Ezequiel 35:1-15
-
Tagna batok sa kabukiran sang Seir (1-15)
35 Nagsiling pa si Jehova sa akon:
2 “Anak sang tawo, mag-atubang ka sa kabukiran sang Seir,+ kag magpanagna ka batok sa sini.+
3 Isiling mo, ‘Amo ini ang ginasiling sang Soberanong Ginuong Jehova: “Batok ako sa imo, O kabukiran sang Seir, kag untayon ko ang akon kamot batok sa imo kag himuon ka nga kamingawan.+
4 Himuon ko nga kagulub-an ang imo mga siudad, kag ikaw mangin kamingawan;+ kag makilala mo nga ako amo si Jehova.
5 Kay madugay na nga ginadumtan mo ang mga Israelinhon,+ kag gintugyan mo sila sa espada sang tion sang ila kalisdanan, sang tion sang ila katapusan nga silot.”’+
6 “‘Subong nga buhi ako,’ siling sang Soberanong Ginuong Jehova, ‘ihanda ko kamo para sa pagpaagay sing dugo kag ang pagpaagay sing dugo magalagas sa imo.+ Bangod gindumtan mo ang dugo, ang pagpaagay sing dugo magalagas sa imo.+
7 Himuon ko nga kamingawan ang kabukiran sang Seir,+ kag patyon ko ang nagalabay kag ang nagabalik didto.
8 Pun-on ko ang kabukiran sing mga napatay; magakalapukan ang mga napatay sa espada sa imo kabakuluran, sa mga nalupyakan, kag sa mga sapa.
9 Himuon ko ikaw nga kamingawan sa wala sing katubtuban, kag ang imo mga siudad indi na pag-istaran;+ kag makilala mo nga ako amo si Jehova.’
10 “Bangod nagsiling ka, ‘Mangin akon ining duha ka pungsod, kag panag-iyahan namon ining duha ka duta,’+ bisan pa yara didto si Jehova,
11 ‘gani subong nga buhi ako,’ siling sang Soberanong Ginuong Jehova, ‘pakig-angutan ko ikaw suno sa kaakig, kahisa, kag dumot nga ginpakita mo sa ila;+ kag ipakilala ko ang akon kaugalingon sa ila kon mahukman ko na ikaw.
12 Mahibaluan mo nga ako mismo, si Jehova, ang nakabati sang tanan mo nga pagpakamalaut sa kabukiran sang Israel, sang nagsiling ka, “Nalaglag na sila kag ginhatag sa amon agod lamunon.”*
13 Kag nagpabugal ka kag madamo sing ginpanghambal batok sa akon.+ Nabatian ko ini tanan.’
14 “Amo ini ang ginasiling sang Soberanong Ginuong Jehova: ‘Magakalipay ang bug-os nga duta kon laglagon ko ikaw.
15 Subong nga nagkalipay ka sang ginlaglag ang duta nga ginpanubli sang panimalay sang Israel, amo man sina ang himuon ko sa imo.+ Mangin kagulub-an ka, O kabukiran sang Seir, ang bug-os nga Edom;+ kag makilala nila nga ako amo si Jehova.’”
Footnote
^ Sa literal, “subong pagkaon.”
