Hageo 1:1-15
1 Sang ikaduha nga tuig sang paggahom ni Hari Dario, sang nahauna nga adlaw sang ikan-om nga bulan, may mensahe si Jehova kay Hageo*+ nga manalagna para sa gobernador sang Juda nga si Zorobabel+ nga anak ni Sealtiel kag para sa mataas nga saserdote nga si Josue nga anak ni Jehozadak, nga nagasiling:
2 “Amo ini ang ginasiling ni Jehova sang mga kasuldadusan, ‘Nagasiling ini nga katawhan, “Indi pa ini ang tion nga patindugon* ang balay* ni Jehova.”’”+
3 Kag nagsiling liwat si Jehova kay Hageo+ nga manalagna:
4 “Tion bala ini nga mag-istar kamo sa inyo matahom nga mga balay samtang guba ang akon balay?+
5 Amo ini ang ginasiling ni Jehova sang mga kasuldadusan, ‘Binagbinaga ang* inyo mga dalanon.
6 Madamo kamo sang ginsab-ug, apang diutay lang ang inyo naani.+ Nagakaon kamo, apang wala kamo nagakabusog. Nagainom kamo, apang indi ini bastante sa inyo.* May bayo kamo, apang ginatugnawan gihapon kamo. Ang trabahador nagasulod sang iya sueldo sa suludlan nga madamo sing buslot.’”
7 “Amo ini ang ginasiling ni Jehova sang mga kasuldadusan, ‘Binagbinaga ang* inyo mga dalanon.’
8 “‘Magtaklad kamo sa bukid, kag magkuha kamo sing mga kahoy.+ Patinduga ninyo ang akon balay,+ agod malipay ako kag mahimaya ako,’+ siling ni Jehova.”
9 “‘Daku nga ani ang inyo ginpaabot apang diutay lang ang inyo naani. Sang gindala ninyo ini sa inyo balay, ginhuyop ko ini agod maglapta.+ Ngaa?’ siling ni Jehova sang mga kasuldadusan. ‘Bangod guba gihapon ang akon balay, samtang ang tagsatagsa sa inyo masako sa pag-atipan sang inyo balay.+
10 Gani ginpunggan sang langit ang paghatag sing tun-og sa inyo kag wala na magpatubas ang duta.
11 Nagpadala ako sing tigpalamangag sa duta, sa kabukiran, sa mga uyas, sa bag-o nga alak, sa lana, sa patubas sang duta, sa mga tawo, sa mga sapat, kag sa tanan nga ginpangabudlayan sang inyo mga kamot.’”
12 Si Zorobabel+ nga anak ni Sealtiel,+ ang mataas nga saserdote nga si Josue nga anak ni Jehozadak,+ kag ang tanan nga katawhan nga nagbalik halin sa pagkabihag nagpamati kay Jehova nga ila Dios kag sa ginsiling ni Hageo nga manalagna, kay ginpadala sia ni Jehova nga ila Dios; kag ang katawhan nagkahadlok kay Jehova.
13 Dayon ginsugid ni Hageo nga mensahero ni Jehova ini nga mensahe halin kay Jehova para sa katawhan: “‘Kaupod ninyo ako,’+ siling ni Jehova.”
14 Gani ginpahulag+ ni Jehova ang gobernador sang Juda+ nga si Zorobabel nga anak ni Sealtiel kag ang mataas nga saserdote nga si Josue+ nga anak ni Jehozadak kag ang tanan nga katawhan nga nagbalik halin sa pagkabihag; kag nagkadto sila kag ginpatindog nila liwat ang balay ni Jehova sang mga kasuldadusan nga ila Dios.+
15 Gin-umpisahan nila ini sang ika-24 nga adlaw sang ikan-om nga bulan sang ikaduha nga tuig sang paggahom ni Hari Dario.+
Footnote
^ Buot silingon, “Natawo sa isa ka Kapiestahan.”
^ Ukon “patindugon liwat.”
^ Ukon “templo.”
^ Ukon “Ipahamtang ang inyo tagipusuon sa.”
^ Sa literal, “indi tubtob nga mahubog.”
^ Ukon “Ipahamtang ang inyo tagipusuon sa.”
