Ester 7:1-10
7 Gani ang hari kag si Haman+ nagkadto sa sinalusalo nga ginhanda ni Rayna Ester.
2 Sang ikaduha nga adlaw, sang tion sang sinalusalo sang alak, nagsiling liwat ang hari kay Ester: “Ano bala ang luyag mo nga pangayuon, Rayna Ester? Bisan pa pangayuon mo ang katunga sang akon ginharian, ihatag ko ini sa imo!”+
3 Nagsabat si Rayna Ester: “Kon nahamuot ka sa akon, O hari, kag kon buot mo, ginapangabay ko nga ihatag mo sa akon ang akon kabuhi* kag ang akon katawhan.+
4 Kay ako kag ang akon katawhan ginbaligya+ agod papason.+ Kon ginbaligya lang kami sa pagkaulipon, mahipos na lang kuntani ako. Apang indi ini dapat pagtugutan nga mahanabo kay makahalit man ini sa hari.”
5 Kag namangkot si Hari Ahasuero kay Rayna Ester: “Sin-o ang nangahas sa paghimo sina kag diin sia?”
6 Nagsabat si Ester: “Ang amon kaaway amo ining malaut nga si Haman.”
Kag hinadlukan gid si Haman sa hari kag sa rayna.
7 Naakig gid ang hari, gani nagbiya sia sa sinalusalo kag nagkadto sa hardin sang palasyo, apang nagpabilin si Haman agod magpakiluoy kay Rayna Ester para sa iya kabuhi,* kay napat-od niya nga silutan gid sia sang hari.
8 Nagbalik ang hari sa sinalusalo halin sa hardin sang palasyo kag nakita niya si Haman nga nagahapaon sa hiligdaan nga nahamtangan ni Ester. Nagsiling ang hari: “Luguson man bala niya ang rayna sa akon mismo balay?” Pagkahambal sini sang hari, gintabunan nila ang guya ni Haman.
9 Dayon si Harbona,+ nga isa sang mga opisyal sa palasyo sang hari, nagsiling: “Nagpahimo man si Haman sing usok para kay Mardoqueo,+ nga nagsugid sang balita agod maluwas ang hari.+ Malapit ini sa balay ni Haman kag may kataason nga 50 ka maniko.”* Kag nagsugo ang hari: “Bitaya ninyo sia didto.”
10 Gani, ginbitay nila si Haman sa usok nga ginpahimo niya para kay Mardoqueo, kag nag-ugdaw ang kaakig sang hari.
