Bugna 11:1-19
11 Kag ginhatagan ako sing tabun-ak nga kaangay sa sungkod*+ kag nagsiling sia: “Tindog ka kag taksa ang santuaryo sang templo sang Dios kag ang halaran kag ang mga nagasimba sa sini.
2 Apang nahanungod sa luwang sa gua sang santuaryo sang templo, pabay-i ini sing bug-os kag indi ini pagtaksa, bangod ginhatag ini sa mga pungsod, kag tasakon nila ang balaan nga siudad+ sa sulod sang 42 ka bulan.+
3 Suguon ko ang akon duha ka saksi nga magpanagna sa sulod sang 1,260 ka adlaw nga nagasuksok sang sako.”
4 Ginasimbulo sila sang duha ka kahoy nga olibo+ kag sang duha ka kandelero+ kag nagatindog sila sa atubangan sang Ginuo sang duta.+
5 Kon may luyag maghalit sa ila, nagagua ang kalayo sa ila baba kag ginalamon ang ila mga kaaway. Ang luyag maghalit sa ila dapat patyon sa sini nga paagi.
6 May awtoridad sila sa pagtakop sa langit,+ agod indi mag-ulan+ sa mga adlaw sang ila pagpanagna, may awtoridad sila nga himuon ang tubig nga dugo,+ kag may awtoridad sila nga halitan ang duta paagi sa tanan nga sahi sang kalalat-an sing masunson suno sa luyag nila.
7 Kon matapos na nila ang ila pagpanaksi, ang mabangis nga sapat nga nagtakas halin sa kadadalman magapakig-away sa ila kag magadaug sa ila kag magapatay sa ila.+
8 Kag ang ila mga bangkay magahamyang sa mayor nga dalan sang daku nga siudad nga sa espirituwal nga kahulugan ginatawag nga Sodoma kag Egipto, diin ginpatay man sa usok ang ila Ginuo.
9 Sa sulod sang tatlo ka adlaw kag tunga+ magatulok sa ila mga bangkay ang mga katawhan, mga tribo, mga hambal, kag mga pungsod, kag indi nila pagtugutan nga ilubong ang ila mga bangkay.
10 Kag ang mga nagaistar sa duta magakasadya kag magakinalipay tungod sa ila, kag magapadala sila sang mga regalo sa isa kag isa, bangod ginpaantos sining duha ka manalagna ang mga nagaistar sa duta.
11 Pagkatapos sang tatlo ka adlaw kag tunga, ang espiritu sang kabuhi halin sa Dios nagsulod sa ila,+ kag nagtindog sila, kag hinadlukan gid ang mga nakakita sa ila.
12 Kag nabatian nila ang mabaskog nga tingog halin sa langit nga nagsiling sa ila: “Saka kamo diri.” Kag nagsaka sila sa langit sa panganod, kag nakita* sila sang ila mga kaaway.
13 Sa amo nga oras naglinog sing mabaskog, kag napukan ang ikanapulo nga bahin sang siudad; kag 7,000 ka tawo ang napatay sa linog, kag ang nabilin hinadlukan kag naghimaya sa Dios sang langit.
14 Natapos na ang ikaduha nga kailo.+ Yari karon! Ang ikatlo nga kailo magaabot gilayon.
15 Ginpatunog sang ikapito nga anghel ang iya trumpeta.+ Kag may mabaskog nga mga tingog sa langit, nga nagasiling: “Ang ginharian sang kalibutan nangin Ginharian na sang aton Ginuo+ kag sang iya Cristo,+ kag magagahom sia subong hari tubtob sa wala sing katubtuban.”+
16 Kag ang 24 ka gulang+ nga nagapungko sa ila trono sa atubangan sang Dios naghapa kag nagsimba sa Dios,
17 nga nagasiling: “Nagapasalamat kami sa imo, Jehova* nga Dios, ang Labing Gamhanan, ang isa nga amo karon+ kag amo anay, bangod gingamit mo ang imo daku nga gahom kag nagsugod ka sa paghari.+
18 Apang naakig ang mga pungsod, kag ginpakita mo sa ila ang imo kaakig. Nag-abot man ang imo gintalana nga tion sa paghukom sa mga patay, sa pagpadya+ sa imo mga ulipon nga mga manalagna,+ sa mga balaan, sa mga nagakahadlok sa imo ngalan, sa mga kubos kag sa mga kadalagkuan, kag sa paglaglag sa mga nagalaglag sang duta.”+
19 Kag nabuksan ang santuaryo sang templo sang Dios sa langit, kag nakita ko ang kaban sang iya katipan sa santuaryo sang iya templo.+ Dayon nagdaguob, nagpangilat, naglinog, nag-ulan sing yelo kag nakabati ako sang mga tingog.
