Ezequiel 25:1-17
25 Nagsiling pa si Jehova sa akon:
2 “Anak sang tawo, atubanga ang mga Ammonhon,+ kag magpanagna ka batok sa ila.+
3 Dapat mo isiling sa mga Ammonhon, ‘Pamatii ang ginsiling sang Soberanong Ginuong Jehova. Amo ini ang ginasiling sang Soberanong Ginuong Jehova: “Bangod nalipay ka nga ginpasipalahan ang akon santuaryo kag ginlaglag ang Israel kag ginbihag ang panimalay sang Juda,
4 ihatag ko ikaw sa mga taga-Sidlangan kag panag-iyahan ka nila. Magapatindog sila sa imo sing napaderan nga mga kampo kag magatukod sila sa imo sang ila mga balay. Kaunon nila ang imo bunga, kag imnon nila ang imo gatas.
5 Himuon ko ang Raba+ nga halalban sang mga kamelyo kag ang mga siudad sang mga Ammonhon nga lugar nga palahuwayan sang panong; kag makilala mo nga ako amo si Jehova.”’”
6 “Kay amo ini ang ginasiling sang Soberanong Ginuong Jehova: ‘Bangod nagpamalakpak+ kag nagpudagpudag ka* sa kasadya sa pagtamay sa Israel,+
7 untayon ko ang akon kamot batok sa imo, kag ihatag ko ikaw sa mga pungsod nga magaagaw sang imo mga pagkabutang. Laglagon ko ikaw agod indi ka na mangin isa ka pungsod.+ Papason ko ikaw, kag makilala mo nga ako amo si Jehova.’
8 “Amo ini ang ginasiling sang Soberanong Ginuong Jehova: ‘Bangod nagsiling ang Moab+ kag Seir,+ “Ang panimalay sang Juda kaangay sang iban nga mga pungsod,”
9 gani ipasalakay ko ang mga siudad nga yara sa banglid* sang Moab nga yara sa iya dulunan, ang katahom* sang iya duta, ang Bet-jesimot, Baal-meon, kag Kiryataim.+
10 Ihatag ko ini upod ang mga Ammonhon subong butang nga panag-iyahan sang mga taga-Sidlangan,+ agod ang mga Ammonhon indi na pagdumdumon sang mga pungsod.+
11 Silutan ko ang Moab,+ kag makilala nila nga ako amo si Jehova.’
12 “Amo ini ang ginasiling sang Soberanong Ginuong Jehova: ‘Nagtimalos ang Edom sa panimalay sang Juda kag bangod sini nakahimo sila sing daku nga sala;+
13 gani amo ini ang ginasiling sang Soberanong Ginuong Jehova: “Untayon ko man ang akon kamot batok sa Edom kag laglagon ang iya katawhan kag kasapatan, kag himuon ko ini nga kamingawan.+ Halin sa Teman tubtob sa Dedan, mapatay sila sa espada.+
14 ‘Magatimalos ako sa Edom paagi sa akon katawhan nga Israel.+ Silutan nila ang Edom suno sa akon daku nga kaakig, agod mabatyagan nila ang akon pagtimalos,’+ siling sang Soberanong Ginuong Jehova.”’
15 “Amo ini ang ginasiling sang Soberanong Ginuong Jehova: ‘Bangod sang madugay na nga dumot sang mga Filistinhon sa Israel, luyag gid nila timalusan kag laglagon ini.+
16 Gani, amo ini ang ginasiling sang Soberanong Ginuong Jehova: “Untayon ko ang akon kamot batok sa mga Filistinhon,+ kag laglagon ko ang mga Keretnon+ kag ang mga nabilin nga nagaistar sa baybayon.+
17 Silutan ko sila kag timalusan sa daku nga kaakig, kag kon matimalusan ko na sila, makilala nila nga ako amo si Jehova.”’”
