Jeremias 1:1-19
1 Amo ini ang ginsiling ni Jeremias* nga anak ni Hilkias nga isa sa mga saserdote sa Anatot+ sa duta sang Benjamin.
2 Naghambal sa iya si Jehova sang ika-13 nga tuig sang paggahom ni Josias+ nga hari sang Juda nga anak ni Amon.+
3 Naghambal man sa iya ang Dios sang panahon ni Jehoiakim+ nga hari sang Juda nga anak ni Josias, tubtob matapos ang ika-11 nga tuig sang paggahom ni Sedequias+ nga hari sang Juda nga anak ni Josias, tubtob gintapok ang Jerusalem sang ikalima nga bulan.+
4 Nagsiling si Jehova sa akon:
5 “Kilala* ko na ikaw antes ko pa ikaw ginhimo sa tiyan,+Kag antes pa ikaw matawo* ginpili ko na ikaw sa paghimo sing pinasahi nga buluhaton.+
Ginhimo ko na ikaw nga manalagna sa mga pungsod.”
6 Apang nagsiling ako: “O Soberanong Ginuong Jehova!
Indi ako makahibalo kon ano ang ihambal ko,+ kay bata pa ako.”+
7 Nagsiling si Jehova sa akon:
“Indi ka magsiling, ‘Bata pa ako.’
Kay dapat ka magkadto sa tanan nga pakadtuan ko sa imo,Kag dapat mo ihambal ang tanan nga isugo ko sa imo.+
8 Indi ka mahadlok sa ila,+Kay ‘kaupod mo ako kag luwason ko ikaw,’+ siling ni Jehova.”
9 Dayon gin-untay ni Jehova ang iya kamot kag gintandog ang akon baba.+ Kag nagsiling si Jehova sa akon: “Isiling mo sa ila ang ihambal ko sa imo.+
10 Ginhatagan ko ikaw sing awtoridad sini nga adlaw sa mga pungsod kag mga ginharian, agod maggabot kag magrumpag, agod maglaglag kag magguba, agod magpatindog kag magtanom.”+
11 Nagsiling pa si Jehova sa akon: “Ano ang nakita mo, Jeremias?” Nagsabat ako: “Nakita ko ang isa ka sanga sang kahoy nga almendra.”*
12 Nagsiling si Jehova sa akon: “Husto ang nakita mo, kay nagamata ako agod tumanon ang akon ginsiling.”
13 Nagsiling liwat sa akon si Jehova: “Ano ang nakita mo?” Nagsabat ako: “Nakita ko ang isa ka kaldero* nga nagaindakal,* kag ang baba sini nagahilay halin sa aminhan pakadto sa bagatnan.”
14 Dayon nagsiling si Jehova sa akon:
“Halin sa aminhan magaabot ang kalaglaganBatok sa tanan nga pumuluyo sang duta.+
15 Kay ‘tawgon ko ang tanan nga tribo sang mga ginharian sa aminhan,’ siling ni Jehova,+‘Kag magaabot sila; ibutang sang mga hari ang ila tronoSa mga gawang sang Jerusalem,+Kag salakayon nila ang tanan niya nga pader sa palibotKag salakayon nila ang tanan nga siudad sang Juda.+
16 Ihambal ko sa ila ang akon paghukom sa tanan nila nga kalautan,Bangod gintalikdan nila ako,+
Kag nagapaaso sila sing halad* sa iban nga mga dios+Kag nagayaub sila sa mga ginhimo sang ila mga kamot.’+
17 Apang dapat ka maghanda,*Kag maglakat ka kag ihambal mo ang tanan nga isugo ko sa imo.
Indi ka mahadlok sa ila,+Agod indi ko pagtugutan nga mahadlok ka sa ila atubangan.
18 Ginhimo ko ikaw sa sini nga adlaw nga isa ka siudad nga may mabakod nga depensa,Isa ka haligi nga salsalon kag pader nga saway agod mabatuan mo ang bug-os nga kadutaan,+Ang mga hari sang Juda kag ang iya mga prinsipe,Ang iya mga saserdote kag ang katawhan sa sini nga duta.+
19 Magapakig-away sila sa imo,Apang indi sila magadaug* sa imo,Kay ‘kaupod mo ako+ agod luwason ka,’ siling ni Jehova.”
Footnote
^ Mahimo nagakahulugan, “Si Jehova Nagapakataas.”
^ Ukon “Ginpili.”
^ Sa literal, “antes pa ikaw maggua sa tiyan.”
^ Sa literal, “sang isa nga nagamata.”
^ Ukon “daku sing baba nga kaldero.”
^ Sa literal, “ginadabukan,” nagapakita nga ginakuyaban ang kalayo sa idalom sini.
^ ‘Nagapaaso sing halad.’ Mahimo nga ginapatuhuyan man sang Hebreo nga ekspresyon ang pagsunog sing incienso.
^ Sa literal, “magwagkus sang imo balikawang.”
^ Ukon “makapierde.”
