Hukom 1:1-36
1 Sang napatay na si Josue,+ namangkot ang mga Israelinhon* kay Jehova:+ “Sin-o sa amon ang una nga makig-away sa mga Canaanhon?”
2 Nagsabat si Jehova: “Ang tribo ni Juda.+ Ginatugyan* ko ang duta sa ila kamot.”
3 Dayon nagsiling si Juda kay Simeon nga iya utod: “Updi ako sa teritoryo nga ginhatag sa akon*+ kag buligi ako sa pagpakig-away sa mga Canaanhon, kag buligan ko man ikaw sa teritoryo nga ginhatag sa imo.” Gani nag-upod sa iya si Simeon.
4 Nagsalakay ang tribo ni Juda kag gintugyan sa ila ni Jehova ang mga Canaanhon kag ang mga Pereznon,+ kag napierde nila ang 10,000 ka lalaki sa Bezek.
5 Nakita nila si Adoni-bezek sa Bezek, kag nagpakig-away sila sa iya kag napierde nila ang mga Canaanhon+ kag ang mga Pereznon.+
6 Sang malagyo si Adoni-bezek, ginlagas nila sia kag nadakpan nila sia. Dayon gin-utod nila ang iya mga kumalagko sa kamot kag sa tiil.
7 Nagsiling si Adoni-bezek: “Ginpang-utdan ko ang 70 ka hari sing mga kumalagko sa kamot kag sa tiil kag nagapamulot sila sing pagkaon sa idalom sang akon lamesa. Ginhimo man sang Dios sa akon ang ginhimo ko sa ila.” Pagkatapos sini, gindala nila sia sa Jerusalem+ kag napatay sia didto.
8 Ginsalakay man sang tribo ni Juda ang Jerusalem+ kag nasakop nila ini. Ginpamatay nila ang katawhan sini paagi sa espada kag ginsunog nila ang siudad.
9 Pagkatapos sini, ginsalakay sang tribo ni Juda ang mga Canaanhon nga nagaistar sa kabukiran kag sa Negeb kag sa Sepela.+
10 Ginsalakay sang tribo ni Juda ang mga Canaanhon nga nagaistar sa Hebron (gintawag sadto ang Hebron nga Kiryat-arba), kag ginpatay nila si Sesai, si Ahiman, kag si Talmai.+
11 Halin didto, ginsalakay nila ang mga pumuluyo sang Debir.+ (Ang ngalan anay sang Debir amo ang Kiryat-sefer.)+
12 Dayon nagsiling si Caleb:+ “Ipaasawa ko ang akon anak nga si Acsa sa tawo nga magsalakay kag magsakop sa Kiryat-sefer.”+
13 Kag nasakop ini ni Otniel+ nga anak ni Kenaz+ nga manghod ni Caleb. Gani ginpaasawa ni Caleb ang iya anak nga si Acsa kay Otniel.
14 Sang nagapauli na si Acsa, ginsilingan niya ang iya bana nga mangayo sila sing uma sa iya amay. Sang nagpanaug sia sa iya asno,* ginpamangkot sia ni Caleb: “Ano ang kinahanglan mo?”
15 Nagsabat sia: “Palihug, pakamaayuha ako, kag ihatag man sa akon ang Gullot-maim,* kay kigas nga duta ang ginhatag mo sa akon sa bagatnan.”* Gani ginhatag ni Caleb sa iya ang Takas nga Gullot kag ang Naubos nga Gullot.
16 Halin sa siudad sang mga palma,+ ang mga kaliwat sang Kenhanon+ nga ugangan ni Moises+ nagkadto sa kamingawan sang Juda sa bagatnan sang Arad+ upod ang katawhan ni Juda. Kag nag-istar sila upod sa mga tawo didto.+
17 Apang ginsalakay ni Juda kag sang iya utod nga si Simeon ang mga Canaanhon nga nagaistar sa Sefat kag ginlaglag nila ini.+ Gani gintawag nila ang siudad nga Horma.*+
18 Dayon ginsakop ni Juda ang Gaza+ kag ang teritoryo sini, ang Askelon+ kag ang teritoryo sini, kag ang Ekron+ kag ang teritoryo sini.
19 Kaupod sang tribo ni Juda si Jehova, gani nasakop nila ang kabukiran, apang indi nila matabog ang mga pumuluyo sa kapatagan,* bangod may mga kangga sila sa inaway nga ang mga ruweda sini may nagalabaw nga matalom nga mga salsalon.*+
20 Ginhatag nila kay Caleb ang Hebron suno sa ginsaad ni Moises,+ kag gintabog niya didto ang tatlo ka anak ni Anak.+
21 Apang wala gintabog sang mga Benjaminhon ang mga Jebusnon nga nagaistar sa Jerusalem, gani padayon nga nagaistar ang mga Jebusnon upod sa mga Benjaminhon sa Jerusalem tubtob sini nga adlaw.+
22 Sa sini man nga tion, ginsalakay sang tribo ni Jose+ ang Betel, kag si Jehova kaupod nila.+
23 Nagpangespiya ang tribo ni Jose sa Betel (ini nga siudad gintawag sadto nga Luz),+
24 kag nakita sang mga espiya ang isa ka lalaki nga nagapagua sa siudad. Gani nagsiling sila sa iya: “Palihug, itudlo sa amon ang dalan pasulod sa siudad, kag pakitaan ka namon sing kaayo.”*
25 Gani gintudlo sa ila sang lalaki ang dalan pasulod sa siudad, kag ginpamatay nila ang katawhan sa siudad paagi sa espada, apang wala nila ginpatay ang lalaki kag ang iya bug-os nga pamilya.+
26 Nagkadto ang lalaki sa duta sang mga Hethanon kag nagtukod sia sing siudad didto kag gintawag ini nga Luz. Amo ini ang ngalan sini tubtob sini nga adlaw.
27 Wala masakop ni Manases ang Bet-sean kag ang sakop* nga mga banwa sini, ang Taanac+ kag ang sakop nga mga banwa sini, ang mga pumuluyo sang Dor kag ang sakop nga mga banwa sini, ang mga pumuluyo sang Ibleam kag ang sakop nga mga banwa sini, kag ang mga pumuluyo sang Megiddo kag ang sakop nga mga banwa sini.+ Nagpabilin sa pag-istar ang mga Canaanhon sa sini nga duta.
28 Sang gamhanan na ang Israel, gin-ulipon nila ang mga Canaanhon sa pagpangabudlay para sa ila,+ apang wala nila sila tanan matabog.+
29 Wala man gintabog ni Efraim ang mga Canaanhon nga nagaistar sa Gezer. Padayon nga nag-istar ang mga Canaanhon upod sa ila sa Gezer.+
30 Wala gintabog ni Zebulon ang mga pumuluyo sang Kitron kag ang mga pumuluyo sang Nahalol.+ Padayon nga nag-istar ang mga Canaanhon upod sa ila kag gin-ulipon nila sila sa pagpangabudlay para sa ila.+
31 Wala gintabog ni Aser ang mga pumuluyo sang Acco kag ang mga pumuluyo sang Sidon,+ Alab, Aczib,+ Helba, Afik,+ kag Rehob.+
32 Gani ang mga Asernon padayon nga nag-istar upod sa mga Canaanhon sa sini nga duta, bangod wala nila sila gintabog.
33 Wala gintabog ni Neptali ang mga pumuluyo sang Bet-semes kag ang mga pumuluyo sang Bet-anat,+ kundi padayon sila nga nag-istar upod sa mga Canaanhon sa sini nga duta.+ Gin-ulipon nila ang mga pumuluyo sang Bet-semes kag sang Bet-anat sa pagpangabudlay para sa ila.
34 Wala gintugutan sang mga Amornon ang mga Danhanon nga magdulhog sa kapatagan,* gani napilitan sila nga mag-istar sa kabukiran.+
35 Gani nagpabilin ang mga Amornon sa pag-istar sa Bukid Heres, sa Aijalon,+ kag sa Saalbim.+ Apang sang nagbaskog* pa ang gahom* sang tribo ni Jose, gin-ulipon nila sila sa pagpangabudlay para sa ila.
36 Ang teritoryo sang mga Amornon halin sa taklaron sang Akrabim,+ kag halin sa Sela pataklad.
Footnote
^ Sa literal, “mga anak ni Israel.”
^ Ukon “Gintugyan.”
^ Sa literal, “sa akon parte paagi sa pagabutgabot.”
^ Ukon mahimo, “namalakpak sia samtang nagasakay sa asno.”
^ Buot silingon, “Mga Lugar nga May Tubig.”
^ Ukon “Negeb.”
^ Buot silingon, “Lugar nga Dapat Laglagon.”
^ Ukon “manubo nga patag.”
^ Sa literal, “may mga kangga sila nga salsalon.”
^ Sa literal, “sing mainunungon nga gugma.”
^ Ukon “sa palibot.”
^ Ukon “manubo nga patag.”
^ Sa literal, “nagbug-at.”
^ Sa literal, “kamot.”
