Jeremias 11:1-23
11 Amo ini ang ginsiling ni Jehova kay Jeremias:
2 “Pamatii ninyo ang ginasiling sini nga katipan!
“Ihambal* ini sa katawhan sang Juda kag sa mga pumuluyo sang Jerusalem
3 kag isiling mo sa ila, ‘Amo ini ang ginasiling ni Jehova nga Dios sang Israel: “Pakamalauton ang tawo nga wala nagatuman sa ginasiling sini nga katipan,+
4 nga ginsugo ko sa inyo mga katigulangan sang adlaw nga ginpagua ko sila sa Egipto,+ halin sa hurnuhan sang salsalon,+ kag nagsiling ako sa ila, ‘Tumana ninyo ako, kag himua ninyo ang tanan nga ginasugo ko sa inyo; kag mangin katawhan ko kamo kag mangin Dios ninyo ako,+
5 agod tumanon ko ang ginpanumpa ko sa inyo mga katigulangan, nga ihatag ko sa ila ang duta diin nagailig ang gatas kag dugos,+ nga inyo ginaistaran tubtob sini nga adlaw.’”’”
Kag nagsabat ako: “Kabay pa,* O Jehova.”
6 Nagsiling dayon si Jehova sa akon: “Ipahibalo ini sa mga siudad sang Juda kag sa mga dalan sang Jerusalem: ‘Pamatii ninyo ang ginasiling sini nga katipan, kag tumana ninyo ini.
7 Kay ginlaygayan ko ang inyo mga katigulangan halin pa sang ginpagua ko sila sa Egipto tubtob sini nga adlaw, nga nagalaygay sa ila sing sulitsulit:* “Tumana ninyo ako.”+
8 Apang wala sila magpamati ukon maghatag sing igtalupangod, kundi ang kada isa nangin batinggilan kag ginsunod ang iya malaut nga tagipusuon.+ Gani ginpahanabo ko sa ila ang ginasiling sini nga katipan bangod wala nila gintuman ang ginsugo ko sa ila.’”
9 Dayon nagsiling si Jehova sa akon: “Naghimbon batok sa akon ang katawhan sang Juda kag ang mga pumuluyo sang Jerusalem.
10 Ginhimo man nila ang mga sala nga ginhimo anay sang ila mga katigulangan nga wala magtuman sa akon.+ Nagsunod man sila kag nag-alagad sa iban nga mga dios.+ Ginlapas sang panimalay ni Israel kag sang panimalay ni Juda ang akon katipan nga ginhimo ko sa ila mga katigulangan.+
11 Gani amo ini ang ginasiling ni Jehova, ‘Padalhan ko sila sang kalaglagan+ kag indi sila makapalagyo. Kon mangayo sila sing bulig sa akon, indi ako magpamati sa ila.+
12 Dayon ang mga siudad sang Juda kag ang mga pumuluyo sang Jerusalem magapalapit kag magapangayo sing bulig+ sa mga dios nga ginahalaran nila,* apang indi gid ini makaluwas sa ila sa tion sang kalaglagan.
13 Kay ang imo mga dios pareho kadamo sang imo mga siudad, O Juda, kag naghimo ka sing mga halaran para sa makahuluya nga butang* nga pareho kadamo sang mga dalan sa Jerusalem. Ini nga mga halaran ginhimo mo para sa paghalad kay Baal.’+
14 “Indi ka* magpangamuyo para sa sini nga katawhan. Indi ka magpakiluoy ukon magpangamuyo para sa ila,+ kay indi ako magpamati kon magpanawag sila sa akon bangod sang ila kalaglagan.
15 Ano ang kinamatarong sang akon hinigugma nga katawhan sa akon balaySamtang madamo sa ila ang nagahimo sing malaut nga butang?
Bangod sa balaan nga unod* malikawan bala nila ang kalaglagan kon mag-abot ini sa imo?
Magahugyaw ka bala sa sina nga tion?
16 Gintawag ka anay ni Jehova nga isa ka madabong nga kahoy nga olibo,Matahom kag may maayo nga mga bunga.
Apang paagi sa mabaskog nga gahod, ginsunog niya sia,Kag nagkalautod ang iya mga sanga.
17 “Si Jehova sang mga kasuldadusan, ang imo Manugtanom,+ nagsiling nga pagalaglagon ka bangod sang kalainan nga ginhimo sang panimalay ni Israel kag sang panimalay ni Juda, nga nagpaakig sa akon kay naghalad sila kay Baal.”+
18 Ginsugiran ako ni Jehova agod mahibaluan ko ini;Ginpakita mo sa akon ang ila mga ginahimo.
19 Pareho ako sang mahagop nga kordero nga ginadala sa ilihawan.
Wala ako makahibalo nga may ginaplano sila batok sa akon:+
“Laglagon naton ang kahoy kag ang iya mga bunga,Kag utdon naton sia sa duta sang mga buhiAgod indi na madumduman ang iya ngalan.”
20 Apang si Jehova sang mga kasuldadusan nagahukom sing matarong;Ginausisa niya ang pinakamadalom nga panghunahuna* kag ang tagipusuon.+
Kabay pa nga makita ko ang imo pagtimalos sa ila,Kay gintugyan ko sa imo ang akon kaso.
21 Gani amo ini ang ginasiling ni Jehova batok sa katawhan sang Anatot+ nga nagatinguha sa pagkuha sang imo kabuhi* kag nagasiling sa imo: “Indi ka magpanagna sa ngalan ni Jehova+ agod indi ka namon pagpatyon”;
22 gani amo ini ang ginasiling ni Jehova sang mga kasuldadusan: “Manabat sila sa akon. Ang lamharon nga mga lalaki mapatay paagi sa espada,+ kag ang ila mga anak nga lalaki kag babayi mapatay sa gutom.+
23 Wala gid sing mabilin sa ila, bangod laglagon ko ang katawhan sang Anatot+ sa tuig nga manabat sila.”
Footnote
^ Mahimo nga ginhambal kay Jeremias.
^ Ukon “Amen” sa Hebreo.
^ Sa literal, “aga pa nagabangon kag nagalaygay.”
^ Ukon “ginapaasuhan nila sing halad.”
^ Ukon “dios.”
^ Si Jeremias.
^ Mga halad sa templo.
^ Ukon “pinakamadalom nga balatyagon.” Sa literal, “ang mga batobato.”
^ Ukon “nagapangita sang imo kalag.”
