Hulubaton 6:1-35
6 Anak ko, kon naggarantiya ka sa utang sang imo isigkatawo,+Kon gindaho mo ang imo kamot* sa isa ka dumuluong,+
2 Kon nasiod ka sa imo ginsaad,Kon nadakop ka sa imo ginsiling,+
3 Anak ko, amo ini ang imo himuon, agod maluwas mo ang imo kaugalingon,Kay ang imo isigkatawo amo na ang may gahom sa imo:
Magpaubos ka kag makiluoy gilayon sa iya.+
4 Indi ka magpatulogtulog,Ukon magpatuyotuyo.
5 Luwasa ang imo kaugalingon kaangay sang gasela sa kamot sang mangangayam,Kaangay sang pispis sa kamot sang manugpamispis.
6 Ikaw nga matamad,+ magkadto ka sa subay;Panilagi ang ginahimo sini agod mangin maalamon ka.
7 Bisan pa wala ini sing pangulo, manugdumala, ukon manuggahom,
8 Nagapangita ini sing pagkaon sa tingadlaw,+Kag nagatipon ini sing pagkaon kon tig-alani.
9 Ikaw nga matamad, tubtob bala san-o nga magtulogtulog ka lang?
San-o ka bala mabangon?
10 Diutay nga pagpatulogtulog, diutay nga pagpatuyotuyo,Diutay nga pagkursimano agod magpahuwayhuway,+
11 Ang imo kaimulon magaabot sa imo kaangay sang tulisan,Kag ang imo kinawad-on kaangay sang armado nga tawo.+
12 Ang wala sing pulos kag malaut nga tawo nagabinutig;+
13 Nagapangilay sia,+ nagahimo sing patimaan paagi sa iya tiil, kag nagasenyas sang iya mga tudlo.
14 Paagi sa iya malaut nga tagipusuon,Nagapahito sia pirme sing malain+ kag nagapalapta sing ginamo.+
15 Gani mapukan sia sing hinali;Malaglag sia gilayon kag indi na matabangan pa.+
16 Anom ka butang ang ginadumtan ni Jehova;Huo, pito ka butang ang ginakangil-aran niya:*
17 Matinaastaason nga mga mata,+ butigon nga dila,+ mga kamot nga nagapaagay sing dugo nga wala sing sala,+
18 Tagipusuon nga nagapahito sing makahalalit nga mga butang,+ mga tiil nga nagadalidali sa paghimo sing kalautan,
19 Butigon nga saksi nga nagasugid sing kabutigan,+Kag ang nagatuga sing gamo sa tunga sang mag-ulutod.+
20 Anak ko, tumana ang sugo sang imo amay,Kag indi pagsikwaya ang instruksion* sang imo iloy.+
21 Ihigot ini pirme sa imo tagipusuon;Ibalighot ini sa imo liog.
22 Tuytuyan ka sini kon nagalakat ka;Bantayan ka sini kon nagahigda ka;Kag magapakighambal* ini sa imo kon nagamata ka.
23 Kay ang sugo suga,+Kag ang kasuguan kapawa,+Kag ang sabdong kag disiplina dalanon padulong sa kabuhi.+
24 Magaamlig ini sa imo sa malain nga babayi,+Batok sa nagapanghaylo nga imoral* nga babayi.+
25 Indi paghanduma ang iya katahom+Ukon pagtuguti nga mabihag ka sang iya nagapanghaylo nga mga mata,
26 Kay bangod sa babayi nga makihilawason magaimol* ang isa ka tawo,+Apang bangod sa makihilahion nga asawa sang iban nga lalaki madula mo ang imo kabuhi.*
27 Makabutang bala ang lalaki sing kalayo sa iya dughan kag indi masunog ang iya bayo?+
28 Ukon makalakat bala sia sa mga baga nga indi mapaso ang iya mga tiil?
29 Amo man sini ang matabo sa isa nga nagahulid sa asawa sang iya isigkatawo;Wala sing nagatandog sa sina nga babayi nga indi masilutan.+
30 Wala ginatamay sang mga tawo ang kawatanKon nagapangawat sia agod busgon ang iya kaugalingon* kon gutom sia.
31 Apang kon madakpan sia, bayaran niya sing pito ka pilo ang iya kinawatan;Ihatag niya ang tanan nga pagkabutang nga yara sa iya balay.+
32 Ang nagapakighilawas sa isa ka babayi kulang sa maayo nga paghangop;*Ang nagahimo sini nagadala sing kalaglagan sa iya kaugalingon.*+
33 Mapilasan lamang sia kag maguba ang iya dungog,+Kag ang iya kahuy-anan magapabilin tubtob san-o.+
34 Kay ang kaimon nagapaakig gid sa bana;Indi sia magpakita sing kaluoy kon magtimalos sia.+
35 Indi sia magbaton sing bayad;*Indi sia mauloulohan bisan ano pa kadaku ang iregalo mo sa iya.
Footnote
^ Sa isa ka panumpa.
^ Ukon “sang iya kalag.”
^ Ukon “kasuguan.”
^ Ukon “magatudlo.”
^ Ukon “kalag.”
^ Sa literal, “magamantenir sa isa ka bilog nga tinapay.”
^ Ukon “busgon ang iya kalag.”
^ Sa literal, “kulang sing tagipusuon.”
^ Ukon “sa iya kalag.”
^ Ukon “gawad.”
