Binuhatan 22:1-30
22 “Mga kauturan kag mga amay, pamatii ninyo ako samtang ginapaathag ko sa inyo kon ano ang natabo.”+
2 Sang mabatian nila nga nagahambal sia sa ila sa lenguahe nga Hebreo, naghipos pa gid sila. Nagsiling si Pablo:
3 “Isa ako ka Judiyo,+ nga natawo sa Tarso nga sakop sang Cilicia,+ apang diri ako sa siudad sang Jerusalem nag-eskwela kag si Gamaliel+ mismo ang nagtudlo sa akon, kag gintudluan ako nga tumanon gid ang Kasuguan nga ginsunod sang aton mga katigulangan,+ kag kaangay ninyo makugi ako sa pag-alagad sa Dios.+
4 Ginpadakop ko ang mga lalaki kag mga babayi nga nagasunod sa Dalan kag ginpabilanggo sila. Ginhingabot ko sila kag ginpapatay.+
5 Makapamatuod sa sini ang mataas nga saserdote kag ang tanan nga gulang. Ginhatagan man nila ako sing mga sulat para sa Judiyo nga mga kauturan sa Damasco. Nagkadto ako sa Damasco agod dakpon man ang mga nagasunod sa Dalan didto kag dalhon sila sa Jerusalem agod silutan.
6 “Apang samtang nagalakbay ako kag malapit na lang sa Damasco, sang mga udtong-adlaw, hinali lang nga nagkirab sa palibot ko ang masilaw nga kapawa halin sa langit.+
7 Natumba ako sa duta kag may nabatian ako nga isa ka tingog nga nagasiling sa akon: ‘Saulo, Saulo, ngaa ginahingabot mo ako?’
8 Nagsabat ako: ‘Sin-o ka, Ginuo?’ Kag nagsiling sia sa akon: ‘Ako si Jesus nga Nazaretnon, nga imo ginahingabot.’
9 Nakita sang mga tawo nga kaupod ko ang kapawa, apang indi nila mahangpan ang tingog sang isa nga nagahambal sa akon.
10 Dayon nagsiling ako: ‘Ano ang himuon ko, Ginuo?’ Ang Ginuo nagsiling sa akon: ‘Tindog ka, kag magkadto sa Damasco, kag didto isugid sa imo kon ano ang dapat mo himuon.’+
11 Apang bangod nabulag ako tungod sa masilaw nga kapawa, nag-abot ako sa Damasco nga ginatuytuyan sang akon mga kaupod.
12 “Dayon si Ananias nga isa ka tawo nga mahinadlukon sa Dios kag matinumanon sa Kasuguan, kag maayo ang ginasugid tuhoy sa iya sang tanan nga Judiyo nga nagaistar didto,
13 nagkadto sa akon. Nagtindog sia sa tupad ko kag nagsiling sa akon: ‘Saulo, utod ko, makakita ka na liwat!’ Kag sa gilayon nagbalik ang akon panulok kag nakita ko si Ananias.+
14 Nagsiling sia: ‘Ginpili ka sang Dios sang aton mga katigulangan agod mahibaluan mo ang iya kabubut-on kag makita si Jesus, ang isa nga matarong,+ kag mabatian ang iya tingog,
15 bangod ginpili ka niya agod ibantala sa tanan nga tawo ang mga butang nga nakita mo kag nabatian sa iya.+
16 Karon, ano pa ang ginahulat mo? Lakat ka kag magpabawtismo, kag paagi sa pagtawag sa ngalan ni Jesus,+ patawaron sang Dios ang imo mga sala.’+
17 “Apang sang nakabalik ako sa Jerusalem+ kag nagapangamuyo ako sa templo, nakakita ako sing isa ka palanan-awon
18 kag nakita ko ang Ginuo nga nagasiling sa akon: ‘Magdalidali ka sa paghalin sa Jerusalem, kay indi nila pagbatunon ang imo ginabantala tuhoy sa akon.’+
19 Kag nagsiling ako: ‘Ginuo, nakahibalo gid sila nga nagkadto ako anay sa mga sinagoga kag ginpabilanggo ko kag ginbunal ang mga nagatuo sa imo;+
20 kag sang ginpatay ang imo saksi nga si Esteban, nag-ugyon ako kag didto ako nga nagatindog kag nagabantay sa mga kunop sang mga nagpatay sa iya.’+
21 Apang nagsiling sia sa akon: ‘Lakat ka, bangod ipadala ko ikaw sa malayo nga mga pungsod.’”+
22 Pagkatapos niya mahambal ini, wala na sila magpamati sa iya. Nagsinggit sila: “Patya ini nga tawo, kay indi sia dapat mabuhi!”
23 Bangod nagasinggit sila kag nagapilak sang ila mga panapton, kag nagasabwag sing yab-ok sa hangin,+
24 nagmando ang kumander sang militar nga dalhon si Pablo sa kuartel sang mga soldado kag nagsiling nga dapat sia usisaon samtang ginabunal, agod mahibaluan gid niya kon ngaa nagasinggit sila batok sa iya.
25 Apang sang nagaid na nila ang iya mga kamot agod bunalon sia, nagsiling si Pablo sa kumander sang mga soldado nga nagatindog didto: “Tugot bala sa kasuguan nga bunalon ninyo ang isa ka Romano nga wala pa mahukman?”*+
26 Sang mabatian ini sang kumander sang mga soldado, nagkadto sia sa kumander sang militar kag nagsiling: “Ano ang himuon mo? Kay ini nga tawo isa ka Romano.”
27 Gani ang kumander sang militar nagkadto kay Pablo kag nagsiling: “Sugiri ako, Romano ka bala?” Nagsiling sia: “Huo.”
28 Nagsabat ang kumander sang militar: “Daku ang ginbayad ko agod matigayon ang mga kinamatarong sang isa ka Romano.” Nagsiling si Pablo: “Apang natawo ako nga isa ka Romano.”+
29 Gani, nag-isol dayon ang mga tawo nga magausisa kuntani sa iya; kag sang mahibaluan sang kumander sang militar nga sia gali isa ka Romano hinadlukan sia bangod ginpagapos niya sia.+
30 Gani pagkadason nga adlaw, bangod luyag niya mapat-od kon ngaa ginasumbong sia sang mga Judiyo, ginbuy-an niya sia kag ginsugo niya nga magtipon ang puno nga mga saserdote kag ang bug-os nga Sanhedrin.* Dayon ginpapanaug niya si Pablo kag ginpatindog sa atubangan nila.+
