Colosas 2:1-23
2 Kay luyag ko nga mahibaluan ninyo kon daw ano kadaku sang akon pagpanikasog tungod sa inyo kag sa mga yara sa Laodicea+ kag sa tanan nga wala makakita sa akon sing personal.
2 Ini agod malugpayan sila+ kag mahiusa sa gugma+ kag agod matigayon nila ang tanan nga kamanggaran nga resulta sang maathag kag pat-od nga paghangop, kag subong man ang sibu nga ihibalo tuhoy sa sagrado nga likom sang Dios, nga amo ang Cristo.+
3 Natago sing maayo sa iya ang tanan nga bahandi sang kaalam kag ihibalo.+
4 Ginasiling ko ini agod wala sing makadaya sa inyo paagi sa makabuluyok nga mga argumento.
5 Kay bisan indi ko kamo kaupod, yara kamo sa akon hunahuna, kag nagakasadya ako nga makita ang inyo pagkaorganisado+ kag ang inyo malig-on nga pagtuo sa Cristo.+
6 Gani, bangod ginbaton ninyo si Cristo Jesus nga Ginuo, padayon kamo nga maglakat nga nahiusa sa iya.
7 Manggamot kamo kag matukod sing malig-on sa iya+ kag pabakura ang inyo pagtuo+ subong sang gintudlo sa inyo. Kag kabay nga mag-awas ang inyo pagpasalamat sa Dios.+
8 Magbantay kamo nga wala sing makataban sa inyo paagi sa pilosopiya kag wala sing pulos nga daya+ suno sa tradisyon sang mga tawo, suno sa nahauna nga mga butang sang kalibutan kag indi suno sa Cristo;
9 kay ang tanan nga kinaiya sang Dios yara sa iya.+
10 Gani wala sing kulang sa inyo paagi sa iya, nga amo ang ulo sang tanan nga panguluhan kag awtoridad.+
11 Tungod sa inyo kaangtanan sa iya, natuli kamo paagi sa pagtuli nga wala ginhimo sang tawo kundi paagi sa pagkuha sa makasasala nga buhat sang lawas,+ paagi sa pagtuli sa mga alagad sang Cristo.+
12 Kay ginlubong kamo kaupod niya sa iya bawtismo,+ kag paagi sa inyo kaangtanan sa iya ginbanhaw man kamo+ kaupod niya paagi sa inyo pagtuo sa gamhanan nga buhat sang Dios, nga nagbanhaw sa iya gikan sa mga patay.+
13 Dugang pa, bisan patay kamo bangod sa inyo mga paglapas kag wala kamo matuli, ginbuhi kamo sang Dios upod sa iya.+ Mainayuhon nga ginpatawad niya kita sa tanan naton nga paglapas+
14 kag ginpanas ang kasuguan nga ginsulat+ batok sa aton nga nagaunod sang mga mando+ kag nagapakamalaut sa aton.+ Ginkuha niya ini paagi sa paglansang sini sa usok sang pag-antos.*+
15 Ginhublasan niya ang mga panguluhan kag ang mga awtoridad, kag ginpakita niya sa tanan nga gindaug niya sila,+ ginparada niya sila sa iya kadalag-an paagi sa sini.*
16 Gani indi ninyo pagtuguti nga hukman kamo tuhoy sa pagkaon kag sa pag-inom+ ukon may kaangtanan sa kapiestahan ukon sa pagsaulog sa lati+ ukon sa adlaw nga inugpahuway.+
17 Ini nga mga butang landong sang mga butang nga magaabot,+ apang ang katunayan amo ang Cristo.+
18 Indi ninyo pagtuguti nga dingutan kamo sing padya+ sang bisan sin-o nga tawo nga nagakalipay sa pakunokuno nga pagkamapainubuson kag sa pagsimba sang mga anghel, nga “nagapanindugan”* sa mga butang nga iya nakita. Nagapahambog sia nga wala sing nagakaigo nga kabangdanan paagi sa iya tawhanon nga panghunahuna.
19 Ina nga tawo nahamulag sa ulo,+ ang isa nga nagahatag sa lawas sang tanan nga kinahanglanon sini kag nagagamit sa mga lutalutahan kag lanitlanit agod mag-angtanay ang lawas kag magtubo ini paagi sa pagpatubo sang Dios.+
20 Kon napatay kamo kaupod sang Cristo sa nahauna nga mga butang sang kalibutan,+ ngaa nagakabuhi kamo nga daw bahin pa sang kalibutan paagi sa padayon nga pagpasakop sa mga mando:+
21 “Indi mag-uyat, ukon magtilaw, ukon magtandog,”
22 may kaangtanan sa mga butang nga maubos paagi sa pagkaon kag pag-inom suno sa mga sugo kag mga panudlo sang mga tawo?+
23 Ini nga mga mando nga ginapakita paagi sa pagsimba nga naluyagan sang isa kag pakunokuno nga pagkamapainubuson, tuman nga pagdingot sa kaugalingon,+ daw maalamon, apang wala sing mabulig sa pagbato sa handum sang unod.
