Hukom 14:1-20
14 Dayon nagkadto si Samson sa Timna kag may nakita sia sa Timna nga isa ka Filistinhon nga babayi.*
2 Gani naglakat sia kag ginsugiran niya ang iya amay kag iloy: “May nakita ako sa Timna nga isa ka babayi nga Filistinhon, kag luyag ko nga kuhaon ninyo sia agod mangin asawa ko.”
3 Apang nagsiling ang iya amay kag ang iya iloy sa iya: “Wala ka bala sing nakita nga babayi sa imo mga paryente kag sa aton katawhan?+ Dapat ka bala magkuha sing palangasaw-on sa wala matuli nga mga Filistinhon?” Apang nagsiling si Samson sa iya amay: “Kuhaa ninyo sia para sa akon, bangod sia ang akon naluyagan.”*
4 Wala makahibalo ang iya amay kag iloy nga paagi ini ni Jehova, kay nagapangita Sia sing kahigayunan batok sa mga Filistinhon, bangod ginagamhan sang mga Filistinhon ang Israel sadto nga tion.+
5 Gani nagkadto si Samson sa Timna upod sa iya amay kag iloy. Sang nakalab-ot sia sa mga ulubasan sang Timna, ginsugata sia sang isa ka nagangurob nga leon.*
6 Dayon ginhatagan sia sang espiritu ni Jehova sing kusog+ kag napihak sang iya mga kamot ang leon nga daw nagapihak lang sia sing tinday nga kanding. Apang wala niya ini ginsugid sa iya amay kag iloy.
7 Dayon nagkadto sia sa babayi kag nagpakighambal sa iya, kag sia gihapon ang naluyagan ni Samson.+
8 Sang ulihi, sang nagbalik sia agod dalhon ang babayi sa ila balay,+ nagsipak sia sa dalan agod tan-awon ang leon nga ginpatay niya, kag nakita niya ang nagapunsok nga putyukan kag dugos sa patay nga leon.
9 Gani ginkagos niya ang dugos kag ginbutang sa iya mga palad kag ginkaon ini samtang nagalakat sia. Sang nagkit-anay sila sang iya amay kag iloy, ginhatagan niya sila kag nagkaon man sila. Apang wala niya sila ginsugiran nga ginkagos niya ang dugos sa patay nga leon.
10 Nagkadto si Samson kag ang iya amay sa babayi, kag naghiwat si Samson sing sinalusalo didto, kay amo ini ang kinaandan nga ginahimo sang kalaslon nga mga nobyo.
11 Sang makita nila sia, ginhatagan nila sia sing 30 ka abay nga lalaki agod mag-upod sa iya.
12 Dayon nagsiling si Samson sa ila: “May ipapakot ako sa inyo. Kon mapakot ninyo ini sa sulod sang pito ka adlaw nga sinalusalo, hatagan ko kamo sing 30 ka linen nga bayo kag 30 ka ilislan nga bayo.
13 Apang kon indi ninyo ini mapakot, kamo ang maghatag sa akon sing 30 ka linen nga bayo kag 30 ka ilislan nga bayo.” Nagsiling sila sa iya: “Ihambal sa amon ang imo paktakon.”
14 Gani nagsiling sia sa ila:
“Halin sa nagapangaon, naggua ang pagkaon,Kag halin sa makusog, naggua ang matam-is.”+
Wala nila mapakot ang paktakon sa sulod sang tatlo ka adlaw.
15 Sang ikap-at nga adlaw, ginsilingan nila ang asawa ni Samson: “Hayluha ang imo bana+ agod isugid niya ang sabat sa paktakon. Kay kon indi, sunugon ka namon kag ang panimalay sang imo amay. Gin-agda bala ninyo kami diri agod kuhaon ang amon mga pagkabutang?”
16 Gani ang asawa ni Samson naghibi sa iya kag nagsiling: “Akig ka sa akon; kag wala mo ako ginahigugma.+ May ginpapakot ka sa akon katawhan, apang wala mo ginsugid sa akon ang sabat.” Nagsiling sia sa iya: “Wala ko gani ini ginsugid sa akon amay kag iloy! Dapat ko bala isugid ini sa imo?”
17 Apang padayon sia nga naghibi sa sulod sang pito ka adlaw nga sinalusalo. Sang ikapito nga adlaw ginsugid na lang niya sa iya ang sabat, kay nagpamilit gid sia. Dayon ginsugid niya ang sabat sang paktakon sa iya katawhan.+
18 Gani sang ikapito nga adlaw, antes magtunod ang adlaw,* ang mga lalaki sang siudad nagsiling sa iya:
“Ano ang mas matam-is sangsa dugos,Kag ano ang mas makusog sangsa leon?”+
Nagsabat sia sa ila:
“Kon wala ninyo gingamit sa pag-arado ang akon bakiya nga baka,*+Wala ninyo kuntani mapakot ang akon paktakon.”
19 Dayon ginhatagan sia sang espiritu ni Jehova sing kusog,+ kag nagkadto sia sa Askelon+ kag ginpatay niya ang 30 ka tawo kag ginkuha ang ila bayo kag ginhatag niya ang ila bayo sa mga nagsabat sang paktakon.+ Akig gid sia nga nagbalik sa balay sang iya amay.
20 Dayon ang asawa ni Samson+ ginhatag sa isa sang iya mga abay nga lalaki nga nag-upod sa iya.+
Footnote
^ Sa literal, “isa ka babayi sa mga anak nga babayi sang mga Filistinhon.”
^ Sa literal, “sia ang nagakadapat sa akon panulok.”
^ Ukon “may bungaybungay nga bataon nga leon.”
^ Ukon mahimo, “antes sia magsulod sa kuarto.”
^ Ginhaylo nila ang iya asawa.
