombinasyon sang pula kag asul.
^ Sa literal “ulo.”
^ Isa ini ka sahi sang kahoy nga palma nga makita sa Palestina.
^ Sa literal “alingagngag.”
^ Ukon “nagapangugbos.”
^ Pamilya sang patatas nga nagapamunga.
