Hukom 8:1-35
8 Ang mga lalaki sang Efraim nagsiling sa iya: “Ngaa wala mo kami pagtawga sang nagpakig-away ka sa Midian?”+ Akig gid sila nga nagpakigbais sa iya.+
2 Apang nagsiling sia sa ila: “Ano bala ang nahimo ko kon ipaanggid sa nahimo ninyo? Indi bala nga mas maayo ang ginpanaghaw nga ubas sang Efraim+ sangsa ginpamupo sang Abi-ezer?+
3 Gintugyan sang Dios sa inyo ang mga pangulo sang Midian nga si Oreb kag si Zeeb,+ kag ano ang nahimo ko kon ipaanggid sa nahimo ninyo?” Nag-ugdaw ang ila kaakig sa iya* sang ginhambal niya ini.
4 Dayon nakalab-ot si Gideon sa Jordan kag nagtabok upod ang 300 ka lalaki. Kapoy na sila apang padayon ang ila paglagas sa ila mga kaaway.
5 Gani nagsiling sia sa mga lalaki sang Sucot: “Palihug hatagi sing tinapay ang katawhan nga nagasunod sa akon, kay kapoy na sila kag ginalagas ko si Zeba kag si Zalmunna nga mga hari sang Midian.”
6 Apang ang mga pangulo sang Sucot nagsabat: “Nabihag mo na bala si Zeba kag si Zalmunna amo nga dapat namon hatagan sing tinapay ang imo mga soldado?”
7 Bangod sini, nagsiling si Gideon: “Kon itugyan na sa akon ni Jehova si Zeba kag si Zalmunna, pilasan ko kamo paagi sa mga tunok sa kamingawan kag paagi sa tunukon nga mga tanom.”+
8 Kag halin didto nagtaklad sia sa Penuel kag pareho man ang ginpangabay niya sa ila, apang pareho man sa sabat sang mga lalaki sang Sucot ang ginsabat sa iya sang mga lalaki sang Penuel.
9 Gani nagsiling sia sa mga lalaki sang Penuel: “Kon magbalik ako nga luwas sa katalagman, rumpagon ko ini nga torre.”+
10 Si Zeba kag si Zalmunna yara sa Karkor kag kaupod nila ang mga 15,000 ka soldado nga nabilin sa bug-os nga kampo sang mga taga-Sidlangan,+ kay 120,000 na ang napatay sa mga nagauyat sing espada.
11 Nagtaklad si Gideon kag nag-agi sa mga nagaistar sa tolda sa sidlangan sang Noba kag Jogbeha+ kag ginsalakay ang wala nakapangaman nga kampo sang mga kaaway.
12 Sang malagyo si Zeba kag si Zalmunna, ginlagas niya sila kag nabihag niya ang duha ka hari sang Midian nga si Zeba kag si Zalmunna. Bangod sini, nagsalasala ang bug-os nga kampo sang mga kaaway.
13 Dayon nagbalik si Gideon nga anak ni Joas halin sa inaway, kag nag-agi sia sa dalan nga pataklad sa Heres.
14 Sa dalanon, may nabihag sia nga isa ka pamatan-on nga lalaki sang Sucot kag ginpamangkot niya sia. Gani ginlista sining pamatan-on nga lalaki ang ngalan sang mga pangulo kag sang mga gulang sang Sucot, 77 tanan ka lalaki.
15 Dayon nagkadto sia sa mga lalaki sang Sucot kag nagsiling: “Yari na si Zeba kag si Zalmunna nga bangod sa ila ginyaguta ninyo ako, sang nagsiling kamo, ‘Nabihag mo na bala si Zeba kag si Zalmunna amo nga dapat namon hatagan sing tinapay ang imo kapoy nga mga soldado?’ ”+
16 Dayon ginkuha niya ang mga gulang sang siudad, kag paagi sa mga tunok sa kamingawan kag tunukon nga mga tanom, gintudluan niya sing leksion ang mga lalaki sang Sucot.+
17 Ginrumpag niya ang torre sang Penuel+ kag ginpamatay niya ang mga lalaki sang siudad.
18 Ginpamangkot niya si Zeba kag si Zalmunna: “Ano nga sahi sang mga tawo ang ginpamatay ninyo sa Tabor?” Nagsabat sila: “Pareho sila sa imo, ang kada isa daw anak sang hari.”
19 Nagsiling sia: “Mga utod ko sila, mga anak sang akon iloy. Nagapanumpa ako sa buhi nga Dios nga si Jehova, kon wala lang ninyo sila ginpatay, indi ko na kuntani kamo pagpatyon.”
20 Dayon nagsiling sia kay Jeter nga iya panganay: “Patya sila.” Apang wala gingabot sang pamatan-on ang iya espada. Nahadlok sia kay lamharon pa sia.
21 Gani nagsiling si Zeba kag si Zalmunna: “Ikaw mismo ang magpatay sa amon kay makilala ang tawo sa iya kusog.” Gani ginpatay ni Gideon si Zeba kag si Zalmunna+ kag ginkuha niya ang korte-bulan nga mga puni sa liog sang ila mga kamelyo.
22 Sang ulihi, ang mga lalaki sang Israel nagsiling kay Gideon: “Maggahom ka sa amon, ikaw kag ang imo anak kag ang imo apo, kay ginluwas mo kami sa Midian.”+
23 Apang nagsiling si Gideon sa ila: “Indi ako ang maggahom sa inyo ukon ang akon anak. Si Jehova amo ang magagahom sa inyo.”+
24 Nagsiling pa si Gideon: “May ipangabay lang ako sa inyo: ang kada isa sa inyo maghatag sa akon sing singsing sa ilong halin sa iya inagaw.” (Kay may bulawan sila nga singsing sa ilong bangod mga Ismaelnon sila.)+
25 Nagsabat sila: “Mahatag kami.” Gani naghumlad sila sing kunop kag ginbutang diri sang kada isa ang singsing sa ilong halin sa iya inagaw.
26 Ang kabug-aton sang bulawan nga mga singsing sa ilong nga iya ginpangabay mga 1,700 ka siklo* nga bulawan, luwas pa sa korte-bulan nga mga puni, mga aritos, mga bayo nga purpura* nga de-lana nga ginsuksok sang mga hari sang Midian kag mga kulintas halin sa mga kamelyo.+
27 Gingamit ni Gideon ang mga bulawan sa paghimo sing efod+ kag ginbutang niya ini sa Ofra nga iya siudad;+ kag nagsimba* sa sini ang bug-os nga Israel,+ amo nga nangin siod ini kay Gideon kag sa iya panimalay.+
28 Nasakop sang mga Israelinhon ang Midian,+ kag wala na gid sila liwat manghangkat sa ila;* kag nangin malinong* ang duta sa sulod sang 40 ka tuig sang mga adlaw ni Gideon.+
29 Gani nagpauli si Jerubaal+ nga anak ni Joas kag nagpabilin sa iya balay.
30 May 70 ka anak nga lalaki* si Gideon bangod madamo sia sing asawa.
31 Ang iya babayi sa Siquem nagbun-ag man sa iya sing anak nga lalaki. Ginhingalanan niya sia nga Abimelec.+
32 Pagkatapos magkabuhi sing malawig, napatay si Gideon nga anak ni Joas kag ginlubong sia sa lulubngan ni Joas nga iya amay sa Ofra sang mga Abi-ezernon.+
33 Sang mapatay si Gideon, nagsimba* liwat ang mga Israelinhon sa mga Baal,+ kag ginhimo nila si Baal-berit nga ila dios.+
34 Wala gindumdom sang mga Israelinhon si Jehova nga ila Dios,+ nga nagluwas sa ila batok sa tanan nila nga kaaway sa palibot;+
35 kag wala man sila magpakita sing mainunungon nga gugma sa panimalay ni Jerubaal, nga amo si Gideon, bilang balos sa tanan nga kaayo nga ginpakita niya sa Israel.+
Footnote
^ Sa literal, “Nagtawhay ang ila espiritu batok sa iya.”
^ Ang kolor nga purpura kombinasyon sang pula kag asul.
^ Ang isa ka siklo katumbas sang 11.4 ka gramo. Tan-awa ang Apendise B14.
^ Sa literal, “naghimo sing espirituwal nga pagpakighilawas.”
^ Ukon “kag nakapahuway.”
^ Sa literal, “wala na gid sila maghangad sang ila ulo.”
^ Sa literal, “70 ka anak nga lalaki nga naghalin sa iya paa.”
^ Sa literal, “naghimo sing espirituwal nga pagpakighilawas.”
