Hulubaton 3:1-35
3 Anak ko, indi pagkalimti ang akon panudlo,*Kag kabay nga tumanon mo sing bug-os tagipusuon ang akon mga sugo,
2 Bangod magadugang sila sang madamo nga adlawKag mga tuig sang kabuhi kag kalinong sa imo.+
3 Indi pag-ibulag sa imo ang mainunungon nga gugma kag katutom.*+
Ihigot ini sa imo liog;Isulat ini sa imo tagipusuon;+
4 Dayon matigayon mo ang kahamuot kag maayo nga paghangopSa mga mata sang Dios kag sang tawo.+
5 Magsalig ka kay Jehova+ sa bug-os mo nga tagipusuon,Kag indi ka magsalig* sa imo kaugalingon nga paghangop.+
6 Hunahunaa sia sa tanan mo nga dalanon,+Kag tadlungon niya ang imo mga banas.+
7 Indi ka maghunahuna nga maalam ka na gid.+
Magkahadlok ka kay Jehova kag indi ka maghimo sing malain.
8 Makapaayo ini sa imo lawas*Kag makapabaskog sa imo mga tul-an.
9 Padunggi si Jehova paagi sa imo hamili nga mga butang,+Kag sang una nga mga bunga* sang tanan mo nga patubas;*+
10 Dayon mapuno ang imo mga bodega,+Kag magaawas ang bag-o nga alak sa imo mga suludlan.*
11 Anak ko, indi pagsikwaya ang pagdisiplina ni Jehova,+Kag indi pagkangil-ari ang iya pagsabdong,+
12 Kay ang ginahigugma ni Jehova ginasabdong niya,+Subong sang ginahimo sang amay sa anak nga nahamut-an niya.+
13 Malipayon ang tawo nga nakaangkon sing kaalam+Kag ang tawo nga nakatigayon sing paghantop;
14 Kay ang pagtigayon sini mas maayo pa sangsa pagtigayon sing pilak,Kag ang pagtigayon sini subong ginansia mas maayo pa sangsa pag-agom sing bulawan.+
15 Mas bilidhon pa ini sangsa mga korales;*Wala sang bisan ano nga puede mo handumon nga mapaanggid sa sini.
16 Ang malawig nga kabuhi yara sa tuo nga kamot sini;Ang manggad kag kadungganan yara sa wala nga kamot sini.
17 Ang mga dalanon sini kalipay,Kag ang tanan nga banas sini paghidait.+
18 Ang kaalam kahoy sang kabuhi,Kag ang nagapanguyapot sa sini magakabuhi sing malipayon.+
19 Paagi sa kaalam ginpasad ni Jehova ang duta.+
Paagi sa paghantop ginpalig-on niya ang kalangitan.+
20 Paagi sa iya ihibalo napihak ang madalom nga katubiganKag nagatulo ang tun-og halin sa magal-um nga kalangitan.+
21 Anak ko, indi pag-ibulag ang imo panulok sa ila.*
Tipigi ang praktikal nga kaalam kag ang ikasarang sa paghunahuna sing maayo;
22 Sila ang magahatag sa imo* sing kabuhiKag mangin matahom nga kulintas sa imo liog;
23 Kon himuon mo ini, magalakat ka nga wala sing katalagman,Kag ang imo tiil indi gid makasandad.*+
24 Kon maghigda ka, wala ka sing kahadlukan;+Kag makatulog ka sing mahamuok.+
25 Indi ka mahadlok sa bisan ano nga makahaladlok nga hitabo nga hinali nga magaabot,+Ukon sa unos nga magaabot sa malauton.+
26 Kay si Jehova ang mangin tuburan sang imo pagsalig;+Indi sia magtugot nga masiod ang imo tiil.+
27 Indi pag-idingot ang maayo sa mga dapat mo hatagan sini,*+Kon masarangan mo* ang pagbulig.+
28 Indi ka magsiling sa imo isigkatawo, “Lakat ka; balik ka na lang! Ihatag ko ini sa imo buas,”Kon mahatag mo man lang ini subong.
29 Indi ka magpahito sing malain sa imo isigkatawo+Kon nagasalig sia sa imo subong iya kaingod.
30 Indi pag-awaya ang imo isigkatawo sa wala sing kabangdanan+Kon wala man lang sia sing nahimo nga malain sa imo.+
31 Indi ka magkahisa sa mapintas nga tawo+Kag indi pagsunda ang iya mga ginahimo,
32 Kay ginakangil-aran ni Jehova ang mga malimbungon,+Apang nagapakig-abyan Sia sing suod sa mga matarong.+
33 Ginapakamalaut ni Jehova ang panimalay sang malauton,+Apang ginapakamaayo niya ang panimalay sang mga matarong.+
34 Kay ginatamay niya ang mga nagapangtamay,+Apang ginakahamut-an niya ang mga mahagop.+
35 Ang mga maalam magapanubli sang kadungganan,Apang ang mga buangbuang nagahimaya sang kahuy-anan.+
Footnote
^ Ukon “kasuguan.”
^ Ukon “kamatuoran.”
^ Sa literal, “magsandig.”
^ Sa literal, “pusod.”
^ Ukon “kita.”
^ Ukon “sang pinakamaayo.”
^ Ukon “mga linasan.”
^ Mahimo gid nga nagapatuhoy sa mga kinaiya ni Jehova nga ginsambit sa nauna nga mga bersikulo.
^ Ukon “imo kalag.”
^ Ukon “makaigo sa bisan ano.”
^ Ukon “yara sa gahom sang imo kamot.”
^ Ukon “sa mga nagakinahanglan sini.”
