Hukom 7:1-25
7 Si Jerubaal, nga amo si Gideon,+ kag ang tanan nga katawhan nga kaupod niya, naglakat sing temprano pa kag nagkampo sila sa Tuburan sang Harod, samtang ang kampo sang Midian yara sa aminhan niya sa bakulod sang More sa nalupyakan.*
2 Nagsiling si Jehova kay Gideon: “Tuman kadamo sang katawhan nga upod mo. Kon itugyan ko ang Midian sa ila,+ basi magpabugal ang Israel kag magsiling sa akon, ‘Ako ang nagluwas sa akon kaugalingon.’+
3 Palihug silinga ang katawhan, ‘Magpauli ang bisan sin-o nga nahadlok kag nagakurog.’ ”+ Sang ginsiling ini ni Gideon sa katawhan agod tilawan sila, 22,000 ka tawo ang nagpauli, kag 10,000 ang nabilin.
4 Apang nagsiling si Jehova kay Gideon: “Tuman kadamo gihapon ang katawhan. Pakadtua sila sa sapa agod matilawan ko sila didto. Kon magsiling ako, ‘Ini sia magaupod sa imo,’ paupdon mo sia, apang kon magsiling ako, ‘Ini sia indi magaupod sa imo,’ indi mo sia pagpaupdon.”
5 Gani gindala niya ang katawhan sa sapa.
Dayon nagsiling si Jehova kay Gideon: “Painon mo ang tanan nga nagakandos sang tubig sa ila kamot kag ginainom ini pareho sang paglaklak sang ido, kag painon mo man ang tanan nga nagaluhod kon nagainom.”
6 Ang kadamuon sang nag-inom sa ila kamot 300 ka tawo. Kag ang iban nagluhod sa pag-inom sing tubig.
7 Nagsiling si Jehova kay Gideon: “Luwason ko kamo paagi sa 300 ka tawo nga nag-inom sa ila kamot, kag itugyan ko sa imo ang Midian.+ Apang papaulion mo ang iban.”
8 Gani pagkatapos nila makuha sa katawhan ang ila mga balon kag mga budyong, ginpapauli niya ang iban nga katawhan sang Israel, apang ginhawiran niya ang 300 ka tawo. Ang kampo sang Midian yara sa ubos nila sa nalupyakan.+
9 Sina nga gab-i, nagsiling si Jehova sa iya: “Maghanda ka kag salakaya ang kampo, kay itugyan ko ini sa imo.+
10 Apang kon nahadlok ka magsalakay, magdulhog ka anay sa kampo upod sa imo alagad nga si Pura.
11 Pamatian mo kon ano ang ila ginahambal, kag pagkatapos sini mangin maisog ka na* sa pagsalakay sa kampo.” Gani nagdulhog sila ni Pura nga iya alagad malapit sa nagakampo nga mga soldado.
12 Ang Midian, ang Amalek, kag ang tanan nga taga-Sidlangan+ daw panong sang mga apan kadamo sa nalupyakan, kag indi maisip ang ila mga kamelyo,+ nga pareho kadamo sang mga balas sa baybayon.
13 Pag-abot ni Gideon, nabatian niya ang isa ka tawo nga nagasugid sang iya damgo sa iya kaupod: “Nagdamgo ako. May nakita ako nga tipulon nga tinapay nga sebada nga nagaligid pakadto sa kampo sang Midian. Dayon naigo sini ang isa ka tolda. Natumba gid ang tolda+ kag nagbaliskad ini kag nawasak.”
14 Nagsabat ang iya kaupod: “Espada ini ni Gideon+ nga anak ni Joas, nga isa ka Israelinhon. Gintugyan sa iya sang Dios ang Midian kag ang bug-os nga kampo.”+
15 Sang mabatian ni Gideon ang tawo nga nagasugid sang iya damgo kag ang kahulugan sini,+ nagyaub sia sa Dios. Pagkatapos sini, nagbalik sia sa kampo sang Israel kag nagsiling sia: “Lakat kamo, kay ginatugyan sa inyo ni Jehova ang kampo sang Midian.”
16 Dayon gintunga niya ang 300 ka tawo sa tatlo ka tropa kag ginhatagan sila tanan sing mga budyong+ kag sing dalagku nga mga tibod nga may mga sulo sa sulod.
17 Nagsiling sia sa ila: “Tan-awa ninyo ako kag sunda gid ninyo ang akon himuon. Kon yara na ako sa dulunan sang kampo, sunda gid ninyo ang akon himuon.
18 Kon patunugon ko kag sang mga kaupod ko ang mga budyong, patunugon man ninyo ang mga budyong sa palibot sang kampo, kag magsinggit kamo, ‘Para kay Jehova kag kay Gideon!’ ”
19 Nagkadto si Gideon kag ang 100 ka lalaki nga kaupod niya malapit sa kampo antes magtungang-gab-i,* kag bag-o lang nabuslan ang mga guardia. Dayon ginpatunog nila ang mga budyong+ kag ginpamuka ang dalagku nga mga tibod nga ginauyatan nila.+
20 Gani ginpatunog sang tatlo ka tropa ang mga budyong kag ginpamuka ang dalagku nga mga tibod. Gin-uyatan sang ila wala nga kamot ang mga sulo kag sang ila tuo nga kamot ang mga budyong, kag nagsinggit sila: “Ang espada ni Jehova kag ni Gideon!”
21 Samtang ang kada isa sa ila nagatindog sa iya puesto sa palibot sang kampo, nagpinalagyo ang tanan nga soldado nga nagasinggit.+
22 Padayon nga ginpatunog sang 300 ka tawo ang mga budyong, kag ginpahanabo ni Jehova nga maglinab-anay sing espada ang tanan nga nagakampo.+ Ang mga soldado nga nagpinalagyo nakalab-ot sa Bet-sita, tubtob sa Zerera, kag tubtob sa dulunan sang Abel-mehola+ malapit sa Tabat.
23 Dayon ginpatawag ang mga lalaki sang Israel halin sa Neptali, sa Aser, kag sa bug-os nga Manases,+ kag ginlagas nila ang Midian.
24 Kag nagpadala si Gideon sing mga mensahero sa bug-os nga kabukiran sang Efraim, kag nagsiling sila: “Salakaya ninyo ang Midian, kag magbutang kamo sing mga lalaki sa manabaw nga mga bahin sang mga suba sa Bet-bara kag sa Suba Jordan agod indi sila makatabok.” Gani nagtipon ang tanan nga lalaki sang Efraim, kag ginbantayan nila ang mga suba sa Bet-bara kag ang Suba Jordan.
25 Ginbihag man nila ang duha ka pangulo sang Midian nga si Oreb kag si Zeeb. Ginpatay nila si Oreb sa isa ka daku nga bato, nga gintawag sang ulihi nga bato ni Oreb,+ kag ginpatay nila si Zeeb sa linasan sang ubas ni Zeeb. Padayon nila nga ginlagas ang Midian,+ kag gindala nila ang ulo ni Oreb kag ni Zeeb kay Gideon malapit sa Jordan.
Footnote
^ Ukon “manubo nga patag.”
^ Sa literal, “magabakod ang imo kamot.”
^ Sa literal, “sa pagsugod sang tungatunga nga hugna sang kagab-ihon,” nga nagasugod mga alas dies sang gab-i tubtob alas dos sang kaagahon.
