Hukom 12:1-15
12 Dayon nagtipon ang mga lalaki sang Efraim, kag nagtabok sila sa Safon* kag nagsiling sila kay Jefte: “Ngaa wala mo kami gintawag agod mag-upod sa imo sang nagtabok ka sa pagpakig-away sa mga Ammonhon?+ Sunugon ka namon upod sa imo balay.”
2 Apang nagsiling si Jefte sa ila: “Nagpakig-away ako upod sa akon katawhan batok sa mga Ammonhon. Nangayo ako sing bulig sa inyo, apang wala ninyo ako ginluwas batok sa ila.
3 Sang mahibaluan ko nga indi ninyo ako pagbuligan, ginbutang ko sa katalagman ang akon kabuhi* kag nagpakig-away ako sa mga Ammonhon+ kag gintugyan sila ni Jehova sa akon. Gani, ngaa nagkadto kamo subong nga adlaw agod magpakig-away sa akon?”
4 Gintipon dayon ni Jefte ang tanan nga lalaki sang Gilead,+ kag nagpakig-away sila sa Efraim. Ginpierde sang mga lalaki sang Gilead ang Efraim, nga nagsiling sadto: “Kamo nga mga Gileadnon sa Efraim kag sa Manases, mga laaslaas lamang kamo halin sa Efraim.”
5 Ginsakop sang Gilead ang manabaw nga bahin sang Jordan+ sa atubangan sang Efraim; kag kon magtinguha sa pagpalagyo ang mga lalaki sang Efraim, nagasiling sila, “Patabuka ako”; dayon ginapamangkot sang mga lalaki sang Gilead ang kada isa, “Efraimnon ka bala?” Kon magsabat sia, “Indi!”
6 nagasiling sila sa iya, “Palihug isiling ang Shibolet.” Apang nagasiling sia, “Sibolet,” kay indi niya mamitlang sing husto ang tinaga. Dayon ginadakop nila sia kag ginapatay sa manabaw nga bahin sang Jordan. Gani 42,000 ka Efraimnon ang napatay sadto nga tion.
7 Naghukom si Jefte sa Israel sa sulod sang anom ka tuig. Pagkatapos sini, napatay si Jefte nga Gileadnon kag ginlubong sia sa iya siudad sa Gilead.
8 Pagkatapos niya, si Ibzan nga taga-Betlehem amo ang naghukom sa Israel.+
9 May 30 sia ka anak nga lalaki kag 30 ka anak nga babayi. Ginsugo niya ang iya mga anak nga babayi nga magpamana sa mga indi nila paryente, kag nagkuha sia sing 30 ka babayi nga indi nila paryente kag ginpaasawa sa iya mga anak nga lalaki. Naghukom sia sa Israel sa sulod sang pito ka tuig.
10 Sang ulihi, napatay si Ibzan kag ginlubong sia sa Betlehem.
11 Pagkatapos niya, si Elon nga Zebulonhon amo ang naghukom sa Israel sa sulod sang napulo ka tuig.
12 Sang ulihi, napatay si Elon nga Zebulonhon kag ginlubong sia sa Aijalon sa duta sang Zebulon.
13 Pagkatapos niya, si Abdon nga anak ni Hilel nga Piratonhon amo ang naghukom sa Israel.
14 May 40 sia ka anak nga lalaki kag 30 ka apo nga lalaki nga nagasakay sa 70 ka asno. Naghukom sia sa Israel sa sulod sang walo ka tuig.
15 Sang ulihi, napatay si Abdon nga anak ni Hilel nga Piratonhon kag ginlubong sia sa Piraton sa duta sang Efraim sa bukid sang Amaleknon.+
Footnote
^ Ukon mahimo, “nagtabok sila paaminhan.”
^ Ukon “ginbutang ko ang akon kalag sa akon kamot.”
