Isaias 15:1-9
-
Mensahe batok sa Moab (1-9)
15 Isa ka mensahe batok sa Moab:+
Bangod ginlaglag ini sa isa ka gab-i,Ang Ar+ sang Moab ginpahipos.
Bangod ginlaglag ini sa isa ka gab-i,Ang Kir+ sang Moab ginpahipos.
2 Nagtaklad sia sa Balay* kag sa Dibon,+Sa mataas nga mga duog, agod maghibi.
Naghaya ang Moab tungod sa Nebo+ kag tungod sa Medeba.+
Ang tanan nga ulo ginkalbo,+ ang tagsa ka bungot gin-utdan.+
3 Sa mga dalanon nagpanapot sila sing sako.
Naghaya sila tanan sa ila mga atop kag mga plasa;Nagpanaug sila nga nagahibi.+
4 Naghilibion sing mabaskog ang Hesbon kag Eleale;+Nabatian ang ila tingog tubtob sa Jahaz.+
Amo kon ngaa ang mga tawo sa Moab nga may hinganiban nagasininggit.
Nagakurog sia.*
5 Ang akon tagipusuon nagahibi tungod sa Moab.
Ang mga nagpalagyo halin sa Moab nakalab-ot tubtob sa Zoar+ kag sa Eglat-selisiya.+
Nagahilibion sila nga nagataklad sa Luhit;Samtang nagapakadto sa Horonaim nagahilibion sila bangod sang kalaglagan.+
6 Kay ang katubigan sang Nimrim nagmala;Ang berde nga hilamon nalaya,Ang hilamon napatay kag wala na sing nabilin nga berde.
7 Amo nga gindala nila ang ila nabilin nga mga pagkabutang kag manggad;Nagtabok sila sa nalupyakan* sang mga kahoy nga alamo.
8 Ang ila paghilibion nagalanog sa bug-os nga teritoryo sang Moab.+
Ang ila paghaya mabatian tubtob sa Eglaim;Ang ila paghaya mabatian tubtob sa Beer-elim.
9 Bangod ang katubigan sang Dimon napuno sing dugo,Kag may gintigana pa ako sa Dimon:
Leon nga magasalakay sa mga nagapalagyo nga mga MoabnonKag sa mga nabilin sa duta.+
