Isaias 46:1-13
46 Si Bel kag si Nebo nagaduko.+
Ang ila mga diosdios ginakarga sa mga sapat,+Kaangay sang bagahe nga nagapabug-at sa kapoy nga mga sapat.
2 Pareho sila nga nagaduko;Indi nila maluwas ang mabug-at nga karga,*Kag sila mismo* mabihag.
3 “Pamatii ninyo ako, O panimalay ni Jacob kag kamo nga nagkalabilin sa panimalay ni Israel,+Kamo nga akon ginsakdag halin sa pagkabun-ag kag gin-atipan halin sa taguangkan.+
4 Tubtob sa inyo pagtigulang ako amo gihapon;+Tubtob sa inyo pagkaubanon pas-anon ko gihapon kamo.
Subong sang akon ginhimo, dalhon kag pas-anon ko kamo kag luwason.+
5 Kay sin-o ninyo ako ipatupong ukon ipaanggid,+Agod mangin kaangay kami?+
6 May mga nagabubo sing bulawan halin sa ila puyopuyo;Ginatimbang nila ang pilak sa timbangan.
Nagasuhol sila sang isa ka platero, kag ginahimo niya ini nga dios.+
Dayon nagahapa sila sa atubangan sini, kag ginasimba ini.*+
7 Ginapas-an nila ini;+Ginadala nila ini kag ginabutang sa puesto, kag nagatindog lamang ini didto.
Indi ini makahalin sa ginatindugan sini.+
Ginatawag nila ini, apang wala ini nagasabat;Indi ini makaluwas sa kay bisan sin-o sa kabudlayan.+
8 Dumduma ninyo ini, kag magpakaisog kamo.
Hupti ninyo ini sa inyo tagipusuon, kamo nga mga makasasala.
9 Dumduma ang nahanabo* nga mga butang sadto,Nga ako ang Dios,* kag wala na sing iban pa.
Ako ang Dios kag wala sing bisan sin-o nga kaangay sa akon.+
10 Halin sa ginsuguran gintagna ko ang mahanabo,Kag ang mga butang nga wala pa matabo.+
Nagasiling ako, ‘Ang akon pamat-od* matuman,+Kag himuon ko ang luyag ko.’+
11 Ginatawag ko ang pispis nga nagapangdagit, halin sa ginabutlakan sang adlaw,*+Ang tawo nga magatuman sang akon pamat-od* halin sa malayo nga duta.+
Ginsiling ko ini, kag pahanabuon ko ini.
Gintuyo ko ini, kag himuon ko man ini.+
12 Magpamati kamo sa akon, kamo nga mga matig-a* sing tagipusuon,Kamo nga wala nagahimo sang akon pagkamatarong.
13 Ipalapit ko ang akon pagkamatarong;Malapit na ini,Kag indi magpalantang ang akon pagluwas.+
Luwason ko ang Sion kag himayaon ang Israel.”+
Footnote
^ Ang mga diosdios nga ginkarga sa mga sapat.
^ Ukon “ang ila mga kalag.”
^ Sa literal, “ginayauban ini.”
^ Sa literal, “una.”
^ Ukon “ang Isa nga Balaan.”
^ Ukon “katuyuan; laygay.”
^ Ukon “sa sidlangan.”
^ Ukon “katuyuan; laygay.”
^ Sa literal, “gamhanan.”
