Isaias 22:1-25
22 Isa ka mensahe tuhoy sa Nalupyakan sang Madamo nga Kapahayagan:*+
Ano ang natabo sa imo, ngaa nagsaka kamo tanan sa mga atop?
2 Napuno ka sing kinagula,Isa ka magahod nga siudad, isa ka masinadyahon nga banwa.
Ang imo mga patay wala mapatay sa espada,Ukon sa inaway.+
3 Ang tanan mo nga mapiguson nga mga manuggahom magkaupod nga nagpalagyo.+
Wala sing ginbingat nga pana sang gindala sila nga mga bilanggo.
Ang tanan nga nadakpan gindala nga bilanggo,+Bisan nagpalagyo sila sa malayo.
4 Amo kon ngaa nagsiling ako: “Indi ninyo ako pagtuluka,Magahibi ako sing mapait.+
Indi kamo magpamilit nga lugpayan akoBangod sa paglaglag sa anak nga babayi* sang akon katawhan.+
5 Kay adlaw ini sang kagumon kag sang pagkalutos kag sang pagsinalasala,+Halin sa Soberanong Ginuong Jehova sang mga kasuldadusan,Sa Nalupyakan sang Madamo nga Kapahayagan.
Ginarumpag ang mga pader didto+Kag ang singgit nagalanog sa kabukiran.
6 Kuhaon sang Elam+ ang suludlan sang panaLakip ang mga kangga sa inaway kag mga kabayo,*Kag ginhanda* sang Kir+ ang taming.
7 Ang inyo pinakamaayo nga mga nalupyakan*Mapuno sang mga kangga sa inaway,Kag ang mga manugkabayo* magapuwesto sa gawang sang siudad,
8 Kag kuhaon ang nagaamlig nga tabon* sang Juda.
“Sa sina nga adlaw magatulok kamo sa talaguan sang mga hinganiban sang Balay sang Kagulangan sang Lebanon,+
9 kag makita ninyo ang madamo nga guba sa pader sang Siudad ni David.+ Kag tipunon ninyo ang tubig sa naubos nga punong.+
10 Isipon ninyo ang mga balay sa Jerusalem, kag gub-on ini agod mapabakod ang pader.
11 Kag magahimo kamo sing tilipunan sang tubig sa ulot sang duha ka pader para sa tubig sang daan nga punong, apang indi ninyo madumduman ang Daku nga Manunuga nga naghimo sini, kag indi ninyo mahunahuna ang Isa nga nagbuhat sini sang una pa.
12 Sa sina nga adlaw ang Soberanong Ginuong Jehova sang mga kasuldadusan,Magapanawag nga maghibi kamo kag maglalaw,+Magpakalbo kag magsuksok sing sako.
13 Apang sa baylo, magapangalipay kamo kag magasinadya,Magaihaw kamo sing baka kag karnero,Magakaon kamo sing karne kag magainom sing alak.+
Magasiling kamo, ‘Magkaon kita kag mag-inom, kay buas mapatay kita.’”+
14 Dayon si Jehova sang mga kasuldadusan nagsiling sa akon: “‘Indi kamo pagpatawaron sa sini nga sala tubtob mapatay kamo,’+ siling sang Soberanong Ginuong Jehova sang mga kasuldadusan.”
15 Amo ini ang ginasiling sang Soberanong Ginuong Jehova sang mga kasuldadusan: “Magkadto ka kay Sebna,+ nga tulugyanan sa balay* sang hari, kag isiling sa iya,
16 ‘Ano bala ang kinamatarong mo diri, kag sin-o ang paryente mo diri, amo nga diri ka nagkutkot sang imo lulubngan?’ Nagkutkot sia sang iya lulubngan sa mataas nga duog; nagguhab sia sang iya palahuwayan* sa igang.
17 ‘Tan-awa! Dakpon ka ni Jehova kag ihaboy.
18 Tipulunon ka niya kag ihaboy nga daw bola sa malapad nga duta. Didto mapatay ka, kag ang imo mahimayaon nga mga kangga mangin kahuy-anan sa balay sang imo agalon.
19 Pahalinon ko ikaw sa imo palangakuan kag kuhaon sa imo katungdanan.
20 “‘Sa sina nga adlaw tawgon ko ang akon alagad nga si Eliakim,+ nga anak ni Hilkias,
21 kag panaptan ko sia sang imo malaba nga panapton kag wagkusan ko sia sang imo paha,+ kag itugyan ko sa iya ang imo awtoridad.* Kag mangin amay sia sang mga pumuluyo sang Jerusalem kag sang panimalay ni Juda.
22 Ibutang ko sa iya abaga ang yabi sang panimalay ni David.+ Wala sing bisan sin-o nga makasira sang buksan niya; kag wala sing bisan sin-o nga makabukas sang sirhan niya.
23 Ilansang ko sia subong sang salab-itan sa malig-on nga duog, kag mangin trono sia sang kadungganan sa panimalay sang iya amay.
24 Kag isab-it nila sa iya ang tanan nga kadungganan* sang panimalay sang iya amay, ang mga kaliwat kag mga anak,* ang tanan nga magagmay nga mga suludlan, ang mga yahong, subong man ang tanan nga dalagku nga mga banga.
25 “‘Sa sina nga adlaw,’ siling ni Jehova sang mga kasuldadusan, ‘ang salab-itan nga ginlansang sa malig-on nga duog kuhaon,+ kag gabuton ini kag mahulog, kag ang mga ginsab-it sa sini mahulog kag mabuka, kay si Jehova mismo ang nagsiling sini.’”
Footnote
^ Mahimo gid nga nagapatuhoy sa Jerusalem.
^ Mabinalaybayon nga personipikasyon, ayhan nagapabutyag sing kaluoy ukon simpatiya.
^ Ukon “manugkabayo.”
^ Ukon “ginkuhaan sang tabon.”
^ Ukon “nga manubo nga mga patag.”
^ Ukon “kabayo.”
^ Ukon “ang proteksion.”
^ Ukon “palasyo.”
^ Sa literal, “ilistaran.”
^ Ukon “sakop.”
^ Sa literal, “bug-at.”
^ Ukon “salingsing.”
